JEREMÍAS 15:6 - Dios Rimashca Shimicunami

⁶ Shinallataj Mandaj Diosca cashnami nin: “Cancunamari ñucata shitashpa, huashata ricuchircanguichij. Chaimantami cunanca ñuca maquihuan huajtashpa tucuchigrini. Ña manataj llaquishpa ashtahuan charicushalla ninichu.

JEREMÍAS 15:6 Iomraidhean Croise

ISAÍAS 1:4

¡Aij, juchasapa gentecunalla. Yallitaj millaita aparishcacunalla. Millaicunapaj huahua huahuacuna. Yallitaj millaita rurana yuyailla cajcuna! Mandaj Diostamari saquircacuna. Huashamanmari tigrarishcacuna. Israelpaj jucha illaj Diostamari jatunta p'iñachishcanguichij.

ISAÍAS 28:13

Chaimantami Mandaj Diosca paicunamanca chai mandashcacunallatataj cutin cutin yachachinga. Ña mandashcallatatajmi cutin cutin mandanga. Shuj filapi quillcashcallatatajmi cutin cutin yachachinga. Chai filallatatajmi cutin cutin yachachinga. Ashataca caipi ashataca chaipimi yachachinga. Paicuna ñaupajman ricunchij yuyashcapish allajman urmangacama, jatun llaqui tucungacama, prezu japishpa huatangacamami chashna rimacungalla.

ISAÍAS 31:3

Egipciocunaca mana Dioschu, gentecunallami. Paicunapaj caballocunapish aichayuj animalcunallami, mana espirituchu. Llaquichingapaj Mandaj Dios paipaj maquita chutajpica, mitsajcunapish urmangami. Mitsachun mañajcunapish urmangami. Tucuicunami shuj cutintaj chingaringacuna.

JEREMÍAS 1:16

Cai tucui pueblocunapi causajcunatami, paicunallataj ñucata saquishpa millaita rurashcamantaca, chashna llaquichigrini. Paicunaca quiquin maquillahuantaj rurashca dioscunatamari inciensota rupachishpa adorarcacuna.

JEREMÍAS 13:14

Chaimantaca puñucunata paicunapurallatataj tacashpa ñutuj shinami llaquichigrini. Yayacunatapish, huahuacunatapish mana llaquishpami ñacachigrini. Shujllatapish mana perdonashpa, tucuicunatami llaquichisha ninmi ningui” nircami.

JEREMÍAS 2:13

Ñuca agllashcacunaca, ishqui jatun millaitami rurancuna: Puntaca causaita cuj yacu llujshicuj pugyu caj ñucatamari saquincuna. Chaimantaca yacu chaquijlla jutcucunatamari yacupaj rurancuna.

JEREMÍAS 2:17

¿Manachu cancunata Mandaj Dios ñanta pushacujpi, cancuna paimanta anchurishcamanta, cashna llaqui tucunguichij imashi?

JEREMÍAS 2:19

Cancunapaj juchallatajmi llaquichinga. Ñucata mana cazushca juchallatajmari cancunataca llaquipi churanga. Chaipimi cancunaca ñuca cancunata Mandaj Diosmanta anchurinapish, ñucata mana cazunapish, yallitaj mana alli cashcata, llaqui tucuna cashcata yachanguichij. Tucuita Mandaj Jatun Diostajmi chashna nini.

JEREMÍAS 20:9

Ñucaca: “Mandaj Diostaca mana ashtahuan yuyarishpa, paimanta ña ama ashtahuan huillasha” yuyarcanipishmi. Shina cajpipish cambaj shimica ñuca shungupica, tullucama nina rupachij shinami tucurca. Ñuca shungullapi charisha yuyashpapish manataj upajlla saquiri tucurcanichu.

JEREMÍAS 44:22

Ashtahuanpish Mandaj Diosca cancuna yallitaj millaita rurajpimi, cancunata ña manataj chari tucurca. Chai millananacunata rurashpa causajpimari, ña manataj ricusha nirca. Chaimantami cancunapaj llajtataca tucui ima tiyashcata tucuchishpa, jatun mancharinata rurarca. Chaimantami chai llajtaca, cunan punllacunacama Dios mana alli nishpa shitashca, shuj runallapish illaj siricun.

