JEREMÍAS 17:6 - Dios Rimashca Shimicunami

⁶ Paicunaca shitashca pambapi retama yura huiñaj shinallami causangacuna. Tucui causaipi ima allicunata mana chasquingacunachu. Pi mana nishpa shitashca, chaquishca allpacunallapimi causangacuna.

JEREMÍAS 17:6 Iomraidhean Croise

2 REYES 7:2

Chaimi jatun mandajpaj alli maqui shina runaca, Diospaj runataca: –Mandaj Dios jahua pacha ventanacunata pascajpipish, mana can nishca shinatajca tucuipajchu yuyachin– nijpi Eliseoca: –Ñuca nishca shina tucujta cambaj quiquin ñahuihuan ricushpapish, chaitaca mana micunguichu– nirca.

JOB 20:17

Uchilla yacucunatapish, jatun yacucunatapish, jatun yacucuna shina llujshicuj mishquitapish, lechetapish mana ashtahuan ricungachu.

JOB 39:6

Ñucami paimanca pi mana causanapi causachun churarcani. Chaimantami paica shitashca pambacunapi causan.

SALMOS 1:4

Ashtahuanpish millaicunaca mana chashnachu, paicunaca huaira apana t'amo shinallami.

SALMOS 107:34

Alli granota p'ucuj allpacunatapish mana p'ucuj cachi allpata ruranllami. Chaipi causajcuna millaicuna cajpimi chashna ruran.

SALMOS 92:7

Diosta mana rijsijcunaca q'uihua shina yallitaj huiñashpapish huiñaipaj chingachishca canapajllami. Millaita tucui rurajcunaca mana jahualla sumajtami sisan. Ashtahuanpish huiñaipaj chingachishca canapajllamari.

ISAÍAS 1:30

Cancunaca encina yura p'anga illaj tucuj shinami tucunguichij. Yacu illajlla huerta shinami tucunguichij.

JEREMÍAS 29:32

Chashna rurashcamantaca, Mandaj Diostajmi cashna nini: Chai Nehelammanta caj Semaías runataca, paipaj huahuacunandijmi llaquichigrini. Paica ñuca runacunapurapica, paipaj huahua huahuacunaca mana causangachu. Ñuca runacunapaj ñuca ima allita rurajtaca, paipish mana ricungachu. Paimari, paicunamanca ñucata c'ariyana yuyaita curca ninmi Mandaj Diosca nishpa quillcai” nircami.

JEREMÍAS 48:6

Miticunaman callpaichigari, callpai tucujcunallapish quishpirichigari. Shitashca pambacunapi retama yura shinallapish causagrichigari.

EZEQUIEL 47:11

Guzu yacucunapish, uchilla cucha yacucunapish mana mishqui yacucunachu canga. Ashtahuanpish cachi yacucunallami canga.

SOFONÍAS 2:9

Ñucaca causacunimi ninmi tucuita Mandaj, israelcunapaj Taita Diosca. Chaimanta Moab llajtaca, Sodoma pueblo shinami saquiringa. Amón llajtaca, Gomorra pueblo shinami saquiringa. Chai llajtacunapica chinicunami huiñanga, cachillami tucunga. Chashnami huiñaita shitashca saquiringa. Ñuca agllashcacunapuramanta saquirishcacunami paicuna imalla charishcacunatapish quichungacuna, allpacunatapish paicunapaj cachunmi japingacuna” ninmi.

DEUTERONOMIO 29:23

Tucui cai llajtaca azufrehuan cachihuan rupachishca llajtami. Chaimanta imata mana tarpuipajmi, ima mana p'ucuipajmi, cai allpapica ima q'uihuapish mana huiñaipajmi. Sodomata, Gomorrata, Admata, Zeboimta tucuchij shinallatajmi, Mandaj Diosca nina sindirij shina yallitaj p'iñarishpa cai llajtatapish llaquichishca” ningacunami.

JUECES 9:45

Abimelecca chaipi causajcunahuan tucui punlla macanacushpami misharca. Chai pueblopi causajcunata huañuchishpaca, pueblotapish tucui chingachishpami chaipica cachita tarpurca.