GÉNESIS 1:1 - Dios Rimashca Shimicunami

¹ Jahua pachata, cai pachata callarichijca Taita Diosmi.

GÉNESIS 1:1 Iomraidhean Croise

2 REYES 19:15

Ezequiasca Mandaj Diospaj ñaupajpica cashna nishpami mañarca: “Israelcunata Mandaj Dios, querubincunapaj chaupipimi causangui. Canllamari tucui cai pacha llajtacunapaj Dios cangui. Jahua pachatapish, cai pachatapish canmi rurarcangui.

1 CRÓNICAS 16:26

Tucui pueblocunapaj dioscunaca, mana diostajchu. Ashtahuanpish Mandaj Diosca, jahua pachatapish ruraj Diosmari.

2 CRÓNICAS 2:11

Chaita huillajpimi, Tiro llajtata jatun mandaj Hiramca, cashna quillcashpa Salomonpaj cacharca: “Mandaj Diosca pai agllashca israelcunata c'uyashcamantami cantaca paicunata jatun mandaj cachun churashca” nircami.

NEHEMÍAS 9:6

Chaipimi cashna nirca: “Quiquinllami Mandaj Dios cangui. Jahua pachatapish, quiquinmi rurashcangui. Jahua pachamanta jahuaman caj pachacunatapish quiquinmi rurashcangui. Chaipi tucui imalla tiyajcunatapish quiquinmi rurashcangui. Cai pachatapish quiquinmi rurashcangui. Chaipi tucui imalla tiyajcunatapish quiquinmi rurashcangui. Mama cuchatapish quiquinmi rurashcangui. Chaipi tucui imalla tiyajcunatapish quiquinmi rurashcangui. Tucui chaicunamanca quiquinmi causaita cungui. Jahua pacha angelcunapish quiquintami adorancuna.

JOB 26:13

Diospaj Espirituhuanmi jahua pachataca, sumajta rurarca. Pi'ñarishpa singuricuj culebratapish, paipaj maquihuanmi rurarca.

JOB 38:4

¿Ñuca cai pachata ruracujpica, canca maipitaj carcangui? Can alli yuyaita charishpaca, chaita ñucaman huillahuai.

JOB 9:8

Paillami jahua pachataca, linsota chutaj shina churarca. Paica caiman chaiman cuyucuj mama cucha jahuata purijmi.

SALMOS 102:25

Callaripica quiquinmi cai pachataca rurarcangui. Jahua pachapish quiquinpaj maquihuan rurashcamari.

SALMOS 104:24

¡Mandaj Dioslla, quiquin rurashcacunaca mana yupai tucuipajmari! Tucui chaicunataca quiquinpaj yachaihuanmari rurashcangui. Cai pachaca quiquin rurashcacunahuan jundamari.

SALMOS 104:30

Quiquin espirituta cachajpica, cutin mirarinllami. Chashna rurashpami allpapica causaiyuj mushujcunata jundachingui.

SALMOS 115:15

Mandaj Diospaj cajcuna alli nishca caichij. Jahua pachata, cai pachata ruraj Dios alli nishca caichij.

SALMOS 121:2

Ñucapaj ayudaca Mandaj Diosmantamari shamun. Mandaj Diosca jahua pachata, cai pachata rurajmi.

SALMOS 124:8

Ñucanchijta ayudanaca Mandaj Diospaj shutipimi tiyan. Paica jahua pachata, cai pachata rurajmi.

SALMOS 134:3

Jahua pachatapish, cai pachatapish ruraj Mandaj Diosca Sionmanta cantaca alli cashca cachun nichun.

SALMOS 136:5

Paipaj yachaihuan jahua pachata rurajta alabaichigari. Pai llaquij canaca huiñaipajmari.

SALMOS 146:6

Paimari jahua pachatapish, cai pachatapish rurarca. Mama cuchatapish, tucui chaipi imalla tiyajcunatapish paimari rurarca. Pai mana llullaj cashcataca huiñaipaj huaquichijmi.

SALMOS 33:6

Mandaj Diosca rimashcallahuanmi jahua pachacunataca rurarca. Chaipi imalla tiyajcunatapish p'ucushpallami rurarca.

