JEREMÍAS 21:10 - Dios Rimashca Shimicunami

¹⁰ Ñucaca llaquichingapajmi tigrashpa ricurcani, mana ima allita cungapaj ricucunichu. Babilonia llajtata jatun mandajpaj maquipimi churani. Paimi ninata japichishpa tucuchinga ninmi Mandaj Diosca ningui.

JEREMÍAS 21:10 Iomraidhean Croise

2 CRÓNICAS 36:19

Shinallataj Diospaj huasitapish rupachircacunami, Jerusalén muyundij jatun pircatapish urmachircacunami. Mandashpa tiyana huasicunatapish ninata japichishpa tucui rupachircacunami. Chai huasicunapi imalla ashtahuan alli tiyashcataca, tucuimi tucuchircacuna.

SALMOS 34:16

Mandaj Diosca millaita rurajcunataca p'iñanmi. Paicuna rurashcata pi ama yuyarichunmi, cai pachamanta paicunata chingachin.

JEREMÍAS 17:27

Ashtahuanpish samana punlla huaquichichun ñuca mandashcata mana cazushpa, chai punllapi ima cargatapish apamushpa, cai Jerusalén puebloman yaicuchijpica, jatun ninahuanmi cai pungucunataca rupachisha. Chai ninaca, Jerusalén pueblopi caj mandana huasicunandijmi tucui rupachinga, pi mana huañuchi tucungachu” ninmi.

JEREMÍAS 26:6

Chashnallataj catijpica, cai huasitaca ima shinami Silo pueblota rurarcani, chashnallatajmi rurasha. Cai pueblotapish shujtaj llajtacunata mana alli nishpaca, Jerusalén shina tucushca alli canman ninatami rurasha ninmi ningui” nircami.

JEREMÍAS 33:5

Caipi causajcunallatajmi, caldeo soldadocunahuan macanacunaman espadacunahuan llujshincuna. Chaimantami cai huasicunapica, huañushcacunata jundachincuna. Paicunallataj yallitaj millaita rurashpa causashcamanta yallitaj p'iñarishpami, cai pueblopi causajcunamantaca ñuca ñahuita shujman churarcani. Chashna yallitaj p'iñarishpami, cai jatun llaqui tucuchun saquircani.

JEREMÍAS 34:2

Israelcunata Mandaj Diosca ñucataca cashnami nin: “Judá llajtata jatun mandaj Sedequiaspajman rishpa cashna nigri: Mandaj Diosca cashnami nin: Cai pueblotaca ñucatajmi Babilonia llajtata jatun mandajman cugrini. Pai japishpaca ninata japichishpami, tucui rupachinga.

JEREMÍAS 34:22

Cunan rishca cajpipish, ñucallatajmi cutin cai puebloman tigrachimusha. Paimi cancunahuan macanacushpa mishanga, cai pueblotaca ninahuanmi tucui rupachinga. Chashna rurashpami, cai Judá llajta pueblocunataca shuj runallatapish mana saquishpa, shitashca, chushajta saquisha ninmi Mandaj Diosca” nircami.

JEREMÍAS 38:17

Shina nijpimi Jeremiasca, Sedequiastaca cashna nirca: –Tucuita Mandaj Diostaj, israelcunapaj Diostajmi cashna nin: Babilonia llajtata jatun mandaj cachashca mandajcunapajman rishpa, cunantaj paicunapaj maquipi yaicushpaca mana huañunguichu. Canpish, cambaj familiapish mana huañunguichijchu. Cai pueblopish mana rupachishca cangachu.

JEREMÍAS 38:18

Ashtahuanpish Babilonia llajtata jatun mandaj cachashca mandajcunapajman mana canllataj llujshishpa paicunapaj maquipi yaicujpica, cai puebloca caldeocunapaj maquipi churashca cangami. Paicunaca ninata japichishpa tucuimi rupachingacuna. Canpish paicunapaj maquimantaca, manataj quishpiringuichijchu ninmi– nircami.

JEREMÍAS 38:23

Cambaj tucui huarmicunatapish, huahuacunatapishmi caldeocunaca caimanta llujshichishpa apangacuna. Canpish paicunapaj maquimantaca manataj quishpiringuichu. Ashtahuanpish Babilonia llajtata jatun mandajpaj maquipi japi tucunguitajmi. Cai pueblopish tucui rupachishca cangatajmi– nircami.

