ÉXODO 1:17 - Dios Rimashca Shimicunami

¹⁷ Partera huarmicunaca Taita Diosta manchashcamantami, Egipto llajtata jatun mandaj mandashca shina mana rurashpa c'ari huahuacuna cajpipish mana huañuchishpa saquircallacuna.

ÉXODO 1:17 Iomraidhean Croise

GÉNESIS 20:11

Chaimi Abrahamca: –Cai llajtapi causajcunaca, Taita Diostaca manataj manchancunachu. Ñuca huarmitaca paicunapaj cachun japingapaj ñucataca huañuchingacunami yuyashpami chashna nircani– nirca.

GÉNESIS 42:18

Quimsa punlla tucujpimi Joseca: –Ñucaca Taita Diosta manchajmi cani. Cancuna ama huañungapajca caita ruraichij:

2 SAMUEL 24:4

Ashtahuanpish jatun mandajca mana uyashpami Joabtapish, soldadocunata mandajcunatapish chaitaca ruranatajmi canguichij nirca. Joabca soldadocunata mandajcunandij, jatun mandajpaj ñaupajmanta llujshishpaca, tucui israelcunata yupangapaj quillcanamanmi rircacuna.

NEHEMÍAS 5:15

Ashtahuanpish ñucapaj ñaupa mandajcunaca, chuscu chunga yalli siclo cullquita cobrashca jahuami israelcunataca micunamantapish, vinomantapish mañashpa llaquichijcuna carca. Chai jahuami paipajta rurajcunapish israelcunata yallitaj llaquichishpa mandajcuna carca. Ñucaca Taita Diosta manchaj cashcamanta mana chashna rurarcanichu.

ESTER 3:3

Chaimantami jatun mandajta servishpa, chai mandana huasi pungupi caj caishujcunaca Mardoqueotaca: “¿Ima nishpataj jatun mandaj mandashcataca mana cazungui?” nishpa tapurcacuna.

SALMOS 31:19

Quiquinpaj c'uyaica yallitaj jatunmi. Chaitaca quiquinta manchajcunapajmi huaquichishcangui. Quiquinpi shunguta churajcunapimi ricuchishcangui. Chaitaca huañujlla aichayuj runacunapaj ñaupajpimi ricuchishcangui.

ÉXODO 1:18

Chaimi Egiptota jatun mandajca, partera huarmicunata cayachishpa paicunataca: –¿Ima nishpataj ñuca mandashcata mana cazushpa c'ari huahuacunataca, mana huañuchishpa saquircanguichijlla?– nishpa tapurca.

ÉXODO 1:21

Chai partera huarmicunaca Taita Diosta manchaj cajpimi, Taita Diosca paicunapaj familiacunataca ashtahuan mirachirca.

PROVERBIOS 16:6

Juchata ruracujtaca llaquishpa allita rurana yuyaihuanmi jarcan. Maijanpish Mandaj Diosta manchashpami, millai causaimantaca anchurin.

PROVERBIOS 8:13

Mandaj Diosta manchanaca tucui mana allita p'iñanamari. Quiquinlla alli cashcahuan jatun tucujcunata, millaita rurashpa purijcunata, millaita rimajcunataca p'iñanimi.

ECLESIASTÉS 12:13

Cai tucuita yachachishca q'uipa, ña tucuchingapajca caitami nini: Diostaca manchashpa cazungui, pai mandashcacunatapish pajtachingui. Cai pachapi causajcunapajca, tucuimanta yalli allica chaimi.

ECLESIASTÉS 8:12

Juchata ruraj runaca, mashna cutin millaita rurashpapish, unita causanllami. Shina cashpapish ñucaca Diospaj munaita rurajcuna, paipaj ñaupajpi cazushpa causajcunapish alli llujshina cashcatapish yachanimi.

DANIEL 6:13

Shina nijpimi, paicunaca jatun mandajmanca cashna nircacuna: –Judamanta prezu apamushcacunapuramanta caj Danielca, can jatun mandajtaca mana cazunchu. Can chashnataj cachun nishpa churashca mandashcatapish mana cazunchu. Ashtahuanpish punllapi quimsa cutinmari, paipaj Taita Diosta mañan– nircacunami.

OSEAS 5:11

Efrainca llaquichishcamari tucushca. Maipish cachun llaquichishcamari tucushca. Paicunallataj manapish dioscunata adorashcamantami chashna rurashca tucunga.

MIQUEAS 6:16

Canca Omri mandashcacunallatami cazurcangui. Acabpaj familiacuna imata rurashcatami catircangui. Paicuna mandashcacunatapish, cunashcacunatapishmi rurarcangui. Chaimantami cantaca llaquinayajta saquisha. Caipi causajcunapish chanzata rurashpa asinami cangacuna. Chaimanta ñuca agllashcacunapaj llaquitami apanguichij” ninmi.

Mateo 10:28

Cuerpota huañuchijcunataca, ama manchaichijchu. Paicunaca, almataca mana huañuchi tucunchu. Chaipaj randica almandij, cuerpondij ucu pachapi chingachi tucuj Taita Diosta manchaichij.

Lucas 12:5

Pita manchana cashcata yachachisha: Cancunaca causaita quichushpa ucu pachaman cachai tucuj Taita Diosta manchaichij. Paitatajca manchanami canguichij.

Hechos 5:29

Chaimi Pedropish, caishuj apostolcunapish cashna nirca: –Runacunata cazunapaj randica, Taita Diostami cazuna canchij.

1 SAMUEL 22:17

Chashna nishpaca jatun mandajca paita cuidashpa muyundijpi shayacuj soldadocunataca: –Mandaj Diospaj curacunata tigrarishpa huañuchichij. Paicunapish Davidman maquita cushpamari pai miticushpa ricujta yachashpapish ñucamanca mana yachaj chayachishcacuna– nircami. Chashna nijpipish jatun mandajpajta rurajcunaca, Mandaj Diospaj curacunata huañuchingapaj paicunapaj maquitaca mana chutashun nircacunachu.