SALMOS 33:9

Tucui imatapish tiyachun nijpica, tucuimi rurarirca. Pai mandajpica tucuimi tiyarca.

SALMOS 8:3

Jahua pachata ricushpaca cambaj maquihuan rurashcatami ricuni. Lunata, luzerotapish can rurashcata ricushpami,

SALMOS 8:4

cashna nini: Runaca ¿imatagari? ¿Ima cajpitaj pai yuyailla canguiyari? Huañujlla runataca ¿ima cajpitaj ricuj shamunguiyari?

SALMOS 90:2

Urcucunapish manaraj huacharijpimi ña tiyashcangui. Allpatapish, cai pachatapish manaraj rurashpami huiñaimanta huiñaicama ña tiyaj Dios cangui.

SALMOS 96:5

Tucui shujtajcunapaj dioscunaca, maquihuan rurashca dioscunallamari. Ashtahuanpish Mandaj Diosca jahua pachata ruraj Diosmari.

ÉXODO 20:11

Mandaj Diosca jahua pachatapish, cai pachatapish, mama cuchatapish, tucui chaicunapi imalla tiyajcunatapish sujta punllacunapimi tucuita rurarca. Canchis punllapica samarircami. Chaimantami Mandaj Diosca chai punllataca paipajlla cachun ch'icanchirca.

ÉXODO 31:18

Sinaí urcupi chaicunata Moiseshuan ña tucui rimashpaca, Moisesmanca Dios ima shina cashca shina causachun mandashcata ishqui tablajlla rumicunapi Taita Dios paipaj quiquin dedohuan quillcashcatami curca.

PROVERBIOS 16:4

Mandaj Diosca tucuitamari imapaj cashpapish, shuj yuyaihuan rurashca. Chaimantami Diosta mana manchaj runatapish, llaqui punllapaj charicun.

PROVERBIOS 3:19

Mandaj Diosca alli yachaj cashpami, cai pachataca rurarca. Alli yuyaiyuj cashpami, jahua pachatapish sinchita churarca.

ECLESIASTÉS 12:1

Chairaj cashpami, canta Ruraj Diostaca yuyarina cangui. Llaquilla cana huatacuna manaraj chayamujpi yuyariyari. Chai huatacunapica: “Cai causaitaca ña mana munananchu” ninguimi.

ISAÍAS 37:16

“Tucuita Mandaj Dios, israelcunata Mandaj Dios, querubincunapaj chaupipimi causangui. Canllamari tucui cai pacha llajtacunapaj Dios cangui. Jahua pachatapish cai pachatapish canmi rurarcangui.

ISAÍAS 40:21

¿Manachu yachanguichij? ¿Manachu uyashcanguichij? Cancunamanca callarimanta pacha ¿manachu huillashca canga? Cai pachata rurashcapachamanta ¿manachu pi cancunamanca yachachirca?

ISAÍAS 40:26

Cancunapaj ñahuihuan huichilla ricuichigari. Tucui caicunata pi rurashcata ricuichigari. Jahuapi ima tiyajcunataca paimi tucuita yupashpa maita rina cashcata cachan. Tucui chaicunataca paicunapaj shutipimi cayan shujllapish mana illangachu. ¡Chashnami paica tucuita rurai tucuj, tucuita mandai tucuj!

ISAÍAS 40:28

Tucui cai pachata rurajca huiñaita causaj Mandaj Dios cashcataca ¿Manachu yacharcangui? ¿Manachu uyarcangui? Paica mana shaicurinchu mana urmarinchu. Paipaj yuyaitaca pi mana tucuita yachai tucunchu.

ISAÍAS 42:5

Jahua pachata linsota chutaj shina ruraj Dios, cai pachapipish tucuipi granocunata jundachij Dios, tucui cai pachapi causajcunaman causaita cuj Dios, pai nishca shina purijcunaman espirituta cuj Mandaj Diosca cashnami nin:

ISAÍAS 44:24

Mamapaj huijsa ucumantapacha canta cuidaj canta Quishpichij Mandaj Diosca cashnami nin: “Ñucaca tucuita ruraj Mandaj Diosmi cani. Ñucallatajmi jahua pachatapish linsota chutaj shina churarcani. Cai pachatapish ñucallatajmi tucuita rurarcani. Ñucataca pi mana ayudarcachu.

