JEREMÍAS 18:11 - Dios Rimashca Shimicunami

¹¹ Chashna cashcamantaca cunanca tucui Judá runacunatapish, Jerusalenpi causajcunatapish cashna ni: Mandaj Diosca cashnami nin: Ñucaca cancunata llaquichinatamari yuyarircani. Ñamari alli yuyarishcata charicuni. Ama chaita rurachunca, tucuicuna millai causaita saquishpa cutirichigari. Allita rurai callarichigari ninmi nigri” nircami.

JEREMÍAS 18:11 Iomraidhean Croise

2 REYES 17:13

Mandaj Diosca israelcunatapish, Judá llajtapi causajcunatapish, profetacunahuanpish, paillataj ricuchishpa huillajta huillachishcahuanpish sinchita rimashpaca: “Cancunapaj millai ñancunata saquishpa ñucapajman cutirichij. Cancunapaj ñaupa yayacunaman ñuca mandashcacunata, pajtachinguitaj nishcacunata ñucapajta ruraj profetacunaman huillachishcacunata ima shina mandashca shinataj tucuita pajtachichij” nircami.

JEREMÍAS 35:15

Ñucata servij ñuca ima nishcata huillajcunataca, ñaupamantapacha cunancama huashan huashan cachashpa huillachicunillami. Chai tucui huillajcunahuanmi: Tucuicuna cancunapaj millai causaita saquishpa, ñucaman cutirichij. Mana allita ruranata saquichij. Ña ama chai shujtajcunapaj dioscunapajman rishpa cungurichijchu, ama chaicunata servichijchu. Tucui chaicunata saquishpaca cancunapaj yayacunamanpish, cancunamanpish ñuca cushca cai llajtapi causanguichijmi nishpa huillachircani. Shina cajpipish, cancunaca manataj uyanguichijchu, manataj cazunguichijchu.

JEREMÍAS 7:3

Tucuita Mandaj, can israelcunapaj Diosca cashnami nin: Cancunapaj causaita allichishpa, allita ruraichigari. Chashna allichirijpica, cancunataca cai llajtapi causachun saquishami.

JEREMÍAS 25:5

Paicunataca cancunamanca cashnami huillachij carca: Millai causaita, millai ruranacunata saquishpa ñucaman cutirichij. Chashna cutirishpaca cancunapaj ñaupa yayacunamanpish, cancunamanpish ñuca cushca cai llajtapica huiñaita causacunguichijllami.

Santiago 5:1

¡Achcata charijcuna, uyaichij! Cancunata llaquicuna japina cashcamanta huacaichij, caparichij.

Hechos 26:20

Chaimi Damascopi huillai callarishpaca, Jerusalenpipish, tucui Judeapipish huillarcani. Chai q'uipaca mana judiocunamanpishmimana allita ruracushcata saquishpa Taita Diosman cutirichij nishpa huillarcani. Taita Diosman cutirishcata ricuchingapajca allicunata ruraichij nircanimi.

ZACARÍAS 1:3

Chaimanta paicunataca cashna ni: Tucuita Mandaj Diosca cashnami nin: Ñucapajman cutirichigari, ñucapish cancunapajman tigrashami ninmi tucuita Mandaj Diosca.

MIQUEAS 2:3

Chashna llaquichijcunataca, Mandaj Diosca cashnami nin: “Ñucapish cancuna millaita rurashcamantaca llaquichishami. Cancunaca chai llaquicunamantaca, shujllapish manataj quishpiringuichijchu. Ña mana ashtahuan jatun tucushpa puringuichijchu. Chai punllaca jatun llaquimi canga” ninmi.

ISAÍAS 5:5

Cunanca ñuca uva chagrata imata ruragrishcatami ricuchigrini. Muyundij pircatami anchuchigrini. Tucui tucuchishcami canga. Tucui pircata anchuchishca cajpica, pipish sarushcami canga.

Santiago 4:13

“Cunan cashpa, caya cashpapish cai puebloman, chai puebloman rishunchij. Chaipi shuj huatata cangapaj. Randishpa, c'atushpa cullquita mirachingapaj” nijcuna ¡uyaichij!