JEREMÍAS 38:3

Cai puebloca Babilonia llajtata jatun mandajpaj soldadocunapaj maquipi churashca cangatajmi. Paicunami macanacushpa mishanga ninmi Mandaj Diosca” nircami.

JEREMÍAS 39:16

“Ebed-melecpajman rishpa cashna nigri: Tucuita Mandaj, israelcunapaj Diosca cashnami nin: Ñucaca, cai pueblopajca ima allita mana rurashachu, ashtahuanpish imalla llaquicunata cachashami nishpa ñuca huillashcatami pajtachigrini. Chai llaqui punllacuna chayamucujtaca, cambaj ñahuihuantajmi ricungui.

JEREMÍAS 39:8

Caldeo soldadocunaca mandana huasitapish, tucui Jerusalén pueblo huasicunatapishmi rupachircacuna. Muyundij jatun pircacunatapish urmachircacunami.

JEREMÍAS 44:11

Tucuita Mandaj, israelcunapaj Diosca cashnapishmi nin: Chaimantami ñucaca can Judá runacunataca, tucuicunata tucuchingapaj chaparacuni. Cancunataca jatuntami llaquichigrini.

JEREMÍAS 44:27

Ñuca paicunapaj ima allita ruranapaj randica, jatun llaquita rurangapajmi paicunataca chaparacuni. Cai Egipto llajtapi caj Judá runacunaca tucuicunami espadahuanpish, yaricaihuanpish chingachishca cangacuna.

JEREMÍAS 52:13

Jerusalenman pai shamushpaca, Mandaj Diospaj huasitapish, jatun mandajpaj huasitapish, shujtaj huasicunatapishmi rupachirca. Jatun huasicunataca tucuitami ninahuan tucuchirca.

EZEQUIEL 15:7

Paicunataca p'iñarishpa llaquichishatajmi. Ninamanta quishpirishca cajpipish, ninallahuantajmi paicunataca chingachinga. Paicunata chashna rurashpa llaquichijpimi ñucataca, Mandaj Diostaj cashcata yachanguichij.

EZEQUIEL 24:11

Chai chushajlla mangataca, rupacuj nina jahuapimi tiyachisha. Chaipimi chai mangapi tiyaj mapapish fierro ishpashcapish tucui rupashpa chingaringa.

LEVÍTICO 17:10

Maijan israelcuna cashpa mana cashpaca paicunapurapi causaj mana israelcuna cashpa ima animalpaj yahuarta micujpica ñucaca paihuan p'iñarishpa, paitaca israelcunapuramanta anchuchishami.

LEVÍTICO 26:17

Ñucapish cancunataca p'iña ñahuihuanmi ricusha. Cancunata p'iñajcunapaj ñaupajpimi chugrichishcacuna canguichij. Cancunata p'iñajcunami cancunataca mandanga. Pi mana caticujpipish miticushpami callpanguichij.

AMÓS 2:5

Chashna mana allita rurashcamantaca, Judá llajtapica ninatami japichisha. Chai ninallatajmi, Jerusalén pueblota mandashpa tiyana huasicunatapish rupachinga” nircami.

AMÓS 9:4

Paicunata p'iñajcuna prezu apashpa huatashcata shina charicujpipish, espadahuanmi huañuchichisha. Ñucaca paicunata ricushpapish, llaquichingapajllami ricusha. Allita rurangapajca, mana ricushachu” ninmi.

ZACARÍAS 1:6

Ashtahuanpish cancunapaj yayacunamanca ñuca shimicunatapish, ñuca mandashcacunatapish ñuca ima nishcata huillaj runacunatami huillachun mandarcani. Ñuca mandashcacunaca, paicunapajmanmi chayarca. Chaimantami ñucapajman cutirircacuna. Paicunaca cashnapishmi nircacuna: Mandaj Diosca, ñucanchijtaca mana alli ñancunapi puricushcamantapish, millaita rurashcamantapishmi, chashna llaquichinataca yuyarirca. Pai rurasha nishca shinallatajmari ñucanchijtaca llaquichin nircacunami nishpa huillai” nircami.