JEREMÍAS 2:7 - Dios Rimashca Shimicunami

⁷ Ñucamari cancunataca ima allicunatapish charichun, chagracunapi p'ucuj sumaj granocunata micushpa causachun, ima mana illaj cai llajtaman yaicuchircani. Ashtahuanpish cancunaca yaicushcahuanmari ñuca llajtataca mapayachircanguichij. Ñuca cushca cai allpataca millananatami rurarcanguichij.

JEREMÍAS 2:7 Iomraidhean Croise

NEHEMÍAS 9:25

Muyundij pircayuj pueblocunatapish japircacunami. Alli granota p'ucuj allpacunatapish japircacunami. Huasicunatapish tucui imalla tiyashcacunahuan jundatami japircacuna. Yacupaj tanque rurashcacunatapish, uva chagracunatapish japircacunami. Olivos yuracunatapish, tucui laya micunata p'ucuj yuracunatapish japircacunami. Paicunaca mana nijtami micurcacuna. Fuerzasapacunami tucurcacuna. Mandaj Dios c'uyaj cashcapimi cushicurcacuna.

NEHEMÍAS 9:26

Ashtahuanpish paicunaca Diosta mana cazushpami colerachircacuna. Diostaca c'ariyarcacunami. Dios mandashcacunata saquishpami huashata ricuchircacuna. Diospajman cutirichij nishpa huillaj profetacunatapish huañuchircacunami. Chashnami yallitaj millananacunata rurarcacuna.

ISAÍAS 19:25

Chai punllapica Tucuita Mandaj Diosca: “Egipciocunaca alli nishca ñucapajmi nishca cachun. Asiriocunaca ñuca maquihuan rurashcami nishca cachun. Israelcunaca ñuca agllashcacunami nishca cachun” nishpami paicunataca alli nishcacuna cachun ninga.

JEREMÍAS 16:18

Paicuna imalla millaita, imalla juchata rurashcamantarajmi shuj cutihuan yallita pagasha. Paicunapaj huañushca dioscunahuanmi ñuca allpataca mapayachircacuna. Ñuca tucui llajtapimi, chai millananacunata jundachircacuna” ninmi.

JEREMÍAS 3:1

Maijanpish: Shuj runa paipaj huarmita shitajpi, chai huarmi ch'icanyashpa shujtaj c'arihuan apanacushpa causajpica, ¿punta cusaca chai huarmihuan cutin tandanacui tucunchu? ¿Manachu cutin tandanacujpica, tucui llajtatami mapayachin nincuna? Cancarin mashnatajshi c'aricunahuanmari c'uyanacushpa huainayashcangui. Shina cajpipish, cantaca ñucaman tigrai ninimi. Mandaj Diostajmi chashna nini.

JEREMÍAS 3:2

Tucui urcucunata huichilla ricuyari. Maijan lomata ricujpipish, can huainayashcaca ricunallami tiyacun. Cambaj c'uyashcacunahuan tupangapajmi, shitashca pambapi árabe runa chapashpa tiyacuj shina ñan c'uchupi tiyarij carcangui. Chashna huainayashpa, millaita rurashpamari tucui llajtata mapayachingui.

JEREMÍAS 3:9

Paica, shujtaj dioscunahuan huainayashca mana alli canataca, mana yuyarcachu. Chaimantami rumi dioscunahuan, caspi dioscunahuan huainayarca. Chashna rurashpami tucui llajtata mapayachirca.

JEREMÍAS 32:23

Cai llajtata japishpaca, caipi p'ucushcata micushpa cushicurcacunami. Shina cashpapish can rimashcataca mana uyarcacunachu, can mandashcatapish imata mana pajtachishpa causancunachu. Imallata rurachun can mandashcataca, imata mana rurarcacunachu. Chaimantamari cai tucui llaquicunata paicunapaj jahuapi cacharishcangui.

JEREMÍAS 32:30

Israelcunapish, Judá runacunapish ñuca ñaupajpi ima allita ruranapaj randica, callarimantapacha millaillata rurashpami causarcacuna. Tucui israelcunallatajmi paicunapaj maquihuan rurashca dioscunahuan ñucata p'iñachishpalla causancuna. Ñuca, Mandaj Diostajmi chashna nini.

EZEQUIEL 20:24

Paicunaca ñuca huillachishcacunatapish mana rurarcacunachu, ashtahuanpish ñuca quillcachishcapi nishcatapish cungarircacunami, ñuca samana punllacunatapish yangatami rurarcacuna. Paicunapaj yayacunapaj dioscunallapitajmi yuyaita churarcacuna.

EZEQUIEL 20:28

Ñuca maquita alzashpami, chai llajtataca cushatajmi nircani. Chai llajtaman pushamujpica, chai llajtapi tiyaj jatun lomacunata, p'angasapa yuracunata ricushpaca chaipimi animalcunata cushpa huañuchircacuna. Ñuca mana ricunachishcacunatami chaicunapi curcacuna. Shinallataj mishquijllata ashnaj inciensotapish chaipimi rupachircacuna, vinotapish chaipimi tallircacuna ninmi ningui.

EZEQUIEL 20:6

Chai punllaca ñuca maquita alzashpami, cai Egipto llajtamanta llujshichishpaca lechepish, sacha chuspi huachashca mishquipish yacu shina llujshicun llajtapimi churasha. Chai llajtaca tucui llajtacunamanta yalli sumaj llajtami nircanimi.

EZEQUIEL 23:35

Shinallataj Mandaj Jatun Diosca cashnapishmi nini: Huainayana munaillahuan causashpami ñucatapish cungarishpa huashata ricuchircangui. Chashna rurashcamantaca, canca llaquita apanami cangui ninmi ningui” nircami.

EZEQUIEL 36:17

“Huañujlla aichayuj runalla, israelcunaca, quilla ungüihuan mapayashca huarmi shinami paicunapaj llajtapica, millaita rurashpa causarcacuna. Chashnami mapa tucurcacuna.

OSEAS 9:3

Mandaj Diospaj llajtapica mana saquiringacunachu. Ashtahuanpish Efrainca Egiptoman, Asiriamanmi tigranga. Chaipica mapa micunatami micunga.

MIQUEAS 2:10

Caipica mapahuan junda cashcamantaca, mana samarinachu canguichij. Caimantaca jatarishpa richijlla.

NÚMEROS 13:27

Paicunaca cashnapishmi nircacuna: –Ñucanchijca cancuna cachashca llajtamanmi chayarcanchij. Chaipica lechepish, sacha chuspipaj mishquipish yacu llujshicuj shinatajmari cashca. Chaipi p'ucushca granocunapish caicunamari.

DEUTERONOMIO 21:23

chai huañuchishca cuerpotaca caspipi huarcushca pacarichunca ama saquinguichijchu. Huarcushca huañuj runaca Taita Dios mana alli nishca cashcamanta chai punllallatajmi pambana canguichij. Chashna rurashpami Mandaj Dios cancunapaj Taita Dios cancunapaj cachun cushca llajtataca mana mapayachinguichij.

DEUTERONOMIO 32:9

Chaimantami Mandaj Diosca paipajlla agllashcacunata rurarca. Jacobca pai munashcami carca.

DEUTERONOMIO 6:18

Cancunapaj ñaupa yayacunaman Mandaj Dios cushami nishca llajtaman alli chayagrinapajca, Mandaj Diospaj ñaupajpica imata mana pandashpa allitami rurana canguichij.