JEREMÍAS 10:6 - Dios Rimashca Shimicunami

⁶ Mandaj Dioslla, can shina tucuita rurai tucujca, pi shujtaj mana tiyanchu. Canca jatun Diosmari cangui.

JEREMÍAS 10:6 Iomraidhean Croise

2 SAMUEL 7:22

Chaimantami Mandaj Dioslla tucuicunata yalli jatun nishca cangui. Can shinaca shujtajca mana tiyanchu. Can imallata rurashcata ñucanchij uyashca shina shujtaj Diosca mana tiyanchu.

1 CRÓNICAS 16:25

Mandaj Diosca jatunmari, alabashca cana Diosmari. Shujtaj dioscuna shinaca mana canchu. Paica manchanataj Diosmari.

NEHEMÍAS 4:14

Chashna mana rurai tucunchijchu nicujta ricushpami, ñucaca jatuncunatapish, mandajcunatapish, tucui chaipi cajcunatapish: “Ama manchaichijchu. Tucuita rurai tucuj, manchana, Jatun Diosta yuyarichij. Tucui caishujcunamanta, cancunapaj churicunamanta, cancunapaj ushushicunamanta, cancunapaj huarmicunamanta, cancunapaj huasicunamanta macanacuichij” nircanimi.

NEHEMÍAS 9:32

Ñucanchij Taita Dioslla, jatun Dioslla, tucuita rurai tucuj, manchana Diosmi cangui. Quiquin cusha nishcataca chaitataj pajtachij llaquij Diosmi cangui. Ñucanchij jatun mandajcunapish, llajtata mandajcunapish, curacunapish, profetacunapish ñucanchij ñaupa yayacunapish, can agllashca tucuicunapish Asiria llajtata jatun mandajcuna mandacushca punllamanta cunan punllacama tucui laya llaquita apacujtaca ama mana llaquita apacuj shinata ruraichu.

SALMOS 145:3

Mandaj Diosca jatunmari. Tucuimanta yalli jatunmi cangui nishpa alabana Taita Diosmari. Paica ñuca mana entendi tucuipaj jatunmari.

SALMOS 147:5

Ñucanchij jatun Diosca jatunmi. Pai tucuita rurai tucuj cashcaca yallitaj jatunmi. Pai yachaj cashcaca manataj tucurijmi.

SALMOS 35:10

Tucui ñuca tullucunami: “Mandaj Dioslla, quiquin shinaca ¿pitaj tiyangari? Quiquinca llaquilla caj runatapish paita yalli c'ari c'ari runa llaquichicujpi quishpichijmi cangui. Huajcha, imata mana charijcunatapish, quichujcunapaj maquimanta quishpichijmi cangui” nishami.

SALMOS 48:1

Mandaj Diosca jatunmari. Paipajlla urcupi, paipajlla pueblopi alabashca canamari.

SALMOS 96:4

Mandaj Diosca jatunmari, tucuimanta yalli alabashca cana Diosmari. Tucui dioscunapaj jahuapi caj manchana Diosmari.

ÉXODO 15:11

Mandaj Dioslla, dioscunapaj chaupipica ¿pitaj can shinaca tiyangari? ¿Can shina jucha illaj, tucuita rurai tucujca pitaj tiyangari? Canca pi mana rurai tucushca jatun mancharinacunata rurajmi cangui. Milagrocunata rurajmi cangui.

ÉXODO 8:10

Shina nijpi faraonca: –Cayataj mañapangui– nijpimi, Moisesca: –Ñucanchij Mandaj Dios shinaca, pi shujtaj mana tiyashcata can yachachunca can nishca punllapitajmi ruranga.

ÉXODO 9:14

Ñuca tucui llaquichinacunatami cambaj shungutapish, cambajta rurajcunapaj, can mandacun gentecunapaj shungutapish nanachichun cachasha. Tucui cai pachapi ñuca shinaca pi shujtaj mana tiyashcata can yachachunmi cachasha.

