JEREMÍAS 12:3 - Dios Rimashca Shimicunami

³ Mandaj Dioslla, ashtahuanpish ñucaca canta cazunitajmi. Shunguhuantaj chashna cajtaca canllataj ricunguimi, yachanguimi. Paicunataca ovejacunata huañuchinaman apacuj shina llaquiman apaiyari. Huañuchina punllapaj señalashpa chariyari.

JEREMÍAS 12:3 Iomraidhean Croise

2 REYES 20:3

“Mandaj Dioslla, cantami rogani. Cambaj ñaupajpica mana nij tucushpalla tucui shunguhuan can munashcata rurashpa, cambaj ñaupajpi purishcata yuyarichunmi rogani” nishpami Ezequiasca yallitaj huacashpa mañarca.

1 CRÓNICAS 29:17

Ñuca Dioslla, canca ñucanchij shungupi yuyashcataca callarishpami ricucungui. Alli cajllatami munangui, chaitaca yachanimi. Chaimantami ñuca tucui shunguhuan cunata munashcamanta tucui caicunataca canman curcani. Shinallataj cunan caipi tandanacushca can agllashcacunapish mana llaquishpa, tucui shunguhuan cai tucuita canman cujta ricushpaca cushicunimi.

JOB 23:10

Ashtahuanpish paica ñuca causaitaca, tucuitami rijsin. Pai ñucata ima shinapish ricujpica, curi shinami llujshisha.

SALMOS 11:5

Mandaj Diosca allita ruraj cajta, mana allita ruraj cajta ricunrajmi. Millaita ruranata c'uyajtaca p'iñanmi.

SALMOS 139:23

Taita Dioslla, ñucataca alli alli ricuhuailla. Ñuca shungu ima shina cashcata rijsihuailla. Ñuca yuyaicuna ima shina cajta ricuhuayari, rijsihuayari.

SALMOS 17:3

Canmi ñuca shungu ima shina cashcataca alli yachangui. Tutamari ricuj shamungui. Imapi pandarijta ricungapaj saquishpapish ima millaita rurajtaca mana japishcanguichu. Ñuca shimihuanca mana allitaca manataj rimashachu nishcanimi.

SALMOS 26:1

Mandaj Dioslla, ñuca ima shina cashcata ricuhuailla. Ñucaca ima juchachinata mana rurashpami purircani. Caita chaita mana yuyashpami Mandaj Diosllapi shunguta churarcani.

SALMOS 7:9

Diosca cashcata ruraj cashcamanta shungutapish yuyaitapish yachajmi cangui. Millaicunapaj juchacunataca tucuchiyari. Cashcata rurajtaca sinchita shayachiyari.

JEREMÍAS 15:15

Mandaj Dioslla, ñucaca canta c'uyashcamanta, c'amishca causacujtaca canllataj yachanguimi, yuyarishpa ricuj shamuyari. Ñucata p'iñajcunataca llaquichiyari. Ama ashtahuan ashtahuan p'iñashpa shitahuaichu.

JEREMÍAS 17:16

Shina nicujpipish, ñucaca mana paicunata utca llaquichichun mañashcanichu. Paicunapaj jatun llaqui punlla chayamuchunpish mana mañashcanichu. Ñuca imallata nishcataca canllataj yachanguimi. Cambaj ñaupajpimi, imatapish shimi llujshini.

JEREMÍAS 17:18

Ñucata manchachinapaj randica, ñucata p'iñajcunata manchachiyari. Ñucata pingachinapaj randica, paicunata pingachiyari. Paicunapajca jatun llaqui punllata apamuiyari. Yuyarishpa, yuyarishpa llaquichiyari.

JEREMÍAS 20:12

Tucuita Mandaj Dioslla, canca cashcata rurajcunataca ricuracunguimi. Shungucunata, yuyaicunataca callarishpami ricucungui. Chaimantami ñucata mitsachunca canman mingarini. Ñucata mitsashpa paicunataca ñuca ricucujpi llaquichiyari.

JEREMÍAS 48:15

Ñamari Moab llajtaca tucuchishca siricun, tucui pueblocunatamari urmachishcacuna. Huambraraj sinchi runacunataca tucuicunatamari cungata p'itishpa huañuchishcacuna” ninmi Jatun Mandajca, paica tucuita Mandaj Dios shutimi.

JEREMÍAS 50:27

Paipaj tucui soldadocunatapish huagracunata huañuchinaman apaj shina, tucuicunata huañuchichij. ¡Aij chai runacunalla! Paicunata jatunta llaquichina punllamari chayamushca” ninmi.

JEREMÍAS 51:4

Caldeocunaca lanzacunahuan satishcami callecunapi huañushpa urmangacuna.

Juan 21:17

Jesusca caihuanca quimsa cutinmi: –Jonaspaj churi Simón, ¿Ñucataca c'uyanguichu?– nirca. Caihuanca quimsa cutin: “¿Ñucataca c'uyanguichu?” nijpimi Pedroca llaquirishpa: –Mandaj Jesús, quiquinca tucuitami yachangui. Quiquinta ñuca ima shina c'uyaj cashcataca quiquinllataj yachanguimi– nijpi Jesusca: –Ñuca ovejacunata cuidangui.

Santiago 5:5

Cancunaca cai pachapica munashcata cushicushpami, cacharishcacuna tucushpa causashcanguichij. Cancunapaj shungucunapish huañuchina punllapaj animal huirayaj shinami huirayashcanguichij.

2 Pedro 2:12

Chaicunaca animalcuna shinami. Imata rimacushcatapish mana yachashpa rimajcunami. Paicunaca animalcunata shina japishpa huañuchishpa chingachinapajllami huacharishcacuna. Paicunaca chingarinallapitajmi chingaringacuna.