Apocalipsis 2:14 - Dios Rimashca Shimicunami

¹⁴ Chashna cajpipish, can rurashcacunaca ashacunamari mana ñuca munashca: Balaam yachachishcata mana saquisha nijcunatami charicunguiraj. Chai Balaamca rurashcalla dioscunaman cushcata micushpa, huainayashpa israelcuna pandarichun yachachi nishpami, Balactaca yachachirca.

Mushuj Testamento Diospaj Shimi

¹⁴ Shina cajpipish, cantaca asha juchachinata charinimari: Balaam shuti runa yachachishcata mana saquisha nijcunatamari charicunguiraj. Balaamca, israelcunata pandachingapajmi Balac runataca, rurashcalla dioscunaman cushca aichata paicunaman carachunpish, inquitashpa huainayachichunpish yachachirca.

Apocalipsis 2:14 Iomraidhean Croise

ISAÍAS 57:14

Chaipica: “Ñantaca llambujllata ruraichigari. P'ichaichigari. Ñuca agllashcacuna purichun ñitcarinacunata ñanmanta anchuchichij” ningami.

JEREMÍAS 6:21

Mandaj Diosca cashnapishmi nin: “Ñucaca cai runacuna urmachunca, ñucatajmi ñitcarinacunata churani. Chaicunapi ñitcarishpami yayacunapish, churicunapish urmangacuna. C'uchullapi causajcunandij, paicunahuan apanacujcunandijmi huañungacuna” ninmi.

EZEQUIEL 3:20

Shinallataj cashcata ruraj runapish, cashcata ruracushcata saquishpa, millaita rurajpica, ñucami pai tsagnarishpa urmanataca churasha. Can mana paita cunashpa rimajpica, millaita rurashcamantami huañunga. Cashcata pai rurashcacunatapish manataj yuyarishachu. Pai huañujpica, cambaj jahuami canga.

EZEQUIEL 44:12

Paicunaca rurashcalla dioscunallata servishpami, israelcunataca millaita rurachishpa pandachircacuna. Chashna millaita rurachichishcamantaca, llaquita apangacunami. Mandaj Jatun Dios ñucatajmi, ñuca maquita huichi alzashpa chashna nini.

NÚMEROS 24:14

Cunanca ñucaca ñuca gentecunapajmanmi ña rigrini. Shina cashpapish, q'uipa punllacunapi israelcuna cambaj gentecunata imata rurana cashcata huillangapaj shamui– nircami.

NÚMEROS 31:16

Chai huarmicunami Balaam runa mandashcata uyashpa israelcunataca Baal-peor nishca diosta adoranaman pushashpa Mandaj Diospaj ñaupajpi juchallichirca. Chaimantami Mandaj Diosca huañuchij llaquita cachashpa israelcunataca huañuchirca.

NÚMEROS 31:8

Chaicunata huañuchishca jahuapish Madián llajtata jatun mandajcunataca Evi, Requem, Zur, Hur, Reba shuti pichca jatun mandajcunatapishmi huañuchirca. Beorpaj churi Balaamtapish espadahuanmi huañuchirca.

Mateo 18:7

¡Aij, cai pachapi causaj pandachijcunalla! Cai pachapica pandarinacunaca tiyanataca tiyangallatajmi. Chashna cajpipish ñucata ama catichun pandachijcunaca ¡aij, imachari tucunga!

Hechos 15:29

Rurashcalla dioscunaman cushcata ama micunguichij, yahuartapish, sipishpalla huañuchishca aichatapish ama micunguichij, ama huainayanguichij. Caicunata cazushpaca, allitamari ruranguichij. Allilla cashca canguichij” nishpami quillcarcacuna.

Hechos 21:25

Mana judío cashpapish crijcunamanca, ñucanchijca ñami cashna nircanchij: Rurashcalla dioscunaman cushcacunata ama micunguichij, sipishpa huañuchishca aichatapish, yahuartapish ama micunguichij, ama huainayanguichij nishpallami quillcarcanchij– nircacunami.

