JEREMÍAS 11:4 - Dios Rimashca Shimicunami

⁴ Cancunapaj ñaupa yayacunata Egipto llajtamanta llujshichimushpami, cai shimicunataca curcani. Fierrota yacuyachina hornomanta shina llujshichimushpami, paicunataca cashna mandarcani: Ñuca rimashcata uyanguichij. Imatapish ñuca mandashca shinataj rurashpa causanguichij. Chashna causashpaca ñuca agllashca runacunami canguichij. Ñucapish cancunapaj Diosmi casha.

JEREMÍAS 11:4 Iomraidhean Croise

GÉNESIS 17:8

Canmanpish, cambaj huahua huahuacunamanpishmi cunan can maillata causashpa puricun tucui Canaan llajtataca huiñaipaj cusha. Ñucaca paicunapaj Taita Diosmi casha– nircami.

1 REYES 8:51

Paicunaca cambajlla cachun quiquin agllashcacunamari. Paicunataca quiquinmari fierro hornomanta shina Egiptomanta llujshichimurcangui.

2 REYES 18:6

Ezequiasca Mandaj Dios mandashcata Moisesman cushpa ima shinalla pajtachina cashcata mandashca shina huaquichishpa causashpami, Mandaj Diosllata catishpa paimantaca mana anchurirca.

ÉXODO 20:6

Ñucata c'uyashpa, ñuca mandashcacunata huaquichijcunataca, huaranga huaranga huahua huahuacunacama llaquijmi cani.

ISAÍAS 30:6

Neguevpi tiyaj animalcunamanta Mandaj Dios huillashcami: Jatun llaqui, manchanana maimantami c'ari león, huarmi león llujshin, víbora culebra, alasyuj culebra llujshin llajtatami cancuna imalla charishcacunataca burrocunaman apachishpa apanguichij. Tucui sumaj charinacunatapish camellocunaman apachishpami apanguichij. Ima allitapish cancunapaj mana ruraipaj cajcunapajmi chashna apanguichij ninmi.

ISAÍAS 48:10

Riqui, cantaca chuyayachircanimi. Cullquita chuyayachij shinaca mana chuyayachircanichu. Hornopi rupachij shina llaquicunahuanmi cantaca agllarcani.

JEREMÍAS 11:7

Cancunapaj ñaupa yayacunata Egipto llajtamanta llujshichimui punllamantapachami, ñuca mandashcata uyaichij nishpa rimarcani, cunarcani. Cancunatapish cai tucui huatacunata mana upalla saquishcanichu. Ashtahuanpish chai shinallatajmi cunani.

JEREMÍAS 24:7

Paicunaca, tucui shunguhuanmi ñucapajman cutiringacuna. Ñucataca Mandaj Diostaj cashcata rijsichun paicunamanca alli shungutami cusha. Chashnami paicunaca ñuca runacuna canga. Ñucapish paicunapaj Diosmi casha” nircami.

JEREMÍAS 26:13

Chashna cashcamantaca, cancunata Mandaj Dios rimashcata cazuichij. Millai causaita, millaita ruracushcata saquishpa, ña allichirichij. Chashna rurajpica, pai Mandaj Diosca cancunata ima shinalla llaquichisha nicushcata jarcarishpa, mana llaquichingachu.

JEREMÍAS 30:22

Cancunaca ñuca runacunatajmi canguichij. Ñucapish cancunapaj Diostajmi casha” ninmi Mandaj Diosca.

JEREMÍAS 32:28

Chaimantami Mandaj Diosca cashna nini: Ñucatajmi cai pueblotaca caldeocunata mishachishpa, Babilonia llajtata jatun mandaj Nabucodonosorpaj maquipi churagrini. Paimi cai pueblotaca japinga.

JEREMÍAS 38:20

Shina nijpimi, Jeremiasca cashna nirca: –Mana paicunapaj maquipi churangacunachu. Ñucaca Mandaj Dios huillachun nishcatamari huillani, chaita uyayari. Chaita uyashpaca mana ima tucunguichu, allimi causangui.

EZEQUIEL 11:20

Chashna rurajpimi, ñuca mandashca shina causangacuna. Ñuca huillachishcacunatapish cazushpami pajtachingacuna. Paicunaca ñuca agllashcacunami canga, ñucapish paicunapaj Diosmi casha.

EZEQUIEL 14:11

Israelcunataca ñucamanta ama ashtahuan anchurichun, ama ashtahuan c'ariyashpa millaita rurashpa mapayachunmi llaquichisha. Paicunaca ñuca agllashcacunami canga, ñucapish paicunapaj Diosmi casha” ninmi Mandaj Jatun Diosca.

