ESTER 6:4 - Dios Rimashca Shimicunami

⁴ Chashna nicujpimi Amanca, jatun mandaj tiyacun huasi canllamanca paihuan rimangapaj chayarca. Amanca, sipina jatun caspita shayachishpa charicushca cashpami, chai caspipi Mardoqueota sipichichun ningapaj jatun mandajpajman chayarca. Canllaman puricujta uyashpami, jatun mandajca: –¿Pitaj canllapi puricun?– nishpa tapurca.

ESTER 6:4 Iomraidhean Croise

ESTER 4:11

“Jatun mandaj tiyacun ucumanca pi mana yaicui tucunllachu. Pai manapish cayajpi chaiman yaicujpica, c'ari cajpi huarmi cajpipish mandashcapi nishca shinaca huañuchingatajmi. Pai llaquishpa mana huañuchisha nishpallami, paipaj maquipi charicun curi varatapish ñaupajman chutashpa ricuchinga. Chashna mandashca tiyashcataca, jatun mandajta tucui servijcunapish, pai mandacun tucui llajtacunapi causajcunapish allimi yachancuna. Ñucatacarin paita ricuchunca, ña shuj quillatamari mana cayan” nishpami huillanaman cacharca.

ESTER 5:1

Ña quimsa punlla tucujpimi, Esterca jatun mandaj huarmi churarina churanata churarishpaca, mandana huasi ñaupaj ucuman yaicurca. Chaiman yaicushpami jatun mandaj tiyacun mandana ucu ñaupajpi shayarirca. Jatun mandajca, chai ucupimi pungu ch'imbapurapi pai tiyanapi tiyacurca.

ESTER 5:14

Chashna nijpimi Zeres shuti paipaj huarmipish, tucui paihuan apanacujcunapish cashna nircacuna: –Ishqui chunga ishqui metro alto caspita shayachishpa, Mardoqueotaca chaipi sipichiyari. Jatun mandajman caya tutamanta huillashpa paitaca chaipi sipichinguilla. Chai q'uipami, chai jatun micuimanca jatun mandajhuan cushicushpa ringui– nircacunami. Chashna yuyaita cushcaca, Amanpaj yuyaipica alli cajpimi, sipichina jatun caspita shayachichirca.

ESTER 6:3

Chaita paipaj ñaupajpi rezajpimi, jatun mandajca: –¿Mardoqueomanca ima allita curcanguichijchu, mana cashpaca alli nishca canapi churarcanguichijchu?– nishpa tapurca. Chaita tapujpimi, paipajta ruraj mandajcunaca: –Imata mana curcanchijchu– nircacuna.

ESTER 6:5

Shina tapujpica, jatun mandajta servijcunaca: –Amanmi shamushca– nijpica, jatun mandajca: –Yaicuchichigari– nirca.

ESTER 7:9

Chashna rurashpami, jatun mandajta servij eunucocunapuramanta Harbona runaca: –Cai Amanca, paipaj huasipimi Mardoqueota sipichingapaj, ishqui chunga ishqui metro alto jatun caspita shayachishpa charicun. Mardoqueoca, can jatun mandajta shujtajcuna huañuchishun nicujpi, huillashpa quishpichircamari– nircami. Chashna nijpimi jatun mandajca: –Chai caspipica, paillatataj sipigrichij– nishpa mandarca.

JOB 5:13

Jatun yachajcunataca, paicuna yachashcallapitaj japishpa muspachinllami. Millai runacunataca, paicuna yuyashcallapitaj pandachinllami.

SALMOS 2:4

Jahua pachapi causajca paicunatapish asingami, Jatun Diosca paicunatapish chanzata rurangami.

SALMOS 33:19

Huañunallapi cajpipish quishpichingapajmi ricuracun. Yaricai punllacunapi huañucujpipish causaita cungapajmi ricuracun.

ECLESIASTÉS 9:10

Imata ruranatapish cambaj maquipi tiyacujtaca fuerza tiyashcahuan rurailla, canpish Seolman ringuillatajmi. Chaipica imata rurana mana tiyanchu. Imata yuyanallapish, imata yachanapish, alli yachaipish mana tiyanchu.