Apocalipsis 14:1 - Dios Rimashca Shimicunami

¹ Chaita ricushca q'uipaca, Sión urcu jahuapi Oveja shayacujtami ricurcani. Paihuanca 144.000mi carca. Chaicunaca Ovejapaj shutitapish, paipaj Yayapaj shutitapish, frentepi quillcashcacunami carcacuna.

Mushuj Testamento Diospaj Shimi

¹ Chaita ricushca qʼuipaca, Malta Ovejataca Sion shuti urcu jahuapi 144.000 runacunata pushashca shayacujtami ricurcani. Paihuan shayacujcunaca, Malta Ovejapaj shutitapish, Paipaj Yayapaj shutitapish frentepi quillcashcami carca.

Apocalipsis 14:1 Iomraidhean Croise

SALMOS 2:6

“Ñucapajlla caj Sión urcu jahuapi mandachunca ñuca churashca jatun mandajtami churarcani.”

ISAÍAS 49:14

Ashtahuanpish Sionca: Mandaj Diosca ñucataca saquinmi. Jatun Diosca ñucataca cungarinmi nishcami.

JEREMÍAS 1:11

Chai q'uipaca Mandaj Diosca ñucataca: “Jeremías, ¿imatataj ricungui?” nishpa tapujpi, ñucaca: “Shuj almendro yura ramatami ricuni” nircani.

EZEQUIEL 1:4

Ñucaca, janaj ladomanta jatun acapana shamucujtapish, achca p'uyu jahuata nina pillurishca shamucujtapishmi ricurcani. Chai p'uyu muyundijtaca, achij nicurcami. Shinallataj nina chaupipica, bronceman rijchajmi achij nicurca.

EZEQUIEL 10:1

Querubincunapaj uma jahuapi caj pambajlla jahuapica, zafiro rumitatajllami ricurcani. Chaica jatun tiyarinaman rijchajmi carca.

EZEQUIEL 10:9

Chai querubincunapaj c'uchupica, chuscu ruedacunatapishmi ricurcani. Chai ruedacunaca querubincunapaj c'uchupimi carca. Cada querubinpaj c'uchupimi, shuj rueda tiyarca. Chai ruedacunaca crisólito rumiman rijchaj colorta rurashcami carca.

EZEQUIEL 2:9

Chashna nishpaca, ñucaman maquita chutacujtami ricurcani. Chai maquipica quillcashpa pilluchishca carata charicujtami ricurcani.

EZEQUIEL 44:4

Chai q'uipaca, Diospaj huasi ch'imbapurapi caj ura lado pungumanmi pusharca. Chaipica Mandaj Diospaj huasipica, paipaj achij nicuj jundashcatami ricurcani. Chaita ricushpaca, pambaman tupajtami cumurircani.

EZEQUIEL 8:7

Chashna nishpaca ñucataca, huasi canlla yaicunllamanmi pusharca. Ña chaipi cashpaca, patapimi shuj jutcuta ricurcani.

EZEQUIEL 9:4

Mandaj Diosca chai runataca cashnami nirca: “Jerusalén puebloman rishpa, chai pueblopi causajcuna yallitaj millaita rurashcamanta huacashpa capariricujcunata frentepi señalta churagri” nircami.

DANIEL 12:5

Chai q'uipaca Daniel ñucaca, shujtaj ishqui shayacujtami ricurcani. Shujca jatun yacu cai ladoman, caishujca ch'imba ladomanmi shayacurca.

JOEL 2:32

Mandaj Diosta mañajcunallami quishpiringacuna. Mandaj Dios nishca shinallatajmi Sión urcupi, Jerusalenpica quishpirina tiyanga. Chaipica israelcunapuramantaca, Mandaj Dios cayashcacunallami saquiringacuna.

