Efesios 2:4 - Dios Rimashca Shimicunami

⁴ Ashtahuanpish Diosca llaquij canapi charij cashpami, paipaj jatun c'uyaihuan ñucanchijtaca c'uyarca.

Mushuj Testamento Diospaj Shimi

⁴ Shina cajpipish, Taita Diosca yallitaj llaquij cashpallami, ñucanchijtaca tucuita yalli jatun cʼuyaihuan cʼuyarca.

Efesios 2:4 Iomraidhean Croise

NEHEMÍAS 9:17

Quiquin Dios paicunapaj, mancharinacunata rurashcatapish mana uyashun nircacunachu, mana yuyarishun nircacunachu. Quiquinpajta ruranatapish ch'ahuanyashpa mana rurashun nircacunachu. Ashtahuanpish c'ariyashpami, cutinllataj huatashca shina cangapaj chai llajtallamantaj tigrangapaj paicunapaj pushajcunata agllanata yuyarircacuna. Quiquinca perdonaj Dios, c'uyaj, llaquij, mana utca p'iñarijmi cangui. Chashna yallitaj c'uyaj cashpami, paicunataca mana shitashcangui.

SALMOS 145:8

Alli shungu, jatunta llaquijca Mandaj Diosmari. Paica mana utca p'iñarijmari, yallitaj llaquijmari.

SALMOS 51:1

Taita Dios ñucata llaquihuayari. Quiquin llaquij cashca shinallataj llaquihuayari. Ima shina llaquij cashca shinallataj llaquishpa ñuca c'ariyashcacunata p'ichahuayari.

SALMOS 86:15

Ashtahuanpish quiquin Jatun Diosca llaquij, cashcata ruraj, mana utca p'iñarij, yallitaj llaquij, mana llullaj Taita Diosmari cangui.

SALMOS 86:5

Jatun Dios quiquinca allimari cangui, perdonajmari cangui. Quiquinta mañajcunataca tucuicunata jatunta llaquijmari cangui.

ÉXODO 33:19

Shina nijpimi Mandaj Diosca: –Ñuca alli cashcataca tucuitami canman ricuchigrini. Ñucaca Mandaj Dios cashcatapish cambaj ñaupajpimi huillasha. Ñuca pita llaquisha nishcatami llaquisha. Ñuca c'uyasha nishcatami c'uyasha.

ISAÍAS 63:7

Mandaj Diospaj jatun c'uyaitami yuyarisha. Mandaj Diosta alabana cashcatami yuyarisha. Mandaj Dios ñucanchijpaj ima shinalla rurashca shinallatajmi yuyarisha. Mandaj Diosca yallitaj c'uyaj cashpa israelcunapaj huahua huahuacunapaj yallitaj jatun allicunata rurashcatami yuyarisha. Pai ima shina c'uyaj cashca shina rurashcatami yuyarisha. Pai ima shina yallitaj llaquij cashca shinallatajmi yuyarisha.

JEREMÍAS 31:3

Mandaj Diosca achca huatacuna sirijpirajmi, ñucaman ricurishpa cashna nirca: “Ñucaca can israelcunataca huiñaita mana tucurij c'uyaihuanmi c'uyani. Chaimanta cancunataca llaquicunillami.

DANIEL 9:9

Ñucanchijca Taita Diosta mana cazushpami c'ariyashcanchij. Cunanca Mandaj ñucanchij Diospimi llaquij canapish, perdonaj canapish tiyan.

JONÁS 4:2

Chashna p'iñarishpami, Mandaj Diostaca cashna mañarca: –Mandaj Dioslla, canca jatunta c'uyaj, llaquij, mana utca p'iñarij, alli shungu Diosmi cangui. Llaquichisha nishpa huillachishpapish, jarcarishpa saquinguillami. Ñuca llajtapi cashparajmi, canca chashna ña yacharcani. Chaimantami can mandajpica, miticushpa Tarsis puebloman ricurcani.

Lucas 1:78

Diosca ñucanchijtaca achcata c'uyashpami tutamantapi inti llujshishpa achijyachij shina jahua pachamanta Quishpichijta cachashca.

Romanos 10:12

Judiocunapish, griegocunapish chai shinallatajmi. Paillataj tucuicunapaj Mandaj Jesús cashpami, tucui paita mañajcunaman cungapajca achcata charin.

Romanos 2:4

¿Paica alli canata, mana utca p'iñarij canata, millaita rurajpipish mana utca llaquichij canata achcata charij cashcatachu yanganchingui? Mana cashpaca, paica paipaj alli cashcahuan cutirinaman pushacushcatachu mana yachashca shina tucungui.

Romanos 5:8

Ashtahuanpish ñucanchijca juchayujcuna cajpiraj Cristo ñucanchijmanta huañujpimi, Diosca ñucanchijta c'uyaj cashcataca ricuchin.

Romanos 9:23

Diosca, pai sumaj canahuan charij cashcataca pai llaquingapaj rurashca vasocunamanmi ricuchisha nirca. Paicunapish paipaj sumaj canapi cachunmi, ñaupaman chashna allichirca.

Efesios 1:7

Diosca, mana c'uyaipajta c'uyaj canata charij cashcahuanmi, juchacunata perdonashpa, Cristopaj yahuarhuan cutin randishpa quishpichirca.

Efesios 2:7

Paipaj mana c'uyaipajta c'uyaj canahuan yallitaj charij cashcata shamuj punllacuna, Cristo Jesusmanta ñucanchijman ricuchingapajmi chaipi tiyachirca.

Efesios 3:8

Ñucaca tucui jucha illajcunamanta ashtahuan uchillami cani. Chashna cajpipish mana judiocunaman Cristopaj mana yupaipaj achcata charishca alli huillaita huillachunmi, cai mana c'uyaipajta c'uyaj canataca ñucaman curca.

2 Tesalonicenses 2:13

Mandaj Jesús c'uyashca huauquicuna, ñucanchijca cancunamantaca Taita Diostaca pagui nicunallamari canchij. Taita Diospaj Espíritu jucha illajta rurajpi mana llullashpa huillashcata crijpi quishpichingapajmi Taita Diosca manaraj cai pachata rurashpa cancunataca agllarca.

1 Timoteo 1:14

Ñucanchij Jatun Diosca paipaj mana c'uyaipajta c'uyaj canata, crinata, c'uyaitapishmi, Cristo Jesushuan shujlla tucujpi ñucapica yallijta tallirca.

2 Timoteo 1:9

Diosmi ñucanchijta jucha illaj cachun cayashpa quishpichirca. Mana ñucanchij imata rurashcamantachu chashna rurarca. Ashtahuanpish pai munashca shinami mana c'uyaipajta c'uyashpa Cristo Jesushuan shujllata rurashpa chashna rurarca. Chaitaca huiñai, huiñaimantami Diosca chashna rurasha nishca.

1 Pedro 1:3

Ñucanchijta Mandaj Jesucristopaj Dios Yayataca, alli nishca cachun. Paica, ñucanchijta jatunta llaquij cashcamantami huañushcacunapaj chaupimanta Jesucristota causachishpa, huiñaita causagrina yuyailla cachun, ñucanchijtaca cutin huacharichirca.