Apocalipsis 20:4 - Dios Rimashca Shimicunami

⁴ Chaipica jatun tiyarinacunatami ricurcani. Chaicunapica, imalla rurashcacunata ricuchichun Dios churashcacunami tiyacurcacuna. Shinallataj ima shina cashcatataj Jesusmanta huillashcamanta, Diospaj shimita huillashcamanta, jatun animaltapish, chai animalman rijchajta rurashcatapish mana adorashcamanta, shinallataj jatun animalpaj sellota maquipi cashpa frentepi cashpa, mana churachishcamantapish cungata p'itishpa huañuchishcacunapaj almacunatapishmi ricurcani. Paicunaca causarishpami, huaranga huatacunata Cristohuan mandarcacuna.

Mushuj Testamento Diospaj Shimi

⁴ Chai huashaca, jatun tiyarinacunatami ricurcani. Chaipica, mandanata Dios cujpi chasquijcunami tiyarircacuna. Jesusmanta huillashcamantapish, Diospaj Shimita caźushcamantapish cungata pʼitishpa huañuchishcacunapaj almacunatapishmi, chaipi cajta ricurca. Paicunaca, manchanana animaltapish, chai animalman rijchajta rurashcatapish mana adorashcacunachu carca. Shinallataj chai animalpaj marcatapish, maquipipish frentepipish mana chasquircacunachu. Chaimantami, chashna huañuchishcacuna carca. Paicunaca causarishpami, huaranga huatata Cristohuan mandarcacuna.

Apocalipsis 20:4 Iomraidhean Croise

DANIEL 2:44

Chai jatun mandajcuna mandacui punllacunapimi, jahua pacha Taita Diosca nunca pi mana chingachina mandanata churanga. Chai mandanataca shujtaj llajtacuna mandachunca manataj saquingachu. Shujtaj mandanacunataca tucuitami ñutushpa chingachinga. Paica manataj chingaringachu.

DANIEL 7:18

Chaicunapaj q'uipaca, jahua pacha Taita Diospaj jucha illajcunami mandanata chasquingacuna. Mandanata paicuna japishpaca, huiñai huiñaitami mandangacuna nircami.

DANIEL 7:22

Shina cajpipish uni huatacunayuj Yuyaj shamushpami jahua pacha Diospaj jucha illajlla cajcunata mitsashpa paicunapaj allita rurarca. Jucha illajcunaca paicuna mandana punlla pajtajpimi, mandanata chasquirca.

DANIEL 7:27

Chashna rurashpaca mandanatapish, mandaj canatapish, achca llajtacuna tandanacushca mandanacunatapish, cai pachapi tucui cajcunataca jahua pacha Taita Diospaj jucha illajcunamanmi cunga. Chai mandanaca huiñaita mandanami canga. Chaipica tucui mandacujcunami pai mandashcallata ruracungacuna” nircami.

DANIEL 7:9

Ñuca ricucujllapitajmi jatun tiyanacunata churarca. Chai tiyanapica, uni huatacunayuj Yuyajmi tiyarirca. Paipaj churanaca rasu shina yuraj nicujmi carca. Paipaj uma ajchapish yuraj nicuj millma shinami carca. Paipaj jatun tiyanaca, lunyacuj ninami carca. Chai tiyanapaj ruedacunapish, nina lunyacujllatajmi carca.

MALAQUÍAS 4:5

Riquichij, Mandaj Dios llaquichingapaj shamuna jatun llaqui punllacuna manaraj shamujpimi, ñuca ima nishcata huillaj Eliastaca cancunapajman cachani.

Mateo 19:28

Chaimi Jesusca: –Dios tucuita mushujyachi punllapimi, Runa Aichayujca paipaj sumaj jatun tiyanapi tiyaringa. Cancunapish ñucata catishcamantaca, chaipimi chunga ishqui jatun tiyanacunapi tiyarishpa chunga ishqui Israel aillucuna imalla rurashcata paicunaman ricuchinguichij. Chaica chashnatajmi canga.