ISAÍAS 45:18

Jahua pachata ruraj Mandaj Diosmi chashna nin. Cai pachata ruraj. Ima shinalla canapi churaj Diosmi paica. Paica cai pachataca mana yanga tiyachun rurarcachu, runacuna causachunmi rurarca. Ñucami Mandaj Dios cani, shujtajca mana tiyanchu.

ISAÍAS 51:13

Cantapish Ruraj, jahua pachatapish linsota shina chutashpa ruraj, cai pachatapish ruraj Mandaj Diostaca cungarishcanguimari. Cancunata llaquichishpa chingachina tucushpa p'iña shamujpica paicunata manchashcamanta tucui punlla mana samashpami llaquilla cainangui. Nina sindirij shina p'iñarishcahuan llaquichisha nijcunaca maitagari, manapish llaquichinca.

ISAÍAS 51:16

Ñuca shimicunataca cambaj shimipimi churarcani. Jahua pachata linsota chutaj shina rurashpami, ñuca maqui llanduhuan cantaca taparcani. Allpataca sinchita rurashpami Siontaca: “Canca ñuca agllashcami cangui” nircani.

ISAÍAS 65:17

Riquichij, ñucaca mushuj jahua pachata, mushuj cai pachatami ruragrini. Ñaupaman imapish tucushcataca mana yuyaringacunachu. Pipaj yuyaimanpish chaicunaca ña mana shamungachu.

JEREMÍAS 10:12

Mandaj Diosmari tucuita rurai tucuj cashpa cai pachata rurarca. Jatun yachaj cashpamari, tucui cai pachata alli churarca. Alli yuyaiyuj cashpamari, jahua pachatapish linsota shina churarca.

JEREMÍAS 32:17

“¡Jatun Mandaj Dioslla, canmari jahua pachatapish, cai pachatapish tucuita rurai tucuj cambaj maquihuan rurarcangui! Cambajca imata ruranapish mana sinchichu.

JEREMÍAS 51:15

Paimari tucuita rurai tucuj cashpa, cai pachata rurarca. Jatun yachaj cashpami, tucui cai pachataca sinchita churarca. Alli yuyaiyuj cashpami, jahua pachatapish linsota shina churarca.

ZACARÍAS 12:1

Israelcuna imalla tucuna cashcataca, Mandaj Diosllatajmi huillarca. Jahua pachatapish, cai pachatapish ruraj, runacunamanpish espirituta cuj Mandaj Diosca cashnami nirca:

Mateo 11:25

Chaipimi Jesusca cashna nirca: “Jahua pachata, cai pachata Mandaj ñuca Yaya, ñucaca cantami alabani. Alli yuyaiyuj, yachaisapacunamanca caicunataca pacarcanguimari. Ashtahuanpish uchilla huahuacunamanmari ricuchircangui.

Marcos 13:19

Chai punllacunaca jatun llaquimi canga. Cai pachata Taita Dios rurashca punllamanta cunancamaca, chashna llaquica mana tiyashcachu, cutinpish manataj tiyangachu.

Hechos 14:15

cashna nircacuna: –Riquichij, ¿ima nishpataj chashnaca ruracunguichij? Ñucanchijpish cancuna shinallataj runacunallami canchij. Ñucanchijca cancuna cashna llaqui causacushcata saquishpa causaj Taita Diospajman cutirichun, alli huillaita huillajcunami canchij. Paica jahua pachata, cai pachata, mama cuchata, tucui ima tiyajcunatapish ruraj Taita Diosmi.

Hechos 17:24

“Taita Diosca cai pachata, chaipi tucui imalla tiyajcunatapish rurajmi. Jahua pachatapish, cai pachatapish rurajmi. Mandaj Diosca maitataj gentecunapaj maquihuan rurashca huasicunapica causangari.

Hechos 4:24

Chaita uyashpaca, tucuicunami shuj yuyailla Taita Diostaca cashna nishpa mañarcacuna: “Tucuicunapaj jahuapi caj Jatun Dios, canca jahua pachata, cai pachata, mama cuchata, chaicunapi tucui imalla tiyajcunatapish ruraj Taita Diosmi cangui.

