DANIEL 9:7 - Dios Rimashca Shimicunami

⁷ Jatun Dios, quiquinca cashcatami rurashcangui. Ashtahuanpish ñucanchijca quiquinpaj ñaupajpica ima ñahui mana ricuripajmi tucushcanchij. Cunan punllaca judacuna cashpapish, Jerusalenpi causajcuna cashpapish tucui israelcunami urata, janajta maitapish cachashca c'uchullapi cashpa carupi cashpa causacunchij. Quiquinta mana cazushcamantami chashna causacunchij.

DANIEL 9:7 Iomraidhean Croise

ESDRAS 9:13

Tucui chai llaquicunaca ñucanchijllataj millai ruranacunata rurashcamanta, ñucanchij yallitaj millai juchacunata rurashcamantami ñucanchij jahuaman shamushca. Ashtahuanpish can ñucanchij Diosca canta p'iñachishcamanta llaquichina cashca shinatajca, mana llaquichishpami, cai ashacunallamanpish causaita cushpa tigrachimushcangui.

ESDRAS 9:15

Mandaj Dios israelcunapaj Dioslla, quiquinca cashcata ruraj cashpami, cai ashacunallapish miticushpa cunancama causachun saquishcangui. Ñucanchijca yallitaj juchayuj cashcamanta cambaj ñaupajpi mana caipaj cashpapish, cambaj ñaupajpimi canchij” nishpami, Diosta mañarcani.

NEHEMÍAS 9:33

Quiquinca cashcata ruraj cashpami, ñucanchij ima shina cashca shinallataj ñucanchij jahuaman llaquicunata cachashcangui. Ashtahuanpish ñucanchijmari mana allita rurashcanchij. Quiquinca imata mana pandata rurashcanguichu.

SALMOS 119:137

Mandaj Dioslla, quiquinca cashcata rurajmi cangui. Quiquin mandashcacunapish ima mana pandamari.

SALMOS 44:15

Punllantami pingai tucucunilla. Musparinacunamari ñahuita tapacunlla.

SALMOS 51:14

Taita Dioslla huañuchij canamanta huaquichihuai. Ñucata quishpichij Taita Dioslla. Quiquinpaj cashcata ruranataca ñuca c'alluca cantangami.

SALMOS 51:4

Quiquintaca p'iñachishcanimari. Juchallishpaca p'iñachishcanimari. Quiquinpaj ñaupajpica millaitamari rurashcani. Chaimanta rimashpaca rimana cajllapitajmi rimashcangui. Manapish rimana cajpica mana rimashcanguichu.

ISAÍAS 11:11

Chai punllacunapica cashnami tucunga: Mandaj Diosca mana huañushpa puchushcacunata prezu apashcacunata tigrachimungapajmi cutinllataj paipaj maquita alzanga. Paicunataca: Asiria, Egipto, Patros, Etiopía, Elam, Sinar, Hamat, mama cucha uripi caj llajtacunamantami tigrachimunga.

ISAÍAS 45:16

Paicunaca tucuicunami pingachishca, cumurichishca cangacuna. Imamanpish rijchaj dioscunata rurajcunaca cumurichishcami ringacuna.

JEREMÍAS 12:1

Mandaj Dioslla, canca ñuca imata nijpipish cashcata cutichinguillami. Shina cajpipish caitamari cantaca tapusha nipani: ¿Imamantataj canta mana cazujcuna cashpapish, alli causanllacunari? Canmanta anchurijcunapish sumajta causanllacunamari.

JEREMÍAS 23:6

Pai mandacui punllacunapica Judá llajtapajpish, israelcunapajpish ima llaqui mana tiyangachu. Cushicushpami causangacuna. Paitaca: Ñucanchijta mitsaj Mandaj Dios nishpami cayangacuna” ninmi.

JEREMÍAS 24:9

Tucui shujtaj llajtacunapi causajcuna mancharishpa parlanacuna, c'amishpa pingachina, shujtajcunatapish paicuna shina tucushca alli cachun ninatami ruragrini. Shinallataj yuyachij shimicunata paicunamanta surcunatapishmi ruragrini. Ñuca maijan llajtaman cachajpipish, chashnami cangacuna.

JEREMÍAS 3:25

Ñucanchij ñaupa yayacunapish, ñucanchijpish huambramantapacha cunancamamari juchata rurashpa, ñucanchijta Mandaj Diostaca p'iñachishpa causanchij. Chashna rurashca jahuamari, ñucanchijta Mandaj Dios rimashcatapish manataj uyashun nircanchij. Chaimantamari cunanca maita mana llujshipaj jatun llaqui tucushpa, pingaihuan huañucunchij” nircacunami.

