ESTER 2:12 - Dios Rimashca Shimicunami

¹² Huarmicunataca, allichirichun mandashca shinallatajmi ashtahuan sumajyachunca, huarmicuna tiyana huasipi shuj huatata allichishpa charijcuna carca. Chaupi huatataca, mirra nishca aceitehuanmi llihuishpa sumajyachijcuna carca. Caishuj chaupi huatataca huarmicuna allichiringapajllataj rurashca mishquijllata ashnaj jambicunahuanpish, shujtaj jambicunahuanpish llihuishpami sumajyachijcuna carca. Chashnami chai huarmicunataca jatun mandaj Asueropajman richunca, huata jundata allichishpa sumajyachijcuna carca.

ESTER 2:12 Iomraidhean Croise

ESTER 2:11

Ester allilla cashcata, mana allilla cashcata, shinallataj ima shina charicujta yachangapajmi, Mardoqueoca huarmicuna tiyacun huasi canllapi punllanta puricuj carca.

ESTER 2:13

Chai q'uipami, chai huarmicunaca, ashtahuan sumaj churarinacunata mañashpa churarishpaca, paicuna tiyacushca huasimantaca jatun mandajpajman rijcuna carca.

ESTER 2:3

Can jatun mandaj mandacun tucui llajtacunamantaca, tucui sumaj huarmicunata cai Susa pueblopi cambaj huarmicuna tiyacun huasiman cambaj apamuchunca, llajtacunata mandajcunamanmari mingana. Chai huarmicunata apamushpaca, sumajyachij jambicunahuan jambishpa allichichunca, cambaj huarmicunata cuidaj Hegai shuti eunuco runamanmari mingana.

ESTER 2:9

Hegaica, chai Ester huarmica tucuicunata yalli alli cajpimi, sumajyachij jambicunahuan paitaraj utca allichichun churarca. Micunatapish ashtahuan allitami cararca. Shinallataj paipajta rurajcuna cachunca mandana huasipi caj, ashtahuan alli yachaj canchis huarmicunatami agllarca. Chai huarmicunahuanmi Estertaca, jatun mandajpaj huarmicuna tiyana huasipi caj ashtahuan alli ucucunapi causachun churarca.

PROVERBIOS 7:17

Ñuca dormina ucupipish, sumaj mishquijllata ashnaj mirrata, aloeta, canelatamari churamurcani.

CANTARES 3:6

¿Shitashca pambataca pi huarmitajshimari, tucui layaman ashnacuj cutahuanpish, inciensohuanpish, mirrahuanpish churarishpa mishquijllata ashnacuj, cushni shina huichiyacun?

ISAÍAS 3:24

Mishquijllata ashnacujhuan churarishca canapaj randica, millananata ashnacujmi tucungacuna. Chumbipaj randica, huascahuanmi chumbilliringacuna. Sumajta allichirishca ajcha canapaj randica, ajcha illaj lluchu umami tucungacuna. Sumaj churanacunata churarishca canapaj randica, cañamazuta churarishcami cangacuna. Alaja sumaj canapaj randica, ninapi rupashca alliyacuj shinami cangacuna.

ISAÍAS 57:9

Mishquijllata ashnacuj jambicunahuanmi jatun mandajpajmanca rircangui. Mishquijllata ashnaj jambicunataca mirachircanguimi. Cambaj randi rimajcunatapish caruman cachashpami, Seol ucujman cacharcangui.