Apocalipsis 15:4 - Dios Rimashca Shimicunami

⁴ Jatun Dioslla ¿pitaj cantaca mana manchangari? ¿Pitaj Cambaj shutitaca mana jatunyachingari? Canllamari jucha illaj cangui. Cantaca ima shina rurashca shinataj ricuchij cajtami ricushcacuna. Chaimantami tucui llajtacunamanta shamushpa adorangacuna” nircami.

Mushuj Testamento Diospaj Shimi

⁴ Mandaj Dioslla, ¿pitaj Quiquintaca mana manchangari? ¿Pitaj Quiquintaca mana sumajyachingari? Quiquinllamari ima jucha illaj cangui. Cashcatataj Quiquin rurashcata ricushcamantami, Quiquintaca tucui llajtacunamanta shamushpa adorangacuna» nishpami cantarcacuna.

Apocalipsis 15:4 Iomraidhean Croise

SALMOS 105:7

Paica Mandaj Dios, ñucanchij Taita Diosmari. Paipaj shimicunaca tucui cai pachapimari.

SALMOS 111:9

Paipaj cajcunamanca quishpirinatamari cachashca. Paicunahuanca huiñaipajmari shuj ruranata ari nirca. Paipaj shutica ima jucha illaj, manchanamari.

SALMOS 22:23

Mandaj Diosta manchajcunaca paita alabaichigari. Jacobpaj huahua huahuacuna paitaca jatunyachichigari. Cancunaca Mandaj Diosta manchaichij. Israelpaj huahua huahuacunami canguichij.

SALMOS 22:27

Tucui pachapi causajcunami, Mandaj Diosta yuyarishpa paiman cutiringacuna. Tucui laya aillucunami, paipaj ñaupajpi adorangacuna.

SALMOS 22:3

Ashtahuanpish quiquinca jucha illajmari cangui. Israelcuna alabacun chaupipimi causangui.

SALMOS 86:9

Jatun Dios, quiquin rurashca tucui llajtacunami quiquinpaj ñaupajman shamushpa adorangacuna. Quiquinpaj shutitami sumajyachingacuna.

SALMOS 89:7

Jucha illajcuna achca tandanacushcapica manchana Taita Diosmari cangui. Tucui cambaj muyundijpi tiyacujcuna chujchuna Taita Diosmari cangui.

SALMOS 97:8

Mandaj Dioslla quiquin cashcata ruraj cashcata Judapaj ushushicuna uyashpaca cushicurcamari. Chaita Sión uyashpaca cushicurcamari.

SALMOS 99:5

Mandaj ñucanchij Taita Diosta jatunyachichij. Paipaj chaqui ñaupajpi cungurichij. Paica jucha illajmi.

SALMOS 99:9

Mandaj ñucanchij Taita Diosta jatunyachichij. Paipajlla urcu chaquipi cungurichij. Mandaj Dios, ñucanchij Taita Diosca ima jucha illajmari.

ISAÍAS 24:15

Chashna cashcamantaca Mandaj Diostaca, pugru pambacunapi causajcuna alabaichigari. Mama cucha uripi causajcunapish israelcunata Mandaj Diostaca jatunyachishca cachun.

ISAÍAS 25:3

Chashna rurashcamantaca c'ari c'ari runacunami cantaca alli ningacuna. Sinchi pueblopi causaj c'ari c'ari gentecunapish cantaca manchangami.

ISAÍAS 26:9

Tutapish ñuca almahuanmi quiquintaca munani. Ñucapi caj espíritu ñucapi causashca camaca cada tutamantami quiquinta utca mashcasha. Cai pachapi quiquin cashcata rurashpa mandajpimi, cai pachapi causajcunaca cashcata ruranaca ima cashcata yachangacuna.

ISAÍAS 45:23

Ñucatajmi chashnatajmi rurasha nircani. Cashcatataj rurana shimicunaca ñuca shimimantami llujshin. Chashna nishcaca mana huashaman tigrarishcachu canga. Ñuca ñaupajpica tucuicunami cunguringacuna. Tucuicunami ñuca shutipi imatapish rurashun ningacuna.