Romanos 11:9

Davidpish cashnami nin: “Paicunapaj jatun micuicunaca tsagnarishpa urmana shina, linchi shina tucuchun. Chaicunaca ñitcachij, llaquichij cachun.

Romanos 14:13

Chaimanta caishuj chaishuj ama ashtahuan juchachinacushunchijchu. Ashtahuanpish huauquita ñitcachinata, tsagnarichishpa urmachinataca ama yuyashun ninacuichij.

Romanos 14:21

Aichata micushpapish, vinota ubyashpapish, cambaj huauquita p'iñachina, irquiyachina, ñitcachina cajpica, chaicunata mana ruranami ashtahuan alli.

Romanos 9:32

¿Ima nishpashi chashna tucurca? Paicunaca Mandashcapi nishcacunata rurashpalla, justificashca canata mashcashpami, mana crishpa chashna tucurcacuna. Chaimantami paicunaca, ñitcana rumipi ñitcarcacuna.

1 Corintios 1:23

Ashtahuanpish ñucanchijca, Cristota chacatashcatami huillacunchij. Chaica judiocunapajca ñitcanapajmi, mana judiocunapajca musparishca huillashca shinallami.

1 Corintios 7:2

Shina cajpipish huainayana munaicuna tiyashcamanta, c'arica quiquin huarmita charichun, huarmipish quiquin cusata charichun.

Hebreos 13:4

Cazaranaca tucuicuna alli nishca cachun. Paicuna chayarinacunapish chuya cachun. Ashtahuanpish apanacushpa causajcunata, huainayajcunataca Diosmi paicuna ima shina cashcataca ricuchinga.

JOSUÉ 24:9

Chai q'uipaca, Zipor runapaj churi jatun mandaj Balacmi, pai mandacushca Moabpi causajcunata pushashpa cancunahuan macanacungapaj jatarircacuna. Chai jatun mandaj Balacmi, Beor runapaj churi Balaamtaca, cancunata llaqui tucushca canman nichun cayanaman cacharca.

1 Pedro 2:8

Shinallataj: “Ñitcana rumimi, urmachij jatun rumipishmi” nishcami pajtashca. Paicunaca Diospaj shimita mana cazushcamantami ñitcancuna. ¡Paicuna mana cazushcamantami ñaupaman chashna tucuchun nishca!

2 Pedro 2:15

Paicunaca Beorpaj churi Balaampaj rurashcata catishpami alli ñanmantaca anchurishcacuna. Balaamca millaita rurashcamanta cullquita japinata munaj cashcamantami,

Judas 1:11

¡Aij, chashna rurajcunalla! Caín shinallatajmari mana allita rurashcacuna. Cullquita munashcamantaca Balaam shinallatajmari pandarishcacuna. Mana cazushcamantaca Coré shinallatajmari chingarishcacuna.

Apocalipsis 2:20

Shina cajpipish can rurashcacunataca caitami mana munani. Chai Jezabel huarmitamari mana jarcashpa saquinguilla. Paica profetami cani nishpamari umashpa, ñucapajta rurajcunataca huainayachun, rurashcalla dioscunaman cushcata micuchun, yachachicun.

Apocalipsis 2:4

Chashna cajpipish canpica, shuj mana allitami ricuni. Canca punta c'uyaitami saquishcangui.

Apocalipsis 21:8

Shina cajpipish manchajcunaca, mana crijcunaca, millashcacunaca, huañuchijcunaca, apanacushpalla causajcunaca, brujocunaca, rurashcalla dioscunata adorajcunaca, tucui llullajcunapish paicuna japina cashcataca azufrehuan rupacuj nina cuchatami japingacuna. Chaica q'uipa huañuimi” nircami.

Apocalipsis 22:15

Ashtahuanpish allcucunaca, brujocunaca, huainayajcunaca, huañuchijcunaca, rurashcalla dioscunata adorajcunaca, llullaj canata c'uyashpa llullajcunaca, tucuicunami canllapi saquiringacuna.