ÉXODO 14:21 - Dios Rimashca Shimicunami

²¹ Moisesca jatun cucha jahuatami paipaj maquita chutarca. Mandaj Diosca tucui tutami inti llujshin lado sinchi huairata cacharca. Chai huaira tucui tuta p'ucujpimi, jatun cucha yacuca ishquipi chaupirirca. Chai cucha yacu cada ladoman chaupirijpimi chaquishca allpa tucurca.

ÉXODO 14:21 Iomraidhean Croise

GÉNESIS 8:1

Chai q'uipami Taita Diosca Noetapish, paihuan caj animalcunatapish huambuj huasipi cashcata yuyarirca. Chaimi Taita Diosca huairata cachashpa cai pachapi junda tiyacuj yacutaca chaquichishpa catirca.

2 REYES 2:8

Chaipica Eliasca, paipaj jahua churanata japishpa doblashpa yacuta huajtajpimi, uriman huichiman yacu chaupirijpi chaquishca pambata ishquindij ch'imbarcacuna.

NEHEMÍAS 9:11

Paicunapaj ñaupajpimi mama cuchatapish chaupircangui. Chaimi chaquishca pambata ch'imbarcacuna. Llaquichingapaj caticujcunataca chai yacuhuanmi tapachircangui. Paicunaca rumi shinami mama cucha ucujman saquirircacuna.

JOB 26:12

Paipaj fuerzahuanmi mama cucha yacucunatapish cuyuchin. Paica alli yachaj cashpami, manchanayaj yacu jatarijpipish jarcan.

JOB 38:24

¿Achijca maijan ñantataj chaupishpa rinri? Shitashca pambamanta shamuj huairapish ¿maijan ñanta shamushpataj tucui allpa jahuapi siririn?

SALMOS 136:13

Puca Cuchata ishquipi chaupijta alabaichigari. Pai llaquij canaca huiñaipajmari.

SALMOS 148:8

Taita Dios mandashcata ruraj rayopish, rundupish alabaichigari. Rasupish p'uyupish, jatun huairandij tamyapish alabaichigari.

SALMOS 66:6

Mama cuchaca chaquishca allpamanmi tigrarca. Jatun yacu chaupitaca chaquillahuanmi ch'imbarcacuna. Chaimantami Taita Diospi cushicunchij.

SALMOS 74:13

Quiquin tucuita rurai tucuj cashcahuanmari jatun cuchatapish chaupircangui. Yacupi causaj manchanana animalcunapaj umacunatapish ñuturcanguimari.

SALMOS 78:13

Mama cuchatami ishquipi chaupirca. Chaitami paicunataca ch'imbachirca. Yacutaca patacunata shinami rurarca.

ÉXODO 14:16

Israelcuna cucha chaupita chaquishca allpata ch'imbachun, canca cambaj caspita alzashpa, cambaj maquita cucha ladoman chutashpa yacuta ishquindij ladoman chaupi.

ÉXODO 14:20

egipciocunahuan, israelcunahuan chaupipi rirca. Suni p'uyuca egipciocunataca yallitajmi amsayachirca. Ashtahuanpish chai tutaca israelcunataca achijyachircami. Chaimi chai tutaca caishujmanta chaishujmanta mana c'uchuyai tucurcacuna.

ÉXODO 15:8

Can p'ucujpica yacucunaca patami tucurca. Volacuj yacupish patami tucurca. Ucujta yacuca patami tucurca.

ÉXODO 7:19

Mandaj Diosca, Moisestaca cashnapishmi nirca: –Aarontaca: Egiptopica jatun yacupish, huaicuta rij yacupish, tandashca tanque yacupish, maillapi yacuta tandashcacunapish, caspimanta, rumimanta rurashcacunapi tiyaj yacucunapish yahuar tucushpa Egipto llajtapica, yahuarhuan junda cachun cambaj caspita japishpa tucui chai yacucuna jahuata chutai ni– nircami.

