JEREMÍAS 16:16 - Dios Rimashca Shimicunami

¹⁶ Mandaj Diosca cashnapishmi nin: “Cunanca chalhuata japij achca runacunatami cachagrini. Paicunami Judá runacunataca, chalhuata japij shina japingacuna. Chai q'uipaca, sacha animalcunata japijcunatami cachagrini. Paicunami Judá runacunataca tucui urcucunamanta, lomacunamanta, c'aca ucu jutcucunamantapish sacha animalcunata shina japingacuna.

JEREMÍAS 16:16 Iomraidhean Croise

GÉNESIS 10:9

Nimrodca Mandaj Diospaj ñaupajpica, animalcunata japishpa huañuchij c'ari c'ari runami carca. Chaimantami: “Nimrod shina animalcunata japishpa huañuchij c'ari c'ari runa Mandaj Diospaj ñaupajpica caichigari” nincuna.

ISAÍAS 2:21

Allpapi causajcunata Mandaj Dios llaquichingapaj achij nicuj ricurijpica, paita manchashcamantami peña chijtarishcacunapi satiringacuna. Peña jutcucunapi yaicuringacuna.

ISAÍAS 7:19

Chaicuna shamushpaca, shitashca pugru pambacunapi, jatun rumi ucucunapi, casha yuracunapi, tucui yuracunapi causangapajmi tucuicuna tiyaringacuna.

JEREMÍAS 25:9

Chaimanta cunanca tucui janaj lado llajtacunapi causaj ch'ican ch'ican aillucunatapish, Babilonia llajtata jatun mandaj ñucata servij Nabucodonosortapishmi caiman pushamugrini. Paitami cai llajtapi causajcunatapish, cai muyundij tucui llajtacunatapish llaquichishpa tucuchichun churagrini. Chashna huiñaipaj shitashcata saquishpami, chanzata rurashpa asinata rurasha. Ñuca Mandaj Diostajmi chashna nini.

JEREMÍAS 4:29

Caballocunapi tiyarishca soldadocunapish, puntajlla caspicunata shitajcunapish manchanayajta c'ulun nishpa shamujta uyashpami, pueblopi causajcunaca tucuicuna llujshishpa jatun sachacunapi, c'aca jahuacunapi miticugrircacuna. Tucui pueblocunamanta chashna llujshishpami, shujllapish mana saquirishpa shitashcata saquircacuna.

JEREMÍAS 49:5

Tucuita Mandaj, Jatun Diosca cashnapishmi nin: “Ñucamari cancunapaj tucui muyundijllamantataj cancunata manchachijta pushamugrini. Chaipica tucuicunami caita chaita callpanguichij. Chashna llujshishpa rijcunata cutin tandachijllapish mana tiyangachu.

JEREMÍAS 6:9

Tucuita Mandaj Diosca cashnapishmi nirca: “Saquirij israelcunatapish uvata tandashca q'uipa saquirishca uvata cutin pallanaman tigraj shinami apangacuna. Uvata pallaj shina cambaj maquicunahuanca tucuita pallayari” nijpimi, ñucaca:

LAMENTACIONES 4:18

Ñucanchij pueblo ñancunata ama ashtahuan purichunmi, ñucanchijtaca japingacamataj chapashpa catircacuna. Ñucanchijca chaicamalla causana cashcamantami, ñucanchij tucurina punlla pajtashca carca.

LAMENTACIONES 4:19

Ñucanchijta japingapaj catijcunaca, huairata purij aguilacunatapish yalli utca callpajcunami carca. Urcucunata catishpami japircacuna, shitashca pambapipish muyundijta jarcashpami japircacuna.

OSEAS 10:10

Paicunata ñuca llaquichinalla tucujpica, shujtaj llajtacunami tandanacushpa jataringacuna. Paicuna yallitaj millaita rurashcamantaca cashnami llaquichishca canga.

AMÓS 4:2

Ima jucha illaj Mandaj Jatun Diosca, mana llullashpami cashna nin: “Cancunata llaquichina punlla chayamujpica, cancunataca ganchocunahuanmi aisashpa ringacuna. Cancunapaj huahua huahuacunataca, chalhuata japina anzuelohuanmi japingacuna.

AMÓS 5:19

Chai llaqui punllapica, leonta miticunaman callpacushpapish, osohuanmi tupanga. Huasipi miticugrishpaca, pata quinripi huancarijpica, culebrami ñapish caninga.

MIQUEAS 7:2

Cai pachata llaquijmari illarca. Cai pachapi causaj runacunamantaca allita rurajca, shujllapish manamari tiyanchu. Tucuicunami huañuchijcuna tucushca. Paicunapurallataj urmachinacungapajmi linchitapish rurancuna.

SOFONÍAS 1:12

Chai punllapica luzta japichishpami, Jerusalén pueblopi causajcuna imalla rurashcataca ricusha. Siquiyashca vino shina imata mana manchashpa causacuj runacunatapish llaquichishami. Paicunaca shungu ucullapica: Mandaj Diosca allitapish, mana allitapish mana rurangachu nincunami.

1 SAMUEL 24:11

Riqui, ñuca yayito. Cambaj jahua churana mirgata p'itishcata ñuca maquipi charicujta ricuyari. Ñucaca canta mana huañuchina yuyaihuan cashpami, canta mana huañuchishpa cambaj jahua churana mirgallata p'itircani. Chaita ricushpaca, canta ima mana allita ruranapish, canta huashalla imata ruranapish, canta llaquichishpa juchallina yuyaipish ñucapica mana tiyashcata ricuyari. Ashtahuanpish canmari ñucata japishpa huañuchina yuyai puricungui.

1 SAMUEL 26:20

Mandaj Diospaj ñaupajmanta paipaj allpamanta carupi ñuca yahuar jicharichunca mana munanichu. Ashtahuanpish israelcunata jatun mandajmari ñucataca piquita maijan mashcacuj shina, urcucunapi yututa mashcacuj shina llaquichingapaj catishpa puricun– nircami.