JEREMÍAS 21:5 - Dios Rimashca Shimicunami

⁵ Ñucaca cancunahuanca yallitaj p'iñarishca, llaquirishcami cani. Chaimanta ñucatajmi cancunahuanca, tucuita rurai tucuj ñuca sinchi maquihuan macanacugrini.

JEREMÍAS 21:5 Iomraidhean Croise

ÉXODO 6:6

Chaimanta israelcunataca cashna ni: Ñucaca MANDAJ DIOSMI cani. Egiptocuna yallitaj sinchita trabajachicunmantaca ñucami llujshichisha. Huatashcata shina paicuna cancunata rurachicunmantaca paicuna ima shina cancunata llaquichishca shinallatajmi ñuca rigrata chutashpa paicunatapish llaquichishpa cancunataca cacharichisha.

ÉXODO 9:15

Ñucaca cantapish, can mandacun gentecunatapish llaquichingapaj ñuca maquita chutajpica ñami tucuicuna cai pachamanta illanguichijman.

ISAÍAS 10:4

Ñuca illajlla cashpaca, prezucunahuanmi cumuringuichij. Huañuchijcunapaj maquipimi urmanguichij. Chashna llaquichishpapish pai p'iñarishcaca manataj pararingachu. Paicunata llaquichingapajca maquita chutashcarajmi.

ISAÍAS 5:25

Mana cazushcamantaca Mandaj Diosca, pai agllashcacunahuanca nina sindirij shinami yallitaj p'iñarirca. Mandaj Diosca paipaj maquita chutashpami chugrichirca. Urcucunapish chujchurcami. Huañushcacunapish chaupi ñancunapimi shitashca saquirircacuna. Chashna llaquichishpapish pai yallitaj p'iñarishcaca manaraj pararircachu. Ashtahuanpish paipaj maquitaca chutaracunrajmi.

ISAÍAS 63:10

Ashtahuanpish paicunaca c'ariyashpami paipaj jucha illaj Espirituta p'iñachircacuna. Chaimantami Mandaj Diosca paicunahuan p'iñarishpa macanacurca.

ISAÍAS 9:12

Inti llujshin ladomantaca Siriocunatami pushamunga. Inti huashicun ladomantaca filisteocunatami pushamunga. Paicunami israelcunataca, shimi jundata amullishpa millpungacuna. Chashna rurashpapish Mandaj Dios yallitaj p'iñarishcaca manataj pararingachu. Ashtahuanpish paipaj maquica chutashcarajmi canga.

ISAÍAS 9:17

Tucuicunami manapish rimana cajta rimajcuna. Tucuicunami llullacuna, millaicuna. Chaimanta Jatun Diosca, chaipi causaj q'uipa huiñaicunahuanca manataj cushicunchu. Yaya mama illajcunatapish, viudacunatapish manataj llaquingachu. Tucui chaicunata rurashpapish, pai p'iñarishcaca manataj pararingachu. Paicunata llaquichingapajca maquita chutashcarajmi.

ISAÍAS 9:21

Manasesca Efraintami millpunga. Efrainca Manasestami millpunga. Ishquindij tucushpami, Judata p'iñashpa jataringa. Tucui chaicunata rurashpapish, pai p'iñarishcaca manataj pararingachu. Paicunata llaquichingapajca maquita chutashcarajmi.

JEREMÍAS 32:17

“¡Jatun Mandaj Dioslla, canmari jahua pachatapish, cai pachatapish tucuita rurai tucuj cambaj maquihuan rurarcangui! Cambajca imata ruranapish mana sinchichu.

JEREMÍAS 32:37

Shina cajpipish ñucaca yallitaj p'iñarishpa, manataj ashtahuan charisha nishpa llujshichishpa cachashcacunataca, tucui cai pachamantami cutin tandachimusha. Chashna tandachimushpa, cutin caipi causachun churashatajmi.

JEREMÍAS 36:7

Mandaj Dios jatunta p'iñarishpa paicunata chashna mancharinata llaquichisha nicujta uyashpaca, Mandaj Dios uyana shinata tucui shunguhuan mañangacunapishchari. Paicunapaj millai causaitapish saquishpa cutiringacunapishchari” nircami.

JEREMÍAS 37:10

Cancunahuan macanacucuj caldeo soldadocunataca, tucuicunata chugrichinguichijchari. Chashna chugrichishca huaquin soldadocunalla saquirishpapish, paicunapaj carpa huasicunamanta llujshimushpa cai pueblotaca ninata japichishpa tucui rupachingallami ninmi” nircami.

JEREMÍAS 6:12

Paicunapaj huasicunatapish, allpacunatapish, huarmicunatapishmi shujtajcuna japingacuna. Ñucatajmi cai llajtapi causajcunataca llaquichisha. Mandaj Diostajmi chashna nini.

LAMENTACIONES 2:3

Pai jatunta p'iñarishpaca israelcuna jatun cashcataca tucuitami urmachirca. P'iñajcunahuan macanacuipica paipaj alli maquitaca ña mana mañachircachu. Ninata japichishpamari Jacobpaj tucui muyundijta rupachirca.

EZEQUIEL 39:3

Cambaj lluqui maquipi charicun arcotaca quichushpami, alli maquipi charicun puntajlla caspicunatapish p'aquisha.

EZEQUIEL 5:8

Chaimantami Mandaj Jatun Diostaj cashna nini: Riqui, cancunataca llaquichigrinimi. Tucui llajtacunapi causajcuna ricucunpimi cancunataca llaquichisha.

DEUTERONOMIO 4:23

Mandaj Dios cancunapaj Taita Dioshuan cancunahuan imallata ari ninacushcataca amataj cungaringuichijchu. Labrashpa imaman rijchajcunata Mandaj Dios cancunapaj Taita Dios amataj ruranguichij nishcataca ñataj ruranguichijman.

DEUTERONOMIO 4:34

Maijan diostaj shuj llajtapaj chaupimanta shuj llajtata paipajlla cachun llaquicunahuan, ricuchinacunahuan, milagrocunahuan, jatun macanacuicunahuan paipaj tucuita rurai tucuj maquihuan, paipaj rigra chutashcahuan mancharinacunata rurashcahuan llujshichinata yuyarishcari. Mandaj Dios cancunapaj Taita Diosmi Egiptomantaca cancunapaj ñaupajpi tucui chaicunata rurashpa cancunataca llujshichimurca.