JEREMÍAS 2:15 - Dios Rimashca Shimicunami

¹⁵ Malta leoncunamari huacarishpa shamurcacuna. Paicunata llaquichingapaj huacarishpa shamushpamari, chushaj llajtata saquincuna. Tucui pueblocunatamari rupachishpa, shujllapish chaipi causachun mana saquincuna.

JEREMÍAS 2:15 Iomraidhean Croise

JOB 4:10

Huacaricuj leonpish, p'iña leonpish, huahua leoncunapish quirucunamari p'aquirishcacuna.

SALMOS 57:4

Ñuca causaica leoncunapaj chaupipimari. Lunyacuj ninata shimiman shitacujcunapaj chaupipimari siricuni. Paicunapaj quirucunaca lanzacuna shina, puntajlla caspicuna shinami. Paicunapaj c'alluca filosapa espada shinami.

ISAÍAS 1:7

Cancunapaj allpapish tucuchishca ima illajmari saquirishca. Pueblocunapish ninahuan rupachishcamari. Cancunapaj allpapi p'ucushcacunatapish caru llajtamanta cajcunamari micushcacuna. Cancunapaj ñaupajllapitajmi micushcacuna. Mana rijsishcacunamari shitashca pambata saquishcacuna.

ISAÍAS 24:1

Riquichij, Mandaj Diosca tucui cai pachatamari ñutushpa chushajta saquigrin. Tucui cai pachapi causajcunataca urata janajtami cachanga. Tucuita anchuchishpami chushajta saquinga.

ISAÍAS 5:29

Paicunaca jatun león huacaricuj shinami caparingacuna. Paicunaca uchilla leoncuna shinami caparingacuna. Ima animalta alli amullishpa apaj shinami apangacuna. Pi mana quichuipajtami apangacuna. Pi mana quichungachu.

ISAÍAS 5:9

Achca huasicunami urmachishca saquiringa. Sumaj jatun huasicuna cashca cashpapish shitashcami saquiringa nishpa tucuita Mandaj Dios nishcami ñuca rinrinman uyarirca.

ISAÍAS 6:11

Chaimi ñucaca: “Jatun Dios ¿maicamataj chashna cangari?” nircani. Shina nijpi paica: “Pueblocunapish urmachishca cangacama. Chaipi causajcunapish mana tiyangacama. Huasicunapipish pi mana causaj tiyangacama, allpapish shitashca pamba saquiringacamami chashna canga.

JEREMÍAS 10:22

Judá llajtapi caj tucui pueblocunata shitashcata saquingapajmari, janaj llajtamantaca caparirishpa shamuncuna. Chacal animalcuna causanatamari rurangacuna– nircanimi.

JEREMÍAS 25:30

Tucui paicunapaj llaqui shamunata cashna huillangui: Mandaj Diosca jahuamantami c'ulun nishpa uyaringa. Jucha illaj Diosca, pai causana huasimantami sinchita rimanga. Paipaj cashcamantami cai llajtataca p'iñarishpa caparinga. Tucui cai pachapi causajcunatami uvata sarujcuna cantanata cantaihuan llaquichinga.

JEREMÍAS 25:9

Chaimanta cunanca tucui janaj lado llajtacunapi causaj ch'ican ch'ican aillucunatapish, Babilonia llajtata jatun mandaj ñucata servij Nabucodonosortapishmi caiman pushamugrini. Paitami cai llajtapi causajcunatapish, cai muyundij tucui llajtacunatapish llaquichishpa tucuchichun churagrini. Chashna huiñaipaj shitashcata saquishpami, chanzata rurashpa asinata rurasha. Ñuca Mandaj Diostajmi chashna nini.

JEREMÍAS 26:9

¿Imamantataj canca: Cai huasica Silo shinami saquiringa, cai pueblopish tucui urmachishcami canga. Shujllapish causangapaj mana saquiringachu nishpa, Mandaj Diospaj shutipi huillanguiyari?” nircacunami. Mandaj Diospaj huasipica, tucuicuna chashna nishpami, Jeremiasta huañuchishun nicurcacuna.

JEREMÍAS 33:10

Mandaj Diosca cashnapishmi nin: “Cancunaca cai Jerusalén pueblotapish, Judá llajtapi caj caishuj pueblocunatapish: Shuj runallapish, animalcunallapish illaj, shitashcami saquirin ninguichijmi. Tucui pueblo callecunaca cancuna nishca shina runacunapish, animalcunapish illaj shitashcamari saquirin.

JEREMÍAS 34:22

Cunan rishca cajpipish, ñucallatajmi cutin cai puebloman tigrachimusha. Paimi cancunahuan macanacushpa mishanga, cai pueblotaca ninahuanmi tucui rupachinga. Chashna rurashpami, cai Judá llajta pueblocunataca shuj runallatapish mana saquishpa, shitashca, chushajta saquisha ninmi Mandaj Diosca” nircami.

JEREMÍAS 4:7

Leonmari sachamanta llujshimucun. Llajtacunata tucuchijmari caiman shamungapaj ñanpi yaicushca. Cancunapaj llajtata tucuchingapajmari pai tiyanamanta llujshimushca. Cancunapaj tucui pueblocunamari shuj runallapish illaj, shitashca saquiringa” ninmi.

JEREMÍAS 44:22

Ashtahuanpish Mandaj Diosca cancuna yallitaj millaita rurajpimi, cancunata ña manataj chari tucurca. Chai millananacunata rurashpa causajpimari, ña manataj ricusha nirca. Chaimantami cancunapaj llajtataca tucui ima tiyashcata tucuchishpa, jatun mancharinata rurarca. Chaimantami chai llajtaca, cunan punllacunacama Dios mana alli nishpa shitashca, shuj runallapish illaj siricun.

