DANIEL 12:3 - Dios Rimashca Shimicunami

³ Yachaisapa cajcunaca, jahua pacha shina lamyacujmi canga. Cashcata ruranata achcacunata yachachijcunaca, luzerocuna shina huiñai huiñaita lamyacungallami.

DANIEL 12:3 Iomraidhean Croise

ÉXODO 34:35

Moisespaj ñahuita israelcuna ricushpaca paipaj ñahuitaca lamyacujllatataj ricujpimi, Taita Dioshuan cutin rimangapaj yaicungacama Moisesca cutinllataj linsohuan ñahuita taparij carca.

PROVERBIOS 11:30

Cashcata rurajcuna ima rurashcacunaca, causaita cuj yura shinami. Yachaisapa cashpamari, shujtajcunatapish alli ñanpi churancuna.

PROVERBIOS 3:35

Yachaisapacunaca, alli nishca canatami japingacuna. Ashtahuanpish rumi shungucunaca, jatun pingai tucunatami japingacuna.

PROVERBIOS 4:18

Ashtahuanpish cashcata rurajcunapaj causaica, pacarijpi achijlla inti llujshishpa, chaupi punllayajpi ashtahuan achijlla tucuj shinami.

ECLESIASTÉS 12:9

Huillaj ñucaca, ashtahuan yachaj tucushpaca gentecunamanpish ashtahuanmi alli yachaitaca yachachircani. Yuyaita churashpataj, callarishpa tucuita alli yuyarishpami, yuyaita japina proverbios nishca shimicunataca achcata quillcarcani. Sumajta allichishpa churashca chai shimicunataca uyachircanipish, rezashpa yuyarichun curcanipishmi.

ISAÍAS 53:11

Paipaj alma llaquita apashcamanta p'ucushca granota ricushpaca cushicushpami saquiringa. Paicuna mana allita rurashcataca pai aparishpami, cashcata ruraj ñucapajta rurajca pai yachaj cashcahuan achcacunata justificanga.

JEREMÍAS 23:22

Ñuca imata rurasha nicushcata ñuca huillacujpi uyashca cashpaca, ñuca huillachun nishcatamari ñuca agllashcacunamanca huillanmancuna carca. Chashna huillashpaca, paicunataca millai causaita, millai ruranacunata saquichishpa, alliman tigrachinmanmi carca.

DANIEL 11:33

Diospaj cajcunapuramanta yachaisapa cajcunaca achcacunatami yachachingacuna. Chai punllacunapica maijancunataca espadahuanmi huañuchinga. Maijancunataca ninahuanmi rupachinga. Maijancunataca prezumi apanga. Chashna rurashpaca paicuna ima charishcacunatapish apangacunami.

DANIEL 11:35

Diosmanta yachaisapa cajcunamanta maijancunapish ima mapa illajllata, chuyata, yurajllata rurashca cangapajmi llaquichishca canga. Paicuna llaquita apanaca punlla pajtangacamallami canga. Shina cajpipish chai punlla pajtanapajca illanrajmi.

DANIEL 12:10

Tucui chaicunahuanca achcacunami yurajllata, mapa illajllata rurashpa chuyajllata rurashca cangacuna. Diosta mana rijsijcunaca, Diosta mana rijsij shinallatajmi rurangacuna. Diosta mana rijsijcunaca, pi mana entendingacunachu. Ashtahuanpish entendijcunallami, caicunataca entendingacuna.

Mateo 13:43

Ashtahuanpish cashcata rurajcunaca, paicunapaj Yaya mandacunpimi inti shina achij nicungacuna. Maijanpish uyanapaj rinrinta charijca uyaichigari.

Mateo 19:28

Chaimi Jesusca: –Dios tucuita mushujyachi punllapimi, Runa Aichayujca paipaj sumaj jatun tiyanapi tiyaringa. Cancunapish ñucata catishcamantaca, chaipimi chunga ishqui jatun tiyanacunapi tiyarishpa chunga ishqui Israel aillucuna imalla rurashcata paicunaman ricuchinguichij. Chaica chashnatajmi canga.

Mateo 24:45

¿Maijanshi ima rurana cashcata chaitataj ruraj servijca canga? Amo paipaj huasipi cajcunaman carana horaspitaj carachun saquijpi, chashnataj ruraj servijmari alli runaca.

Juan 4:36

C'uchujpish c'uchushcamanta pagota japinmi. Chai c'uchushcaca huiñai causaipajmi. Chashna cajpimi c'uchujpish, tarpujpish ishquindijtaj cushicunga.

Juan 5:35

Juanca nina sindi shinami achijyachirca. Cancunaca paipaj luzpimi ashacama cushicurcanguichij.

Hechos 13:1

Antioquiapi caj tandanacushca crijcunapica profetacuna, yachachijcunami tiyarca. Paicunaca: Bernabé, Níger nishca Simón, Cirene pueblomanta Lucio, mandaj Herodeshuan ishqui huiñaj Manaén, Saulopishmi carca.

1 Corintios 3:10

Diosca paipaj mana c'uyaipajta c'uyaj canata ñucaman cushca shinallatajmi, huasichinata alli yachaj shina callarichircani. Chai callarichishca jahuapica, shujtajmi huasichicun. Ima shina huasichicushcataca cada quiquin alli yuyarichun.

Efesios 4:11

Paillatajmi shujcunataca apostolcuna, caishujcunataca profetacuna, chaishujcunataca alli huillaita huillajcuna, maijancunataca michijcuna yachachijcunapish cachun churarca.

Hebreos 5:12

Achca huatacunapica, ña yachachijcuna canapaj randica, Dios imallata nishca shimicunataca punta yachachishcallatataj cutin cutin yachachicunallamari tucushcanguichij. Sinchi micuita micunapaj randica, lechallata ubyacuj llullu huahuacuna shinamari tucushcanguichij.

2 Pedro 3:15

Ñucanchijta Mandaj Jesusca maijanpish quishpirichun nishpa mana utca shamushcata yuyaringuichij. Chashnallatajmi ñucanchij c'uyashca huauqui Pablopish Dios yuyaita cujpi quillcashca.

Apocalipsis 1:20

Ñuca alli lado maquipi canchis lucerocunata charicujta, canchis curi candelerocunata can ricushpa mana entendi tucushcapish cashnami: Canchis luzerocunaca, canchis llajtacunapi caj tandanacushca crijcunapaj angelcunami. Canchis candelerocunata ricushcaca, canchis pueblocunapi tandanacushca crijcunami.

JUECES 5:31

Mandaj Dioslla, canta p'iñajcunaca tucuicuna chingarishca cachun. Canta c'uyajcunaca achijlla inti llujshicuj shina ashtahuan achijyachicuj cachun” nishpami cantarcacuna. Israelcunapajca, chuscu chunga huatacunatami sumaj causai tiyarca.