ESTER 7:8 - Dios Rimashca Shimicunami

⁸ Chaipi saquirishpaca, Amanca Esterpaj ñaupajpimi, pai tiyacun jatun tiyanapi cungurishca carca. Jatun mandajca, mandana huasi c'uchu huertamanta tigrashpa chai ucuman yaicushpa, chaita ricushpami Amantaca: –¿Ñuca huarmi jatun mandajtapish ñuca quiquin huasillapitajchu japirisha ningui imamí?– nirca. Jatun mandaj chashna nijpimi, paipajta rurajcunaca Amantaca ñahuita ch'ungullichircacuna.

ESTER 7:8 Iomraidhean Croise

ESTER 1:5

Chai chaupi huata q'uipaca, shujtaj jatun micuita rurashpami, mandana huasi canllapi caj sumaj jardinpica, canchis punllacama tandanacurca. Chai jatun micuimanca, Susa pueblopi causaj mandajcunatami, ashtahuan alli nishca cajcunatapish, yangalla cajcunatapish cayarca.

ESTER 1:6

Chai jardín pambapica yurajlla, verdijlla, azul-lla sumaj jatun linsocunahuanmi sumajta allichishca carca. Chai linsocunataca linomanta rurashca morado racu puchcacunahuanmi, mármol rumi pilarcunapi churashca cullqui argollacunapi huatashca carca. Shinallataj pambapish, nácar shuti sumaj rumicunahuanpish, yuraj mármol rumicunahuanpish, yana rumicunahuanpish churashcami carca. Chashna sumaj pambapimi curimanta, cullquimanta rurashca sumaj jatun tiyanacunapi tiyarcacuna.

ESTER 6:12

Chai q'uipaca Mardoqueoca, jatun mandaj mandana huasiman yaicuna pungupi pai tiyacushcallamantaj tigrarcallami. Amanca yallitaj pingai tucushpami, llaquirishpa umata ch'ungullirishpa paipaj huasiman utca rirca.

ESTER 7:10

Chashna mandajpimi Amantaca, Mardoqueota sipichingapaj pai shayachishca caspillapitaj sipircacuna. Chashna rurachishpami jatun mandajca, yallitaj p'iñarishcamanta alli tucurca.

JOB 9:24

Cai pachataca, Diosta mana manchajcunamanmi curca. Paicunapaj juezcunapaj ñahuicunatapish tapanmi. Mana paillataj tucuita ruracujpica, ¿pitaj canga, maipitaj canga?

ISAÍAS 22:17

Cunanca cantaca Mandaj Diosca shujtajmanmi apagrin. Llaquinayajtami prezu cachagrin. Cantaca cumurichingami.

ISAÍAS 49:23

Jatun mandajcunami cancunataca huahuata cuidaj shina cuidanga. Jatun mandaj huarmicunami cancunapajca huiñachij mama shina canga. Cambaj ñaupajpi cungurishpami pambaman tupajta cumuringacuna. Cambaj chaquipi caj ñutu allpatami lambingacuna. Chaipimi ñucataca Mandaj Diostaj cashcata yachangui. Ñucapi shunguta churashpa shuyajcunaca, manataj pingai tucungacunachu” ninmi.

AMÓS 3:12

Mandaj Diosca cashnapishmi nin: “Samaria pueblopi causaj israelcunaca ñutujlla tiyanacunapi, camacunapimi sirishpa cainancuna. Paicunaca leonpaj shimimanta shuj michij, paipaj oveja ishqui chaquita, mana cashpaca mirga rinrinllata quichushca shinallami quishpiringacuna” ninmi.

Marcos 14:65

Chashna nishpaca maijancunaca ch'ucashpami, ñahuita linsohuan huatashpa huajtarcacuna. Chaimantaca: “¡Maijantaj huajtanchij huillaiyari!” nircacunami. Huasita cuidajcunapish ñahuipimi c'hajyachircacuna.