JEREMÍAS 16:4 - Dios Rimashca Shimicunami

⁴ Mancharina ungüicunahuanmi huañungacuna. Paicunamantaca pi mana huacangachu, mana pambangacunallapishchu. Majada shinallami allpa jahuapi shitashca siringacuna. Shinallataj espadahuanpish, yaricaihuanpishmi huañungacuna. Paicunapaj aichacunaca huairata purij pajarocunapaj, sacha animalcunapaj micunami canga” nircami.

JEREMÍAS 16:4 Iomraidhean Croise

2 REYES 9:10

Jezabeltaca Jezreel pambapimi allcucuna micunga, paita pambajca pi mana tiyangachu ninmi– nishpaca, profetaca punguta pascashcahuanmi callparca.

SALMOS 78:64

Paicunapaj curacunapish espadapimi huañurcacuna. Paicunapaj viuda huarmicunapish mana huacai tucurcacunachu.

SALMOS 83:10

Paicunaca Endor pueblopimi chingarircacuna. Allpapaj majada tucushpamari saquirircacuna.

ISAÍAS 18:6

Chai tucui ramacunataca urcucunapi tiyaj alasyuj animalcunapajmi saquingacuna. Allpapi tiyaj sacha animalcunapajmi saquingacuna. Chaipica pajarocunaca tucui usya punllacunatami micunata charingacuna. Sacha animalcunapish tucui tamya punllacunatami chaipi micunata charingacuna.

ISAÍAS 5:25

Mana cazushcamantaca Mandaj Diosca, pai agllashcacunahuanca nina sindirij shinami yallitaj p'iñarirca. Mandaj Diosca paipaj maquita chutashpami chugrichirca. Urcucunapish chujchurcami. Huañushcacunapish chaupi ñancunapimi shitashca saquirircacuna. Chashna llaquichishpapish pai yallitaj p'iñarishcaca manaraj pararircachu. Ashtahuanpish paipaj maquitaca chutaracunrajmi.

JEREMÍAS 19:7

Chai pambapimi Judá llajtapi causajcuna, Jerusalenpi causajcuna imata yuyarinacushcataca chingachisha. Paicunata p'iñashpa huañuchingapaj shamuj runacunapaj maquipi churashpami, espadahuan huañuchichisha. Chai huañushca aichacunataca huairata purij pajarocunaman, sachapi causaj animalcunamanmi carasha.

JEREMÍAS 21:6

Tucui cai pueblopi causajcunatami jatunta llaquichigrini. Runacunapish, animalcunapish jatun ungüihuanmi huañungacuna.

JEREMÍAS 25:33

Chai punllapica, Mandaj Dios ñuca huañuchishcacunaca, shuj ladomanta caishuj ladocama, tucui cai pachapimi shitashca siricunga. Chai huañushcacunamantaca pi mana huacangachu, pi mana tandashpa pambangallapishchu. Majada shinami allpa jahuapi shitashca saquiringa.

JEREMÍAS 34:17

Cancuna chashna rurashcamantami, Mandaj Diosca cashna nin: “Cancunaca ñucata mana cazushpami, cancunapaj familiacunataca servichicushcamanta mana cacharishpa cachanguichij. Chaimantami ñucapish espadahuan huañuchijcunatapish, jatun yaricaitapish, ungüitapish cancunata llaquichichun cachagrini. Chai jatun llaquihuanmi cancunataca, tucui cai pacha llajtacunapaj chaupipi jatunta pingachigrini. Ñuca, Mandaj Diostajmi chashna nini.

JEREMÍAS 34:20

Paicunata p'iñashpa huañuchishun nicujcunapaj maquipimi churagrini. Paicunapaj huañushca aichacunataca, huairata purij pajarocuna, sacha animalcunami micunga.

JEREMÍAS 36:30

Chashna rurashcamantaca Mandaj Diosca, Judá llajtata jatun mandaj Joacimtaca cashnapishmi nin: Paica Davidpaj jatun tiyanapi tiyashpa mandachun huahuacunata mana charingachu. Pai huañujpipish punlla rupaipi, tuta chiripi sirichun shitangacunallami.

JEREMÍAS 44:12

Ashacunalla saquirishca tucui Judá runacunami cai Egipto llajtaman shamunata munarcacuna. Chashna mana cazushpa caipi causanaman shamushcacunaca tucuicunami cai llajtapica espadapipish, jatun yaricaihuanpish huañushpa tucuringacuna. Jatuncunamanta uchilla huahuacunacamami espadapipish, jatun yaricaihuanpish huañushpa tucuringacuna. Saquirijcunaca tucui ricujcunapajmi millananapish, mancharinapish, shujtajcunatapish paicuna shina tucushca alli canman ninapish, chanzata rurashpa asinapish cangacuna.

JEREMÍAS 44:27

Ñuca paicunapaj ima allita ruranapaj randica, jatun llaquita rurangapajmi paicunataca chaparacuni. Cai Egipto llajtapi caj Judá runacunaca tucuicunami espadahuanpish, yaricaihuanpish chingachishca cangacuna.

JEREMÍAS 7:33

Cai runacuna huañushca aichacunataca pi mana pambaipaj tiyajpimi, huairata purij pajarocuna, sacha animalcuna micunga. Chai animalcunata manchachijllapish, pi mana tiyangachu.

JEREMÍAS 9:22

Cashnapish ningui: “Mandaj Diosca cashnami nin: Huañushcacunaca majada shinami pambacunapi shitashca saquiringa. Trigota cuchushpa, gavillashpa saquijpi mana tandashca shinami ricuringa ninmi ningui” nircami.

LAMENTACIONES 4:9

Allpapi p'ucuj ima grano illashcamantami, yaricaihuan allimanta chaquishpa huañurcacuna. Espadapi huañujcunarajmi, mana paicuna shina llaquita aparcacuna.

EZEQUIEL 24:21

“Tucui israelcunata cashna ningui: Mandaj Jatun Diosca cashnami nin: Riquichij, sumaj cashcata ricuchij ñucapajlla huasitaca chingachishami. Chai huasitaca sumaj cajllapimi, cancunaca ricunata munarcanguichij. Ñuca huasitaca sumaj cashcallamantami munanguichij. Shinallataj cancuna saquishca cancunapaj churicunapish, ushushicunapish espadapimi huañungacuna.

EZEQUIEL 5:12

Cancunapuramanta maijancuna saquirishpaca ungüihuanpish, yaricaihuanpishmi caillapitaj huañungacuna. Caishujcunaca cai muyundijllapitajmi espadapi huañungacuna. Chaishujcunataca caita chaitami cachasha. Paicunataca espadahuanmi catishpa risha.

SOFONÍAS 1:17

“Mandaj Dios ñucata, p'iñachishpa millaita ruraj runacunataca jatuntami llaquichisha. Chaimantami paicunaca ñahui mana ricuj shina musparishpa puringacuna. Paicunapaj yahuarpish allpa shinami jicharinga. Paicunapaj aichapish mapa shinami shitaringa” ninmi.

DEUTERONOMIO 28:22

Mandaj Diosca mana jambipaj ungüita, fiebreta, chuputa, rupari ungüitami cachanga. Shinallataj mana tamyachishpa cungaimanta llaquicunata cachashpa, granocunata chaquichishpami cancunata chingachingacama llaquichinga.

DEUTERONOMIO 28:26

Cancunapaj huañushca aichacunaca tucui angacuna, sacha animalcuna micunapajmi canga. Chaicunata manchachishpa catijca pi mana tiyangachu.