ISAÍAS 57:15

Jahuajman caj, tucuita yalli jatun, huiñaita causacuj, jucha illaj shutica cashnami nin: “Ñucaca jahuajman ima jucha illajpimi causani. Ashtahuanpish ñucaca llaquihuan cajcunahuan, mana jatun tucushcacunahuanmi causani. Mana jatun tucushcacunata, shungu p'aquirishcacunata jatarichingapajmi paicunahuan causani.

ISAÍAS 6:3

Paicunaca caishuj chaishujmi: “¡Tucuita Mandaj Diosca, jucha illaj, jucha illaj, jucha illaj Diosmari! ¡Tucui allpapish paipaj achij nicuj cashcahuan jundamari!” nijcunami carca.

ISAÍAS 60:5

Chaita ricushpaca achijllami tucungui. Chaipitajca cambaj shungu mancharishpa pascaringami. Mama cuchapi tiyaj sumaj charinacunapishmi cambajman tigranga. Llajtacunapi tiyaj charinacunami cambajman chayamunga.

JEREMÍAS 10:7

Tucui llajtacunata Jatun Mandajlla, ¿cantaca pitaj mana manchangari? Tucui cai pacha llajtacunapi causaj jatun yachajcunapurapipish, tucui jatun mandajcunapurapipish can shina jatunca mana tiyanchu.

JEREMÍAS 16:19

Mandaj Dioslla, canmari ñucata pacajpish, ñucaman fuerzata cujpish cangui. Llaquihuan cajpipish, canmari huaquichihuangui. Tucui cai pacha llajtacunapi causajcuna cambajman shamushpamari, cashna ningacuna: “Ñucanchij yayacunaca imata mana rurai tucuj, yanga dioscunallatamari charishcacuna. Chaicunaca imata mana cui tucuncunachu.

JEREMÍAS 5:22

Mandaj Diosca cashnami nin: Ñucataca manamari manchanguichijchu, manamari ñuca ñaupajpica chujchunguichijchu. Ñucamari mama cucha maicama canatapish churarcani. T'iyullatamari huiñaita yacu muyundijta tiyachun churarcani. Shina cajpipish, ñuca mandashcamantaca mana pasanchu. Jatun huairahuan yacu huajiashpa jatarishpapish, mana maitapish rinllachu. Mana chai t'iyumanta pasanchu.

OSEAS 3:5

Chai q'uipami israelcunaca Mandaj paicunapaj Taita Diosta, paicunata jatun mandaj Davidta mashcangacuna. Tucuri punllacunapica Mandaj Diostami manchangacuna. Pai cushcacunatami chasquingacuna.

HABACUC 1:12

Ñucata Mandaj jucha illaj Taita Dioslla, canca imapish manaraj tiyaimantapachami causacungui. Chashna cashcamanta, ñucanchijca manataj huañushunchu. Mandaj Dioslla, llaquichichunmari paicunataca caipica churarcangui. Ñuca jatun Rumilla, llaquichichunmari paicunataca callarichircangui.

ZACARÍAS 14:16

Chai q'uipami, Jerusalenpi causajcunahuan macanacunaman shamuj llajtacunamanta mana huañujcunaca tucuita Mandaj Jatun Diostaca huatan, huatanta adoranaman huichiyangacuna. Diospajlla carpa huasicunata rurashcamantapishmi fiestata rurangacuna.

ZACARÍAS 2:11

Chai punllapica, Mandaj Dios ñucapajmanca, achca llajtacunamantami tandanacumungacuna. Chaimantaca ñucapajllami tucungacuna, ñucapish paicunahuanmi causasha” ninmi. Chashna rurashcata ricushpami, tucuita Mandaj Diosllataj ñucata cancunapajman cachashcataca yachanguichij.

MALAQUÍAS 1:11

Ñucaca inti llujshinpi tiyaj llajtacunamantaca, inti huashicunpi tiyaj llajtacunapi causajcunacama rijsishcami cani. Chaimantami tucuipi ñucamanca inciensotapish, imalla cuna cashcatapish mapa illajllata cuncuna. Chaimanta ñucaca tucui llajtacunapi rijsishcami cani. Tucuita Mandaj Diostajmi chashna nini.