Mateo 24:10

Chaipica achcacunami ñucata caticushcamanta saquirishpa huañuchijcunaman caishuj chaishuj japichingacuna, caishujmanta chaishujmantapishmi p'iñanacungacuna.

Marcos 6:16

Chaimi Herodesca: –Cungata ñuca p'itichishca Juanmari causarishca canga. Paitajmi canga– nirca.

Marcos 6:27

Shina cashpapish jatun mandajca, Juanpaj umata p'itishpa apamuchun, shuj soldadota cachajpimi,

Marcos 9:11

Jesustaca: –¿Ima nishpataj mandashcata quillcajcunaca, Eliasrajmi shamunga nincuna?– nishpa tapurcacuna.

Lucas 1:17

Juanca Eliaspaj espirituhuan, Elías charishca poderllahuantajmi Quishpichijta ñaupashpa ringa. Yayacunapaj shungutaca, huahuacunata c'uyaj cachun tigrachingapaj, mana cazujcunatapish, cashcata rurajcuna shina cachun rurangapajmi chashna canga. Gentecunataca Mandaj Jesusta chasquinallata rurangapajmi chashna canga– nircami.

Lucas 14:14

Paicuna mana tigrachi tucushcamantaca Taita Diosmi cantaca cushichinga. Ashtahuanpish cashcata rurajcuna causari punllapimi can cushcamantaca Taita Diosca cunga– nircami.

Lucas 22:30

Chashna cujpimi ñuca mandacujpica, ñucahuan micunguichij, ubyanguichij. Cancunaca mandangapaj tiyarinapi tiyarishpami, chunga ishqui Israel aillucunata paicuna imalla rurashcata ricuchinguichij– nircami.

Juan 14:19

Cai pachapaj cajcunaca ashacamallami ñucataca ricungacuna. Chai q'uipaca ña mana ashtahuan ricungacunachu. Cancunaca ñucataca ricunguichijmi. Ñuca causacushcamanta, cancunapish causacunguichijllami.

Romanos 11:15

Israelcunata Dios anchuchishcaca mana israelcunata chasquingapajmi cashca. Shina cajpica israelcunata Dios cutin chasquijpica ¿manachu huañushcacunapuramanta causarishca shina canga?

Romanos 8:17

Diospaj huahuacuna cashpaca, herenciata japijcunapishmi canchij. Diospaj herenciata japijcuna cashpaca, Cristohuanmi herenciata japijcuna canchij. Paihuan llaquita apashpaca, paillahuantajmi jatunyachishca cashun.

2 Timoteo 2:12

Llaquicunatapish apashpaca, paihuanmi mandashun. Paita mana rijsinchijchu nijpica, paipish ñucanchijtaca mana rijsinichu ningami.

Apocalipsis 1:2

Dios imalla nishcatapish Jesucristo huillashcatapish, tucui imalla ricushcatapish Juanca alli huillajmi.

Apocalipsis 1:9

Ñucaca, cancuna shinallataj llaquita apacuj, cancunapaj huauqui Juanmi cani. Dios mandacunpipish cancunahuanmi cani. Jesucristo shinallatajmi alli shunguhuan llaquita apacuni. Diospaj shimita huillashcamanta, Jesucristota ima shina cashcatataj huillashcamantapishmi ñucaca cai jatun yacu chaupipi tiyaj Patmos llajtapi churashca cani.

Apocalipsis 11:11

Chashna cajpipish quimsa punlla chaupi q'uipaca, causaita cuj espirituta Dios cachajpi paicunapi yaicujpimi jatarishpa shayarircacuna. Chaita ricujcunataca, tucuicunatami jatun manchai japirca.

Apocalipsis 11:15

Sujtapaj q'uipa ángel trompetapi tocajpica, cielopica sinchita cashna caparishcami uyarirca: “Allpa pachapi mandanacunaca ñucanchij Jatun Diospaj, paipaj Churi Cristopajpishmi tucushca. Paimi huiñai huiñaita mandanga” nircami.