JEREMÍAS 32:32

Tucui israelcuna, tucui Judá runacuna, paicunata jatun mandajcunandij, caishuj mandajcunandij, paicunapaj curacunandij, paicunaman huillajcunandij millaita rurashpa ñucata p'iñachishpa causashcamantami anchuchigrini. Tucui Judá llajtapi, Jerusalén pueblopi tucui causajcunallatajmi ñucata p'iñachircacuna.

JEREMÍAS 33:16

Chai punllacunapica, Judá llajtaca tucui llaquimanta quishpichishcami canga. Jerusalenpi causajcunapish ima manchai illajllami causangacuna. Paicunaca: Mandaj Diosmi ñucanchijpajca cashcata ruran ningacunami.

JEREMÍAS 4:17

Mandaj Diosca cashnami nin: “Cancunallataj ñucata mana cazushcamantami, chai soldadocunaca chagrata cuidacuj runacuna shina tucui pueblo muyundijta chapacuncuna.

JEREMÍAS 7:19

Paicunamari ñucataca p'iñachincuna. Chashna rurashpaca, paicunallataj jatunta pingai tucungapajmari llaquipi yaicuncuna” ninmi Mandaj Diosca.

EZEQUIEL 16:63

Chaita yuyarishpaca, pingaringuimi. Can imalla rurashcacunata ñuca perdonajpica pingarishpami, cutinca mana imata rimangui” ninmi Mandaj Jatun Diosca.

EZEQUIEL 36:31

Cancuna mana alli causashcatapish, imalla mana allita rurashcatapishmi yuyaringuichij. Chai millanana juchacunata rurashcamantaca, cancunallatajmi pingaringuichij.

EZEQUIEL 5:10

Chaimantami cancunapaj ñaupajllapitaj yayacunaca huahuacunata micunga. Shinallataj huahuacunapish yayacunatami micunga. Chashnami cancunataca llaquichisha. Ashtahuanpish saquirijcunataca, caita chaita cachashpami chingachisha.

EZEQUIEL 6:12

Carupi causajcunataca ungüimi huañuchinga, c'uchullapi causajcunataca espadami huañuchinga. Maijan saquirijcunaca, paicunata llaquichijcuna muyundijta shayacujllapitajmi yaricaihuan huañungacuna. Chashna rurashpami, ñuca p'iñarishcataca paicunapi pajtachisha.

DANIEL 9:14

Chaimi Mandaj Diosca llaquichina yuyailla tucushpa, cai llaquicunataca ñucanchij jahuaman cachashca. Ñucanchijta Mandaj Taita Dios rurashcacunaca tucui imapish chashna rurana cajpitaj rurashcami. Ñucanchijmari pai rimashcataca mana cazushcanchij.

DANIEL 9:18

Ñuca Dioslla, quiquinpaj rinrinta ñuca ladoman churashpa uyahuayari. Quiquinta mañana pueblo urmachishca shitashca siricujtaca ricuhuayari. Ñucanchijca allitamari rurashcanchij llaquihuayari nishpaca mana mañanchijchu. Ashtahuanpish quiquinpaj jatun c'uyaipi shunguta churashpallami, quiquintaca mañapanchij.

DANIEL 9:8

Mandaj Dios, ñucanchij jatun mandajcunapish, ñucanchij mandajcunapish, ñucanchij yayacunapish, ñucanchijllatajpish quiquinta p'iñachishpa juchallishcamantami cambaj ñaupajpica ima ñahui mana ricuripaj tucushcanchij.

AMÓS 9:9

Israelcunataca, ajichupi trigota shushushca shina cachunmi shujtaj llajtacunapi llaquita apachun cachasha. Chaipimi paicunaca, racu granolla ajichupi saquirij shina saquiringacuna. Shuj granollapish allpamanca mana urmangachu.

Romanos 6:21

Cancuna cunan pingaricuncunata rurashcamantaca ¿ima allitataj charircanguichij? Chaicunaca huañuimanmi chayachin.

DEUTERONOMIO 32:4

Paica ñucanchij miticuna jatun Rumimari. Pai rurashcacunapica ima panda mana tiyanchu. Paipaj ñancunapish ima mana pandachu. Paica mana llullaj Taita Diosmi. Paipica ima millai mana tiyanchu. Paica cashcata rurajmi, imata mana pandajmi.

DEUTERONOMIO 4:27

Mandaj Diosllataj cancunataca shujtaj llajtacunaman urata janajta cachajpimi urata janajta rishpaca chaicunapica ashacunalla saquiringuichij.