EZEQUIEL 18:23

Ñucaca ñucata mana manchaj runa huañuchunca, mana munanichu. Mandaj Jatun Diostajmi chashna nini. Paica millaita ruranata saquishpaca ¿maitataj mana causangari?

EZEQUIEL 13:22

Cancunaca chashna llullashpallami, cashcata rurajtaca llaquichircanguichij. Paitaca ñucaca manamari llaquichircanichu. Shinallataj cancunaca ñucata mana manchajcunamanmi, ashtahuan millaita rurachun yuyaicunata curcanguichij.

JEREMÍAS 51:11

Mandaj Diosca Babilonia llajtataca, paipaj huasita urmachishcamantamari, jatunta llaquichisha nishca. Chaimantamari Media llajtata jatun mandajcunataca, Babiloniata llaquichina yuyaita cushca. Media soldadocunalla, puntajlla caspicunata alli p'ichaichigari, escudocunatapish rigrapi aparichigari.

JEREMÍAS 36:7

Mandaj Dios jatunta p'iñarishpa paicunata chashna mancharinata llaquichisha nicujta uyashpaca, Mandaj Dios uyana shinata tucui shunguhuan mañangacunapishchari. Paicunapaj millai causaitapish saquishpa cutiringacunapishchari” nircami.

JEREMÍAS 36:3

Cai Judá runacunaca, ñuca ima shinalla llaquichisha nishcata uyashpallapish, llaquirishpa paicunapaj millai causaita saquishpa ñucaman cutiringacunapishchari. Cutirijpica, ñucapish paicuna imalla mana allita rurashca juchacunataca, tucuimi perdonasha” nircami.

JEREMÍAS 26:13

Chashna cashcamantaca, cancunata Mandaj Dios rimashcata cazuichij. Millai causaita, millaita ruracushcata saquishpa, ña allichirichij. Chashna rurajpica, pai Mandaj Diosca cancunata ima shinalla llaquichisha nicushcata jarcarishpa, mana llaquichingachu.

JEREMÍAS 26:3

Can huillashcata cazushpa, tucuicuna paicunapaj millai causaita saquingacunapishchari. Paicuna allichirijpica, millaita rurashcamanta ima shinalla llaquichisha nicushcataca jarcarishami.

JEREMÍAS 18:18

Jeremías huillashcata uyashpaca, cashnami ninacurcacuna: “Shamuichij, Jeremiasta huañuchinata yuyarinacushunchij. Mandashcacunata ñucanchijman yachachichunpish curacunaca mana illanchu. Alli yuyaita cungapajpish, yachajcuna mana illanchu. Dios ima nishcata huillajcunapish mana illangachu. Juchachishpa huañuipi churashunchij. Pai huillashcataca imata mana uyashunchijchu” nircacunami.

JEREMÍAS 11:19

Ñucataca: “Cai runataca alli granota aparishca yurata urmachij shina huañuchishunchij. Cai pachapi causajcunapuramanta anchuchishunchij. Chashna rurajpica, paitaca pi mana ashtahuan yuyaringachu” ninacushcami carca. Ashtahuanpish ñucaca huañuchinaman apacushca malta c'ari oveja shina, imata mana yachashcachu carcani.

JEREMÍAS 4:23

Cai llajtata ricujpica, chushaj allpallami ricurirca. Jahua pachata ricujpipish, amsallami carca. Ima achijyachij mana ricurircachu.

JEREMÍAS 4:6

Sión pueblopi miticunaman callpamuchun banderata alzaichigari. Janaj llajtamantamari jatun llaquita cachagrini, ama uniyaichijchu. Chaica cancunataca tucuchingamari.

JEREMÍAS 3:22

Mana cazuj huahuacuna, ñucapajman tigrarichigari. Cancuna tigrarijpica ñucata mana cazushcamanta, llaqui tucushcataca alliyachishallami” ninmi. “Canca ñucanchijta Mandaj Diosmari cangui, chaimanta cunanca ñami cambajman tigramunchij.