JEREMÍAS 5:6

Chashna cashcamantaca, sachamanta león llujshishpa huañuchingatajmi. Shitashca pambapi causaj atuj shamushpa tucuchingatajmi. Leopardomari paicunapaj pueblo muyundijta chapanga. Maijanpish pueblomanta llujshijpica, japishcahuan micungallami. Paicunallataj Diosta yallitaj mana cazushpa, paimanta ashtahuan ashtahuan caruyashcamantamari chai llaquica japinga.

JEREMÍAS 50:17

Israelcunaca, leoncuna catijpi chingarishca ovejacuna shinami. Puntaca Asiria llajtata jatun mandajmi micurca. Pai saquishcacunataca, Babilonia llajtata jatun mandaj Nabucodonosormi tucui tullucunata p'aquishpa micurca.

JEREMÍAS 51:38

Jatun leoncuna huacaricuj shina tucuicunami capariringacuna. León huacaricuj shina purincuna. Huacaricuj malta leoncuna huacaricuj shinami puringacuna.

JEREMÍAS 6:8

Jerusalenpi causajcunalla, alli tucuichigari. Chashna alli tucujpica, mana p'iñarishpa cancunamanta anchurishachu. Cai llajtapish mana chaquishca, shitashca pamba saquiringachu” ninmi.

JEREMÍAS 9:10

Urcucunapimi caparishpa huacasha. Chaquishca pambacunapipishmi huacagrisha. Cunanca chai michina pambacunataca, maijan purishpallapish mana ricurinca, huagracuna huacashcapish mana uyarinchu. Sacha animalcunapish, huairata purij pajarocunapishmari mancharishpa maitatajshi rishcacuna.

JEREMÍAS 9:11

Jerusalén pueblotaca rumi montonllatami saquisha. Judá llajtapi caj tucui caishuj pueblocunatapish chacal nishca animalcuna causanallatami rurasha. Shuj runallapish mana chaipi causangapaj saquiringachu.

EZEQUIEL 36:3

Shina cajpipish cashna nishpa huillai: Mandaj Jatun Diosca cashnami nin: Cancunataca llaquinayajtami saquircacuna, shujtaj llajtacunamanta shamujcunami japishpa millpurcacuna. Cancunaca chanzata rurashpa, rimashpa asijcunapaj maquipimi urmarcanguichij.

EZEQUIEL 5:14

Ñucami cantaca llaquinayajta llaquichishpa, cambaj muyundij llajtacunapi causajcunapish, caita purijcunapish chanzata rurashpa asina cachun rurasha.

OSEAS 11:10

Paicunaca Mandaj Dios yuyaillami paita catingacuna. Taita Dios rimashcaca león huacacuj shinami uyaringa. Pai chashna rimashcata uyashpami, paipaj huahuacunaca inti huashicun llajtacunamanta manchaihuan shamungacuna.

OSEAS 5:14

Efrainpajca ñucaca jatun león shinami casha. Judapajca huahua león shinami casha. Paicunataca ñucatajmi mirga mirgata rurasha. Chai q'uipaca rishallami. Paicunata chashna ruracujpica, pi mana quishpichi tucungachu.

AMÓS 3:12

Mandaj Diosca cashnapishmi nin: “Samaria pueblopi causaj israelcunaca ñutujlla tiyanacunapi, camacunapimi sirishpa cainancuna. Paicunaca leonpaj shimimanta shuj michij, paipaj oveja ishqui chaquita, mana cashpaca mirga rinrinllata quichushca shinallami quishpiringacuna” ninmi.

AMÓS 3:4

Leonca sachapica manapish imata japishpaca ¿huacarinmanchu imashi? Huahua leonpish jutcupi manapish ima aichata micucushpaca ¿huacarinmanchu imashi?

AMÓS 3:8

León huacaricujta uyashpaca ¿pitaj mana mancharingari? Mandaj Jatun Dios rimashcata uyashpaca ¿pitaj mana huillangari?

NAHUM 2:11

Jatun leoncuna malta leoncuna causana jutcucunapish, yaya leonpish, mama leonpish, huahua leoncunapish tandalla causana jutcucunapish ¿maitagari? Paicunataca pipish manamari manchachi tucurcacunachu.

SOFONÍAS 1:18

Mandaj Dios jatunta p'iñarishpa llaquichicui punllapica, paicunapaj cullquipish, curipish mana quishpichi tucungachu. Ashtahuanpish Mandaj Diosca jatunta p'iñarishpami, cai pachataca ninahuan tucuita tucuchinga. Cai pachapi causajcunataca, ñapish tucuita tucuchingallami.

SOFONÍAS 2:5

Mama cucha yacu uripi causaj cereteocunaca, ¡aij imachari tucungacuna! “Filisteocuna causan Canaán llajtalla, tucui cancunatami huañuchisha. Shujllatapish causajta mana saquishpami, tucuita chingachichisha.

SOFONÍAS 3:6

“Llajtacunatapish chingachichircanimi, paicunapaj huasicunapish llaquinayajmi tucurca, ñancunatapish pi mana puripaj shitashcatami saquircani. Paicunapaj pueblocunapish pi mana causaipaj llaquinayajmi saquirirca.

ZACARÍAS 11:3

Michijcunapish q'uihuacuna tucui rupashcamantamari, caparirishpa huacacuncuna. Shinallataj leoncunapish Jordán sumaj jatun yacu chaquirishcamantami, caparirishpa huacacuncuna.

JUECES 14:5

Sansonca, paipaj yaya mamandij Timnatman uriyashpami chai pueblo c'uchullapi caj uva chagraman chayarca. Chaipi cajpimi, shuj malta leonca huacarishpa paipajman c'uchuyarca.