ISAÍAS 12:6

Siónpi causajcuna, cushicuichigari, cantaichigari. Israelcunapaj jucha illaj Diosca cambaj chaupipica jatunmari” ninguichijmi.

ISAÍAS 40:18

Taita Diostaca ¿imahuantaj ch'imbapurai tucunguichigari? Mana cashpaca paiman rijchajtapish imata mana rurai tucunguichijchu.

ISAÍAS 40:25

Jucha illaj Diosca: “Ñucaman rijchajtaca ¿imatataj ruranguichigari? ¿Ñucataca imahuantaj ch'imbapuranguichigari?” ninmi.

ISAÍAS 46:5

¿Ñucataca maijanman rijchaj cashcatataj yuyanguichij? ¿Pihuantaj ch'imbapuranguichij? ¿Ñucanchij chaicuna shina cangapajca pihuantaj ch'imbapuranguichij?

ISAÍAS 46:9

Ñaupa huatacunamanta ñuca imallata rurashcata yuyarichij. Ñucallami Dios cani, shujtaj Diosca mana tiyanchu. Ima shujtajca ñuca shinaca mana tiyanchu.

JEREMÍAS 10:16

Ashtahuanpish Jacobpaj Diosca manamari chashnachu. Paica tucui ima tiyajta rurajmari. Paimari israelcunataca, paipajlla cachun agllarca. Pai Diosca “Tucuita Mandaj” shutimari.

JEREMÍAS 32:18

Canca cai tucui huaranga huaranga runacunatami c'uyashpa perdonashcangui. Shina cashpapish yayacuna juchata rurashcamantaca q'uipa huahuacunata llaquichijmi cangui. Tucuita rurai tucuj, tucuita Mandaj Jatun Dios shutimi cangui.

DANIEL 4:3

¡Pai rurashca milagrocunaca ashtahuan yallitaj jatunmi. Mancharinacunata pai rurashcaca yallitaj jatunmi! Pai mandanaca huiñaipajmi. Paica huahua huahuata mandacungallami.

DANIEL 4:34

Shina cashpapish, ñucata llaquichishca huatacuna ña tucuricuipimi, Nabucodonosor ñucaca jahua pachata huichilla ricurcani. Chaimi ñucamanca gente yuyaillatataj tigrachirca. Jahua pacha Taita Diostaca allimari cangui nircanimi. Huiñai causaiyujtaca alabashpa jatunyachishpami cashna nircani: Quiquin mandanaca mana tucurij huiñaita mandanami. Quiquinca huahua huahuata mandacunguillami.

MALAQUÍAS 1:11

Ñucaca inti llujshinpi tiyaj llajtacunamantaca, inti huashicunpi tiyaj llajtacunapi causajcunacama rijsishcami cani. Chaimantami tucuipi ñucamanca inciensotapish, imalla cuna cashcatapish mapa illajllata cuncuna. Chaimanta ñucaca tucui llajtacunapi rijsishcami cani. Tucuita Mandaj Diostajmi chashna nini.

1 Corintios 8:6

Shina cajpipish ñucanchijpajca, shujlla Taita Diosmi tiyan. Pai Yayamantami tucui imapish shamun, ñucanchijpish paipajmi tiyanchij. Mandaj Jesucristopish shujllami. Paihuanmi tucui ima tiyajtapish rurarca, paimantami ñucanchijpish tiyanchij.

DEUTERONOMIO 32:31

Paicunapaj rumica mana ñucanchij Rumi shinachu. Chaitaca ñucanchijta p'iñajcunallataj allimi yachancuna.

DEUTERONOMIO 33:26

Jesurunpaj Taita Dios shinaca pi mana tiyanchu. Paica canta ayudangapajca jahua pachapi tiyarishcami puricun. Pai tucuita rurai tucuj cashcahuanca p'uyu jahuapimi puricun.