EZEQUIEL 36:28

Cancunapaj ñaupa yayacunaman cushca llajtapimi causanguichij. Cancunaca ñuca agllashcacunami canguichij, ñucapish cancunapaj Diosmi casha.

EZEQUIEL 37:23

Rurashcalla dioscunatapish ña mana ashtahuan adorangacunachu, ña mana ashtahuan ima millananacunata rurashpa mapayangacunachu, ña mana ashtahuan ñucata c'ariyangacunachu. Ashtahuanpish ñucata c'ariyashpa millaita rurashca cajpipish, quishpichishami. Paicunamantaca tucui juchatami p'ichasha. Paicunaca ñuca agllashcacunami canga, ñucaca paicunapaj Diosmi casha.

EZEQUIEL 37:27

Ñucapajlla carpa huasipish paicunapaj chaupipimi canga. Ñucaca paicunapaj Taita Diosmi casha, paicunaca ñuca agllashcacunami canga.

DANIEL 3:26

Shina nishpaca Nabucodonosorca, lunyacuj nina horno punguman c'uchuyashpami: –Jahua pacha Taita Diospajta ruraj Sadrac, Mesac, Abed-nego llujshishpa shamuichij– nirca. Chaimi Sadrac, Mesac, Abed-negoca nina chaupimanta llujshircacuna.

LEVÍTICO 26:12

Ñucaca cancunapaj chaupipimi purisha. Cancunapaj Taita Diosmi casha. Cancunapish ñucapajcunami canguichij.

LEVÍTICO 26:3

Ñuca ima shina causachun nishca shina causaichij. Ñuca mandashcacunata huaquichishpa chaitataj rurana yuyailla tucushpa ruraichij.

ZACARÍAS 13:9

Chai saquirijcunataca, ninapimi rupachisha. Ima shinami cullquitaj cashcata, curitaj cashcata ricungapaj ninapi rupachincuna, chashnallatajmi ñucapish paicunataca rurasha. Chashna rurajpimi, paicunaca ñuca shutipi mañangacuna. Paicuna mañashcataca uyashami. Chaimantaca: Ñuca agllashcacunami canguichij nishami. Shina nijpimi paicunapish: Mandaj Diosca ñucanchij Diosmi ningacuna” ninmi.

ZACARÍAS 6:15

Shinallataj carupi causajcunami, Mandaj Diospaj huasita rurashpa ayudanaman shamungacuna. Chaita ricushpami, Mandaj Dios huillachun ñucata cancunapajman cachashcataca yachanguichij. Cancunata Mandaj Dios mandashcata uyashpa cazujpimi, cashnaca tucunga.

ZACARÍAS 8:8

Paicunataca, Jerusalenpi causachunmi pushamusha. Chaipimi paicunaca ñucapajlla causangacuna, ñucapish paicunapaj Diosmi casha. Ñucaca paicunapajca mana llullaj, cashcata ruraj Dios cashami” ninmi.

Mateo 28:20

Cancunata ñuca tucui imalla mandashcacunata paicunapish rurachun yachachinguichij. Cai pacha tucuringacamami, tucui punllacuna ñucaca cancunahuan casha” nircami. Chashna cachun.

2 Corintios 6:16

Dios causana huasica, rurashcalla dioscunahuanca mana shuj shinalla cai tucunchu. Cancunamari causacuj Dios causana huasi canguichij. Diosllatajmi, cashna nirca: “Ñucaca paicunapurapimi causasha, purisha. Ñucaca paicunapaj Diosmi casha, paicunaca ñuca agllashcacunami cangacuna” nishcami.

DEUTERONOMIO 11:27

Cunan ñuca quillcashpa cushca Mandaj Dios cancunapaj Taita Dios mandashcacunata cazushpaca allicunata chasquinguichijmi.

DEUTERONOMIO 4:20

Egiptomantaca fierrota yacuyachina hornomanta shina japishpami Mandaj Diosca cancunataca llujshichimurca. Cunan punlla ima shinami paipajlla canguichij, chai shinallataj cachunmi cancunataca llujshichimurca.

DEUTERONOMIO 5:6

Ñucaca Mandaj Dios cancunapaj Taita Diosmi cani. Ñucami cancunataca Egiptopi huatashca shina llaquinayajta causacujpi llujshichimurcani.

Hebreos 5:9

Chashna tucuita pajtachij cashpami, paita tucui cazujcunapajca huiñaipaj Quishpichij tucurca.

1 SAMUEL 15:22

Chaimi Samuelca: –Mandaj Diosca paiman cushpa tucui rupachijpipish, sacrificiocunata cujpipish ¿pai nishcacunata cazushcamanta shinachu cushicunga? Sacrificiota cunapaj randi, carneropaj huirata cushpa rupachicunapajlla randica, pai nishcata uyashpa cazunami ashtahuan alli.