ISAÍAS 23:11

Mandaj Diosmari mama cucha jahuata paipaj maquita chutashpa cai pacha mandanacunata chujchuchirca. Mandaj Diosmi Canaán llajta ima shina tucunata, paicunapaj pueblocunapi muyundij pircacuna urmanatapish mandarca.

ISAÍAS 43:16

Mama cucha chaupita ñanta pascaj, jatun yacucuna chaupita ñanta pascaj, Mandaj Diosca cashnami nin:

ISAÍAS 44:27

Allpa ucupi caj yacucunata chaquirichij nijca ñucami cani. Cancunapaj jatun yacucunatapish ñucami chaquichisha.

ISAÍAS 50:2

Ñuca shamushpaca pita mana japircanichu. Huasiyuj nijpipish pi mana uyarircachu. ¿Ñuca maquica uchijllachari cancunata mana cacharichi tucungapajca? Cancunata quishpichingapajca ¿manachari poderta chariniyari? Riqui, ñucaca rimashcallahuanmi mama cucha yacutapish chaquichini. Jatun yacucunatapish shitashca pambatami rurani. Chaipi causaj chalhuacunapish yacu illashcamanta yacunaihuan huañushpa ismunmi.

ISAÍAS 51:10

Mama cucha yacuta chaquichijpish quiquintajmari cangui. Jundu jatun yacucunatapish quiquintajmari chaquichircangui. Quishpichishcacunata ch'imbachingapaj, ucujta caj yacuta chaquichishpa ñanta rurajca quiquintajmari cangui.

ISAÍAS 51:15

Mandaj Dios ñucami mama cuchatapish caiman chaiman cuyuchini. Chai yacuta jahuajta jatarichishpa huacachijpish ñucami cani. Ñuca shutica tucuita Mandaj Diosmi.

ISAÍAS 63:12

¿Paipaj tucuita rurai tucuj rigrahuan Moisespaj alli maquihuan pushachijca maitagari? ¿Paicunapaj ñaupajpi jatun cucha yacuta chaupishpa paica huiñaipaj cashcata ricuchij Diosca maipitagari?

ISAÍAS 63:13

¿Jatun yacu cuchata chaquichishpa chaita ch'imbachijca maipitagari? ¿Shitashca pambata caballocuna mana ñitcashpalla rijta shina ch'imbachij Diosca maipitagari?

HABACUC 3:8

Mandaj Dioslla, ¿canca jatun yacucunahuanchu p'iñaringui imatagari? ¿Canca jatun yacucunahuanchu p'iñarircangui? ¿Canca cambaj caballocunapi, cambaj mishana carretacunapi tiyarishpachu jatun mama cucha yacuta ch'imbarcangui?

Hechos 7:36

Paimi ñucanchij ñaupa yayacunataca Egiptomantaca cashna llujshichirca. Chai llajtapipish, Puca Cucha jatun yacupipish, shitashca pambapipish chuscu chunga huatacunatami pi mana ruraipajcunata, ricuchinacunatapish rurarca.

JOSUÉ 2:10

Cancuna Egiptomanta llujshishpa, Puca Cucha yacuta ch'imbachunpish, Mandaj Diosca chai yacuta chaquichishcatami yacharcanchij. Jordán jatun yacumanta ch'imbaman caj amorreocunata mandaj Sehón shuti, Og shuti jatun mandajcunatapish mishashpa tucuchishcatapish yachanchijmi.

JOSUÉ 3:17

Tucui israelcuna ch'imbangacamami curacunaca, Dioshuan ari ninacushca quillcata huaquichina arcahuan, Jordán yacu chaquirishca chaupipi imata mana manchashpa shayacurcallacuna. Israelcunaca tucuicunami chaquishca allpata ch'imbarcacuna.

JOSUÉ 4:23

Cancunata Mandaj Diosca cancuna ch'imbangacama, cai Jordán yacuta chaquichijtaca cancunallatajmi ricunguichij. Ñaupapish ñucanchij ricucujpimi Mandaj Diosca cunan cancuna ch'imbaj shinallataj ch'imbangacama, Puca Cuchata chaquichirca.