JEREMÍAS 6:11

Mandaj Diosca cashnapishmi nirca: “Chashna mana cazushcamantaca, p'iñarishpa huañucunimi. Caita ricushpa casijlla tiyacunallataca shaicunimi. Cunantajca callecunapi puricuj huahuacunapaj jahuapipish, chairaj runacuna tandanacushcapipish jatun llaquitami talligrini. Cusacunatapish, huarmicunatapish, ña yuyajyacujcunatapish, yallitaj yuyajcunatapishmi prezu cachagrini.

JEREMÍAS 6:12

Paicunapaj huasicunatapish, allpacunatapish, huarmicunatapishmi shujtajcuna japingacuna. Ñucatajmi cai llajtapi causajcunataca llaquichisha. Mandaj Diostajmi chashna nini.

JEREMÍAS 6:19

Tucui cai pachapi causajcunapish uyaichij: Cai runacunapajca jatun llaquitami apamugrini. Paicunallataj ñuca rimashcata mana uyashun nishpa, ñuca mandashcacunata p'iñashpa millaita rurashcamantami, paicuna japina cashcata cugrini.

JEREMÍAS 7:16

Canca cai runacunamantaca ama mañaichu. Ama paicunamantaca caparishpa ñucata mañaichu, ama saquipailla nichu. Paicunamanta mañashcataca mana uyashachu.

JEREMÍAS 7:24

Chashna mandajpica mana cazurcacunachu, mana uyashun nircacunallapishchu. Ashtahuanpish paicuna yuyashca shina causashpami, millai ch'ahuan shungucuna tucurca. Chashna tucushpami, ñaupajman rinapaj randica, huashaman rircacuna.

JEREMÍAS 8:5

Chashna cashcamantaca ¿imamantataj cai Jerusalenpi causajcunaca, huiñaita ñucahuan p'iñarishpa, manataj ñucapajman tigrancunachu imamí?

JEREMÍAS 8:9

Ñuca, Mandaj Diospaj shimita p'iñajcunaca ¿ima jatun yachajcunatagari? Chai yachajcunaca jatunta pingarishpa mancharishpa, upayashpami saquiringacuna.

EZEQUIEL 14:9

Ima tucunata huillajca, umajpi llullangachari. Chashna rurajpica, Mandaj Dios ñucallatajmi imatapish umashpa huillachircani. Paitaca ñuca agllashca israelcuna ricucunpimi chingachisha.

EZEQUIEL 25:7

Chashna rurashcamantami, ñucapish cancunataca llaquichisha. Shinallataj cancuna imalla charishcacunataca, shujtaj llajtacunapi causajcunami quichushpa apangacuna. Cancunataca shujtaj pueblocunapi causacujpipish huañuchishami, shujtaj llajtacunapi causacujpipish chingachishami. Chashnami cancunataca tucuchisha. Chashna rurajpimi ñucataca, Mandaj Diostaj cashcata yachanguichij” nircami.

EZEQUIEL 35:3

Cashna ningui: Mandaj Jatun Diosca cashnami nin: Seir urculla, canhuanca p'iñami cani, cantaca ñuca maquita chutashpami llaquichisha, llaquinayajta shitashcatami saquisha.

OSEAS 11:7

Ñuca agllashcacunaca ñucata c'ariyanapimi rumi shungu tucushcacuna. Ñucataca: “Jahua pacha Taita Dios” nishpapish, pi mana jatunyachinatatajca munancunachu.

OSEAS 13:14

Seolpaj maquimantami quishpichisha. Huañunamantami quishpichisha. Chaipica huañui, ñucami canta huañuchijca cani. Seol canta chingachijca ñucami cani. Llaquij canaca ñuca ñahuimantaca anchunmi nishami.

OSEAS 4:16

Israelcunaca quita vaquilla shinami caruyarcacuna. Chashna cajpica ¿Mandaj Diosca paicunataca malta ovejacunata shina ancho pambapi michingachari?

SOFONÍAS 1:4

“Shinallataj Judá llajtapi causajcunatapish, Jerusalén pueblopi causajcunatapish tucuicunatami ñuca maquita chutashpa llaquichisha. Baalmanta mirga mirga saquirishcacunatapish, paita servij curacunatapish caimantaca tucuitami anchuchisha.

ZACARÍAS 7:11

Chashna nijpipish, mana uyashun nircacunachu. Ashtahuanpish huashata ricuchishpami, mana uyanachishpa rinrinta taparircacuna.