Apocalipsis 11:3

Chaipimi ñucamanta imallata ricushcata huillachun ishqui huillajcunata cachasha. Paicunaca llaquilla cashcata ricuchingapajmi, cañamazuta churarishca 1.260 punllacunacama ñucamanta huillangacuna.

Apocalipsis 11:7

Paicuna huillanata tucuchijpica, manchanana jatun animalmi ucujta jutcumanta llujshishpa paicunahuan jatunta macanacushpa, mishashpa huañuchinga.

Apocalipsis 12:11

Chai huauquicunaca, Ovejapaj yahuarhuan, paipaj shimita huillashcahuanmi diablotaca misharcacuna. Quiquin causaita mana llaquishpami huañuchingacama huillarcacuna.

Apocalipsis 14:11

Paicuna llaquita apacunmantaca, huiñai huiñaitami cushnica llujshicungalla. Animalta, paiman rijchajta rurashca animalta adorajcunapish, chai animalpaj shutita ricuchij sellota churachijcunapish tutapish, punllapish mana samashpami llaquitaca apacungalla” nircami.

Apocalipsis 15:2

Shinallataj ninahuan chagrushca vidrio shina mama cucha yacutapishmi ricurcani. Jatun animaltapish, chai animalman rijchajta rurashcatapish, paipaj shutita ricuchij sellota, paipaj shutipaj numerotapish mana churachishpa mishajcunatapishmi ricurcani. Paicunaca vidrio shina mama cucha c'uchupimi, Dios cushca arpacunata apashca shayacurcacuna.

Apocalipsis 17:8

Can ricushca jatun animalca ñaupamanca tiyarcami, cunanca ña illanmi. Chai jatun animalca jatun llaquipi chingarinaman ringapajllami ucujta jutcumanta ñalla llujshimugrin. Ñaupaman tiyaj, cunanca illaj, shamunapaj caj jatun animal cutin shamujpica, allpa pachapi causajcuna ricushpaca achcatami mancharingacuna. Chaicunaca causanaman rinapaj libropi paicunapaj shuticunata allpa pachata rurashca pachamanta mana quillcashcacunami chashna mancharingacuna” nircami.

Apocalipsis 2:26

Tucuita mishashpa ñuca munashcallata rurashpa tucuringacama catijtaca llajtacunata mandajtami ñucaca rurasha.

Apocalipsis 20:6

Punta causarinapi causarijcunaca Diospajlla cajcunami. Paicunaca alli nishcacuna cachun. Q'uipa huañuica, paicunataca imata mana rurai tucunchu. Ashtahuanpish paicunaca Diospajpish Cristopajpish curacunami cangacuna. Paicunaca Cristohuanmi huaranga huatacunacama mandangacuna.

Apocalipsis 22:5

Chaipica, tutaca mana tiyangachu. Mandaj Taita Dios paicunata achijyachishcamanta achijyachij lamparatapish, intitapish ña mana minishtingacunachu. Paihuanmi huiñai huiñaita mandangacuna.

Apocalipsis 3:21

Llaquicunata mishajtaca ñuca jatun tiyarinapimi, ñucahuan tiyachisha. Ñucapish mishashcamantami, ñuca Yayahuan paipaj jatun tiyarinapi tiyarircani.

Apocalipsis 4:4

Jatun tiyarina muyundijtaca, ishqui chunga chuscu tiyarinacunami tiyarca. Chaicunapica, ishqui chunga chuscu ancianocunami tiyacurca. Chai tiyacujcunaca yurajlla churanacunata churashca, umapipish curi coronacunata churashcatami ricurcani.

Apocalipsis 6:9

Chuscupaj q'uipa sellashcata Oveja pascajpica, Diospaj shimita huillashcamanta, huillashca shinataj causashcamanta huañuchishcacunapaj almacunatami, altar ucupi ricurcani.

Apocalipsis 7:3

cashna nirca: “Ñucanchij Diospajta rurajcunata frentepi sellota churangacama, cai pachatapish, mama cucha yacutapish, yuracunatapish ama ima llaquita ruraichijchu” nircami.