Romanos 11:36

Tucuimi paipaj, pai rurashcamantami tiyan, paipajmi rurarca, chaimanta tucui imapish paipajmi. Paitaca, huiñai huiñaita jatunyachishca cachun. Chashnataj cachun.

1 Corintios 8:6

Shina cajpipish ñucanchijpajca, shujlla Taita Diosmi tiyan. Pai Yayamantami tucui imapish shamun, ñucanchijpish paipajmi tiyanchij. Mandaj Jesucristopish shujllami. Paihuanmi tucui ima tiyajtapish rurarca, paimantami ñucanchijpish tiyanchij.

Efesios 3:9

Imalla rurana cashcata ña allichishcataca, pi mana yachashcata allitaj tucuicunaman huillachunpishmi curca. Chaitaca tucui imatapish ruraj Diosmi, huiñaimanta pacha pacalla charicurca.

Hebreos 1:10

Cashnapishmi nirca: “Jatun Dios, callaripica canmi cai pachataca rurarcangui. Jahua pachapish cambaj maquicuna rurashcami.

Hebreos 1:2

Chai tucuipaj q'uipa cunan punllacunapica, paipaj Churitami ñucanchijmanca Diosca huillachirca. Paitami tucui imalla tiyajcunatapish japij cachun churarca. Paillahuantajmi cai pachata, jahua pachata tucui imalla tiyajcunatapish rurarca.

Hebreos 11:3

Cai pachata, jahua pachata tucui imalla tiyajcunatapish rimashpalla Dios rurashcataca, crishcamantami yachanchij. Shina cajpica ñaupamanca mana ricuipaj cajtami cunanca ricunallata rurashca.

Hebreos 3:4

Tucui huasicunaca gentecuna rurashcallami. Ashtahuanpish tucui imalla tiyajcunata rurajca Diosmi.

2 Pedro 3:5

Chashnacunaca callaripi Dios jahua pachata, cai pachatapish rimashpalla rurashcata cai pachataca yacumanta ch'icanyachishcata, yacullamantataj tiyashcataca manataj crincunachu.

1 Juan 1:1

Callarichinapaj ña tiyajtaca ñucanchijtajmi uyarcanchij, ñucanchij ñahuihuantajmi ricurcanchij. Causaiyuj Rimaitaca, ñucanchij maquicunahuantajmi tuparircanchij.

Apocalipsis 10:6

Chaipica jahua pachata, chaipi ima tiyajcunatapish, allpa pachata, chaipi ima tiyajcunatapish, mama cuchata, chaipi ima tiyajcunatapish ruraj, huiñai huiñaita causacuj Diospaj shutipimi cashna nirca. Cunantajca ña mana ashtahuan shuyagrinichu.

Apocalipsis 14:7

Chai angelca: “¡Diosta manchaichij, paitaca jatunmari cangui nichij. Imalla rurashcata Dios ricuchishpa llaquichinaca, ñamari chayamushca. Chaimanta cielota, allpa pachata, mama cucha yacuta, llujshicuj yacucunatapish rurajta adoraichij!” nishpami, sinchita caparirca.

Apocalipsis 21:6

Chai q'uipaca cashnapishmi nirca: “Ñami tucuita rurani. Ñucaca callari A, tucuri Z shina callarichijpish, tucurichijpishmi cani. Maijanpish yacunachijmanca, causaita cuj yacu llujshicujtami ubyachun convidashpalla cusha.

Apocalipsis 22:13

Callari A, tucuri Z shina ñucami callarichijpish, tucurichijpish cani.

Apocalipsis 3:14

Laodicea pueblopi caj tandanacushca crijcunapaj angelmanpish quillcai: “Chashna Cachun shutiyuj, cashcata huillaj, mana llullaj, Dios tucuita ruranapaj ña tiyajca, caitami nin:

Apocalipsis 4:11

“Jatun Dios, canca jatunmari cangui, allimari cangui, Tucuita rurai tucujmari cangui nishcataca chasquipaj allimari cangui. Canmari tucui ima tiyajtapish rurashcangui. Can munashpa rurashcamantami tucui imapish tiyan” nicurcacunami.