AMÓS 8:2

Chashna ricuchishpaca: –Amós, ¿imatataj ricungui?– nijpica ñucaca: –Usya punllacuna p'ucushca granocunatami, taza junda tiyacujta ricuni– nircanimi. Chashna nijpica, Mandaj Diosca cashnami nirca: –Ñuca agllashca israelcuna tucurinami ña chayamushca. Cunantajca mana uniyashachu.

MIQUEAS 4:7

Chashnami patojoca, ñucapajlla saquiringa. Chingarishcacunata tandachishpami, jatun llajtata rurasha. Chai punllamantapacha Mandaj Diosmi paicunataca, Sión urcupi huiñaita mandacungalla.

ZACARÍAS 4:2

Chai angelca ñucataca: “¿Imatataj ricungui?” nishpami tapurca. Shina nijpica ñucaca cashnami nircani: “Curi candelerotami ricuni. Chai candelero jahuapica, aceiteta churanatapishmi ricuni. Shinallataj chai jahuapica, canchis lamparacuna tiyacujtapishmi ricuni. Chai lamparacunaca canchis tubocunatami charin.

Lucas 12:8

Cancunaman huillanimi: Shujtajcunapaj ñaupajpi ñucata catij cashcata huillajpica, Runa Aichayuj ñucapish Taita Diospaj angelcunapaj ñaupajpica caicunaca ñucata catijcunami nishami.

Romanos 9:33

Cashnami quillcashca tiyacun: “Riquichij, ñucaca Sionpimi ñitcachij rumitaca, urmachij jatun rumitaca churani. Maijanpish paipi crijtaca, mana pingachishcachu canga” ninmi.

Apocalipsis 14:14

Chai q'uipa ricushpaca, shuj yuraj p'uyutami ricurcani. Chai p'uyu jahuapica, Runa Aichayujman rijchajmi tiyacurca. Paipaj umapica, curi coronata churashca, maquipica quirusapa shuj hocesta aisashcami carca.

Apocalipsis 14:3

Paicunaca, jatun tiyarina ñaupajpi, causaiyuj chuscupaj ñaupajpi, ancianocunapaj ñaupajpipishmi, shuj mushuj cantota cantarcacuna. Chai cantotaca, pi mana yachai tucurcacunachu. Ashtahuanpish allpa pachamanta Dios quishpichishca 144milcunallami, chai cantotaca yachai tucurcacuna.

Apocalipsis 15:5

Chai tucuicunapaj q'uipaca, cielopica Diosta adorana huasi pascarijtami ricurcani. Chai ucupica, Dios mandashcata huaquichina Diospajlla ch'icanchishca ucumi carca.

Apocalipsis 22:4

Paitaca, ñahui ñahuimi ricungacuna. Paipaj shutitapish, paicunapaj frentepi churashcami canga.

Apocalipsis 3:12

Mishajtaca, ñuca Diospaj huasipaj pilartami rurasha. Chaimantaca, manataj llujshingachu. Paipica, ñuca Diospaj shutita, ñuca Diospaj pueblopaj shutitapish quillcashami. Chai puebloca jahua pacha ñuca Diospajmanta uriyamucuj mushuj Jerusalén shutimi canga. Mishajcunapica ñuca mushuj shutitapish quillcashami.

Apocalipsis 4:1

Chai q'uipaca jahua pachapica shuj pungu pascashcatami ricurcani. Trompetapi tocashca shina uyarij rimaihuan ñaupaman rimajllatajmi ñucataca: “¡Caiman huichiyamui, cunan can ricushcacuna ña pajtashca q'uipaca, imalla tucuna cashcata canman ricuchisha!” nirca.

Apocalipsis 6:8

Chaita ricushpaca, shuj quillu caballotami ricurcani. Chai caballopi tiyarishcaca, Huañuchij shutimi carca. Hadespish caticurcami: Paicunamanca cai pachata chuscupi chaupishca shuj partetaca jatun macanacuihuan, yaricaihuan, jatun ungüihuan, cai pachapi millai animalhuan huañuchi tucunatami curca.