Efesios 1:11 - Dios Rimashca Shimicunami

¹¹ Ñaupaman agllashca cashcamantami, Cristomantaca japina cashcata charircanchij. Tucui imatapish rurajca, pai munashpa yuyarishca shinallatajmi pajtachicun.

Mushuj Testamento Diospaj Shimi

¹¹ Ñucanchijtapish Diosllatajmi, Pai imalla charishcacunataca Cristollamanta chasquichun munashca. Cashna rurana Paipaj yuyaipi alli cajpimi, ñaupamanta Pai munashca shinallataj chʼicanchishca.

Efesios 1:11 Iomraidhean Croise

JOB 12:13

Alli yachaipish, rurai tucunapish Taita Dioshuanmi. Cunanapish, alli yuyaipish paipajmi.

JOB 33:29

Riquichij, Taita Diosca runataca ishqui cutin, mana cashpaca quimsa cutinpish chashna ruranllami.

SALMOS 37:18

Ima pandata mana rurajcunataca, punllantami Mandaj Diosca huaquichinga. Paicunaman cushcacunaca huiñaipajmi tiyanga.

PROVERBIOS 8:14

Ñucami cunangapajpish, alli yuyaita cuni. Alli yuyaipish, tucuita rurai tucujpish ñucallatajmi cani.

ISAÍAS 25:1

Mandaj Dios canmi ñuca Dios cangui. Mancharinacunata quiquin rurashcamantaca cambaj shutitaca jatunyachishami. Cambaj shutitaca alabashami. Ñaupaman quiquin imata ruranata yuyarishcataca chaitatajmi pajtachishcangui.

ISAÍAS 28:29

Tucui chaicunataca tucuita Mandaj Diosmi yachachin. Mancharinata cunaj cashcata, yallitaj yachaj cashcata ricuchingapajmi chashna yachachin.

ISAÍAS 5:19

Paicunaca: ¡Shamuilla can rurasha nicushcataca rurailla ña ricungapaj nincunami! C'uchuyamuilla, shamuilla Israelcunapaj jucha illaj Dios quiquin rurasha nicushcataca utca rurailla. Ima shina rimashcata ña yachangapaj nincunami.

JEREMÍAS 23:18

Chashna ningapajca paicunaca, ¿pitaj Mandaj Dios imata rurasha nicushcataca yachashcari? ¿Pitaj paita ricushca, pitaj paipaj shimitapish uyashcari? ¿Pitaj pai imata nishcata uyaracushcari?

JEREMÍAS 32:19

Canca jatun ruranacunata yuyarijmi cangui, sumajcunata rurajmi cangui. Tucui runacuna huahua huahua ima shinalla causajtaca, tucuitami cambaj ñahuihuan ricucungui. Chaimantami tucuicunaman ima shinalla causashcamanta, imallata rurashcamantaca chai shinallataj cungui.

ZACARÍAS 6:13

Paimi, Mandaj Diospaj huasitaca shayachinga. Paica tucuicuna jatunyachishcami canga. Paica paipaj tiyarinapi tiyarishpami, tucuicunata mandanga. Paipaj c'uchupica, shujtaj curapishmi canga. Paicunaca ishquindijmanta cunanacushpami, sumajta causangacuna.

Hechos 13:48

Chashna huillashcata mana judiocuna uyashpaca, Jatun Diospaj Shimica sumajmari nishpami achcata cushicurcacuna. Chaimi huiñai causaipaj canacunaca tucuicuna crircacuna.

Hechos 2:23

Chaitaca Taita Diosca pai yachaj cashcahuanmi ima shina canata ñaupaman allichirca. Chaimantami cancunaca paitaca japishpa millai runacunapaj maquipi churashpa, chacatashpa huañuchichircanguichij.

Hechos 20:27

Taita Dios imallata munashcataca, mana pacashpami tucuita huillarcani.

Hechos 20:32

“Cunanca huauquicuna, Taita Diosmanpish, mana c'uyaipajta c'uyaj paipaj alli huillaimanpishmi cancunataca mingani. Chai alli huillaimi cancunataca ashtahuan ashtahuan sinchiyachishpa catinga. Jucha illajta rurashcacunapura japina cashcatapishmi tucuicunaman cunga.

Hechos 26:18

Can huillashpa ñahuita pascajpimi, paicunaca amsamanta luzman cutirishpa Satanaspajta ruracushcata saquishpa Taita Diospajta rurangacuna. Ñucata crishpami juchacunamantapish quishpichishcacuna canga. Chashna cashpami Taita Diospajlla cajcunahuan herenciata japingacuna” nircami.

Hechos 4:28

Can ñaupaman chashna rurasha nishpa yuyarishca shinallatajmi, paicunaca rurarcacuna.

Romanos 11:34

Chaimanta ¿pitaj Jatun Diospaj yuyaitaca entendirca? Mana cashpaca ¿pitaj paipaj cunajca cashca canga?

