ÉXODO 16:23 - Dios Rimashca Shimicunami

²³ Chaita huillajpimi Moisesca: –Mandaj Diosca chashnallatajmi mandarca. Cayaca Mandaj Diospajlla ch'icanchishca samana punllami. Chai samana punllataca Mandaj Diospajlla ch'icanyachishcami. Cusashcata micunayajpica cusanguichij. Yanushcata micunayajpica yanunguichij. Saquirishcacunataca tucuita cayapaj huaquichichijlla– nircami.

ÉXODO 16:23 Iomraidhean Croise

NEHEMÍAS 9:13

Sinaí urcuman uriyamushpami, paicunahuanca jahua pachamanta rimarcangui. Cashcata rurashpa mandachunmi mandashcata curcangui. Maijanman mana tucushpa mandachunmi mandanata curcangui. Chaitataj pajtachichun nishcata pajtachinacunatapish, mandashcacunatapish allicunatami curcangui.

NEHEMÍAS 9:14

Samana punllatapish cambajlla ch'icanchishca cachunmi mandashcangui. Cambajta ruraj Moisesman quillcachishpami mandashcacunatapish, chaitataj pajtachichun nishcacunatapish, mandashcacunatapish cushcangui.

ÉXODO 16:19

Moisesca israelcunataca: –Chai tandataca cayandijpajca pi ama saquinguichijchu– nircami.

ÉXODO 23:12

Sujta punllacunata trabajangui. Ashtahuanpish canchis punllapica samaringui. Cambaj huagrapish, cambaj burropish, cambajta ruraj huarmipaj churipish, shujtaj llajtamanta shamujpish samarichunmi chashna rurana cangui.

ÉXODO 31:15

Sujta punllacunata trabajanguichij. Canchis punllapica Mandaj Diospajlla ch'icanchishca punlla cashcamanta samarinami canguichij. Samana punllapi maijanpish trabajajca huañungatajmi ningui.

JEREMÍAS 17:22

Samana punllapica cancunapaj huasimantaca, ima quipillatapish ama llujshichichijchu. Ima ruranacuna saquiricujpipish, ama ruraichijchu. Ashtahuanpish samana punllataca, cancunapaj ñaupa yayacunata ñuca mandashca shina, ñucapajlla ch'icanchishcata charichigari.

LEVÍTICO 23:3

Sujta punllacunata trabajanguichij. Canchis punllapica samaringuichij. Chaipica tucuita cayashpa Diospajlla tandanacuimi canga. Chai punllapica sinchi trabajocunataca imata ama ruranguichij. Chai punllacunapica cancuna maipi causajpipish Mandaj Diospajlla ch'icanchishca samana punllami canga.

NÚMEROS 11:7

Maná shuti granoca culantro muyu shinami carca. Colorca bedeliotajllami carca.

NÚMEROS 11:8

Israelcunaca chai granota japinaman caita chaita llujshishpa japishpaca, molinocunapimi cutaj carca. Mana cashpaca rumicunapimi tacashpa ñutujcuna carca. Chaitaca mangapimi yanujcuna carca. Mana cashpaca tortacunata rurashpami cusashpa micujcuna carca. Chaica mushuj aceite sabortami charirca.

Lucas 23:56

Paicuna tigrashpaca, mishquijllata ashnacujcunatapish, llihuina jambicunatapishmi allichircacuna. Mandashcapi nishca shinallatajmi, samana punllapica samarircacuna.

DEUTERONOMIO 5:12

Mandaj Dios cambaj Taita Dios canta mandashca shinallataj samana punllata ñucapajlla ch'icanchinataca ama cungaringui.

Apocalipsis 1:10

Mandaj Jesuspaj punllapimi ñucataca tucuipi Diospaj Espiritulla pushacurca. Chaipimi, ñuca huashanijpica trompetapi tocaj shina sinchita rimashca,