Romanos 15:9

Mana judiocunapish paicunata Dios llaquishcamanta, paita jatunyachichunmi Jesusca shamurca. Quillcashcapipish cashnami nin: “Mana judiocunapurapimi, canmantaca huillasha, cambaj shutitami cantasha” ninmi.

1 Pedro 1:16

Quillcachishcapica: “Ñucaca ima jucha illajmi cani, cancunapish ima jucha illajlla caichij” ninmi.

Apocalipsis 11:15

Sujtapaj q'uipa ángel trompetapi tocajpica, cielopica sinchita cashna caparishcami uyarirca: “Allpa pachapi mandanacunaca ñucanchij Jatun Diospaj, paipaj Churi Cristopajpishmi tucushca. Paimi huiñai huiñaita mandanga” nircami.

Apocalipsis 14:7

Chai angelca: “¡Diosta manchaichij, paitaca jatunmari cangui nichij. Imalla rurashcata Dios ricuchishpa llaquichinaca, ñamari chayamushca. Chaimanta cielota, allpa pachata, mama cucha yacuta, llujshicuj yacucunatapish rurajta adoraichij!” nishpami, sinchita caparirca.

Apocalipsis 16:5

Chai q'uipaca yacucunata mandaj ángel, cashna nicujtami uyarcani: “Jatun Dios, canca imatapish cashcata ruraj cashpami cashcata rurashpa cashna llaquichishcangui. Canca jucha illaj Diosmi cangui, cunanpish, sarunpish canllatajmi cangui.

Apocalipsis 16:7

Altar chaimantaca shujtajpish: “¡Tucuita Rurai Tucuj Mandaj Taita Dios, canca cashcatataj rurashpami llaquichingui!” nijtami uyarcani.

Apocalipsis 19:2

Paica, imatapish ima shina cashcatataj ricuchishpa llaquichijmi. Chashna cashpami huainayashpalla causaj huarmi paipaj huainayanahuan allpa pachapi causajcunata yallitaj millaita rurachishcamantaca ña llaquichishca. Diospajta rurajcunata paipaj maquihuan huañuchishcamantami paitapish tigra llaquichirca” nircacunami.

Apocalipsis 19:8

Paipaj huarmimanca linomanta rurashca lamyacuj churanatami churachun curca. (Linomanta, rurashca churanaca Diospajlla cajcuna imatapish cashcata rurashpa causashcatami ricuchin)”.

Apocalipsis 3:7

Filadelfia pueblopi caj tandanacushca crijcunapaj angelmanpish quillcai: “Jucha Illaj, Mana Llullajca, Davidpaj llavetami charicun. Pai pascajpica pi mana huichcai tucunchu. Pai huichcajpica pi mana pascai tucunchu. Paica caitami nin:

Apocalipsis 4:8

Chai causaiyuj chuscucunaca, tucuicunami sujta alascunata charircacuna. Chai alas jahuapipish, ucupipish ñahui luluncunahuan jundami carca. Paicunaca punllapish, tutapish mana samashpami: “¡Jucha illaj, jucha illaj, jucha illajca Jatun Diosmi. Tucuita Rurai Tucuj Taita Diosmi. Paica sarunpish, cunanpish paillatajmi. Paillatajmi shamunga!” nicurcallacuna.

Apocalipsis 6:10

Paicunaca: “Jatun Dioslla canca jucha illaj, imata rurasha nishcatapish rurajtajmi cangui. Allpapi causajcuna yahuarta jichashpa ñucanchijta huañuchishcamantaca ¿paicunataca maicamataj manaraj llaquichishpa shuyacungui?” nishpami sinchita caparircacuna.

1 SAMUEL 2:2

Mandaj Dios shina jucha illajca, mana tiyanchu. Can Dios shinaca pi shujtaj mana tiyanchu. Ñucanchij Dios shina huaquichijca pi mana tiyanchu.