Romanos 8:17

Diospaj huahuacuna cashpaca, herenciata japijcunapishmi canchij. Diospaj herenciata japijcuna cashpaca, Cristohuanmi herenciata japijcuna canchij. Paihuan llaquita apashpaca, paillahuantajmi jatunyachishca cashun.

Romanos 8:28

Diosta c'uyajcunapajca tucui ima llaquicunaca, paicunapaj allipajllataj shamuj cashcatami yachanchij. Chaicunaca, Dios imapaj cayashca shina cajcunapajllami.

Romanos 8:29

Diosca pai agllasha nishcacunataca, paipaj Churiman rijchajta rurangapajmi ñaupaman ch'icanchirca. Achca huauquicunapurapi Cristoca, punta Churi cachunmi chashnaca rurarca.

Romanos 8:30

Chai ch'icanchishcacunatami cayarca. Chai cayashcacunataca justificarcami, justificashcacunataca jatunyachircapishmi.

Romanos 9:11

Paicuna manaraj huacharijpi allitapish, mana allitapish manaraj rurajpimi, Diosca pai agllasha nishca shina agllarca. (Dios agllanaca mana rurashcacunamanta cashcata ricuchingapaj, ashtahuanpish pai agllasha nishca shina agllana catichunmi chashna rurarca).

Gálatas 3:18

Mandashcata rurashcamanta herenciata japina cana cajpica, ña mana Dios cushallami nishcamantachu canman. Ashtahuanpish Diosca, cushallami nishcatami Abrahammanca curca.

Efesios 1:14

Tucuimanta quishpichishpa pushajpi ñucanchij japina cashcata japingacama ricuchij cachunmi, chai Espiritutaca churarca. Pai sumaj cashcata alabachunmi chashna rurarca.

Efesios 1:18

Pai Diosca, cancunapaj yuyaipaj ñahuita achijyachishca cachunmi mañacuni. Chashna achijyachijpimi, cancunaca imata shuyanapaj cayashca cashcata, jucha illajcunahuan achcata charina sumaj herenciapish ima cashcata yachanguichij.

Efesios 1:5

Pai c'uyashcamantami Jesucristohuan shujlla tucujpi ñucanchijtaca, paipaj huahuacunata rurangapaj, pai munashca shinallataj ñaupaman agllarca.

Efesios 1:8

Chai jahuami, ñucanchijmanca tucui yachaisapa canata, yuyaisapa canatapish yallitaj curca.

Efesios 1:9

Alli yuyarishca pi mana yachashca pai munashca shina rurasha nicushcataca ñucanchijmanmi ricuchirca. Chaitaca ñaupamanmi paillataj rurasha nishca carca.

Efesios 3:11

Pai ima shina ruranata huiñaimanta yuyarishca shinallatajmi, ñucanchijta Mandaj, Cristo Jesuspi pajtachirca.

DEUTERONOMIO 4:20

Egiptomantaca fierrota yacuyachina hornomanta shina japishpami Mandaj Diosca cancunataca llujshichimurca. Cunan punlla ima shinami paipajlla canguichij, chai shinallataj cachunmi cancunataca llujshichimurca.

Colosenses 1:12

Ñucanchij jucha illajcuna achij llajtapi herenciata japijcunata ruraj ñucanchij Yayataca, cushicushpa pagui nijcuna cachunmi mañacunchijlla.

Colosenses 3:24

Chashna rurashcamantaca Mandaj Jesús cushca herenciata chasquina cashcataca yachanguichijmi. Cancunapaj Mandaj Jesusca Cristomi paipajtami ruracunguichij.

Tito 2:14

Tucui millaimanta llujshichishpa paipajlla pueblo cachun chuyayachishpa, paipajllata rurana yuyailla cajta rurangapajmi paillataj ñucanchijmanta curirca.

Tito 3:7

Chashnami Diosca mana c'uyaipaj cajpipish c'uyashpa, justificashpa chasquirca. Chaimantami ñucanchij japina cashca huiñai causaitaca, chai yuyailla shuyacunchij.

Hebreos 6:17

Shinallatajmi Diospish pai cusha nishcata japijcunamanca yallitaj cuj cashcatapish, pai cusha nishcata mana shujtajyachina cashcatapish ricuchingapajca, paipaj quiquin shutillapitajmi cushatajmi nirca.

Santiago 2:5

Ñuca c'uyashca huauquicunalla, caita uyaichij: Cancunataca cai pachapica huajchacunatami Diosca agllashca. Crishcapica charijcuna cachun, pai cusha nishca mandanapi japijcuna cachunmi chashna agllashca. Chaitaca paita c'uyajcunamanmi cusha nishca.

1 Pedro 1:4

Mana ismuj, mana mapayaj, mana chingarij herenciata jahua pachapi huaquichishcata cancuna japij cachunmi chashna rurarca.

1 Pedro 3:9

Cancunaca Dios allicunata cushcata japijcuna cachun cayashcata yachashcamantaca, cancunata llaquichijpipish ama chashnallataj ruraichijchu. Ima tucushca canman nijpipish, ama chashnallataj nichijchu. Chaipaj randica, Dios allicunata cushca cachun nichij.