JEREMÍAS 3:1

Maijanpish: Shuj runa paipaj huarmita shitajpi, chai huarmi ch'icanyashpa shujtaj c'arihuan apanacushpa causajpica, ¿punta cusaca chai huarmihuan cutin tandanacui tucunchu? ¿Manachu cutin tandanacujpica, tucui llajtatami mapayachin nincuna? Cancarin mashnatajshi c'aricunahuanmari c'uyanacushpa huainayashcangui. Shina cajpipish, cantaca ñucaman tigrai ninimi. Mandaj Diostajmi chashna nini.

2 REYES 22:13

–Ñucatapish, Jerusalenpi causajcunatapish, tucui Judá llajtapi causajcunatapish Diospaj huasipi japishca cai libropi tiyacuj shimicunamanta Mandaj Dios imata nijta tapugrichij. Ñucanchij ñaupa yayacunaca, Mandaj Dios cushca cai shimicuna imallata nicushcatamari manataj uyashpa manataj cazushcacuna. Chashna rurashcamantaca, Mandaj Diosca ñucanchijhuanca nina sindirij shinami yallitaj p'iñarishca– nircami.

2 REYES 5:5

Shina nijpi Siria llajtata jatun mandajca: –Shinashpaca, chaiman rilla. Ñucatajmi Israel llajtata jatun mandajpaj shuj quillcata cachasha– nijpimi Naamanca chunga talento cullquita, 6.000 mirga curita, chunga mudai churanacunata,

GÉNESIS 11:7

Cunanca caishuj chaishuj imata rimacushcatapish ama entendichun paicunapaj rimaitaca ch'ican ch'icanta rurashun” nirca.

ISAÍAS 57:1

“Cashcata ruraj runa huañujpica, pipaj ima mana cashca shina saquirinllami. Dios yuyailla cajcunataca, cashcata ruraj cashcamanta llaquita ama ricuchun apashca cashcataca pi mana yuyanchu.

JEREMÍAS 4:1

Mandaj Diosca cashnami nin: “Israelcunalla, ñucapajman tigrarishpaca, shungumantataj cutiringuichij. Ñuca ñaupajmantaca, cancuna rurashca millanana dioscunata anchuchichij. Ña ama ashtahuan caiman chaiman callpacuichijllachu.

JEREMÍAS 11:11

Chaimantami pai Mandaj Diostaj cashnapish nin: “Cunanca paicunapajca mana llujshi tucuipaj jatun llaquitami apamugrini. Chai llaquita apacushpa ñucata mañajpipish, manataj uyashachu.

JEREMÍAS 25:2

Chai shimicunataca, Dios ima nishcata huillaj Jeremiasca tucui Judá runacunamanpish, Jerusalenpi causajcunamanpish cashna nishpami huillarca:

JONÁS 3:8

Ashtahuanpish gentecunapish, animalcunapish cañamazuta churarishpa, sinchita Taita Diosta caparishpa mañanguichij. Tucuicunallataj ima laya millaita ruraj cashca cashpapish, chaita saquishpa cutirichij. Huañuchijcuna cashpapish, chaita saquinguichij.

1 REYES 22:23

Mandaj Diosmi cambaj tucui profetacunapaj shimiman llullachij espíritu richun saquirca. Mandaj Diosllatajmi can llaqui tucuchunpish nirca– nircami.

JEREMÍAS 4:14

Jerusalenpi causajcunalla, ¿maicamataj millaita rurana yuyailla canguichigari? Cancunata quishpichichun nishpaca, shungumanta tucui millai yuyaita maillarichigari.

JEREMÍAS 19:3

Cashna ningui: Judá llajtata jatun mandajcunapish, Jerusalenpi causajcunapish Mandaj Dios rimashcata uyaichigari. Tucuita Mandaj, can israelcunapaj Diosca cashnami nin: Cai llajtamanca jatun llaquitami cachagrini. Chai llaquita uyajcunaca, rinrinta nanachingacunami.

JEREMÍAS 19:15

“Tucuita Mandaj, can israelcunapaj Diosca cashnami nin: Ñucaca cai pueblopajpish, tucui caishuj pueblocunapajpish jatun llaquitami apamusha nircanimi. Ñami chai llaquitaca apamugrini. Chai pueblocunapi causajcuna rumi shungu tucushpa, ñuca imata rimajpipish manataj uyashcamantami, chashna llaquichigrini ninmi” nircami.