Apocalipsis 13:15 - Dios Rimashca Shimicunami

¹⁵ Q'uipata ricurij animalmanca punta ricuj animalman rijchajta rurashcalla animalman causaita cuchunmi Diosca saquirca. Chai rurashcalla animalca ña rimashpaca paita tucui mana adorajcunataca huañuchichunmi mandarca.

Mushuj Testamento Diospaj Shimi

¹⁵ Qʼuipata ricurij animalmanca, punta ricurij animalman rijchajta rurashcaman samaita cuchunmi saquirca. Animalman rijchajta rurashca ña rimashpaca, paita tucui mana adorajcunatami huañuchichirca.

Apocalipsis 13:15 Iomraidhean Croise

GÉNESIS 2:7

Mandaj Taita Diosca runataca ñutu allpamanta rurashpa, paipaj singapi causaita cuj samaita p'ucujpimi, runaca causaiyuj tucurca.

SALMOS 115:5

Shimita charishpapish, mana rimancunachu. Ñahuita charishpapish, mana ricuncunachu.

JEREMÍAS 10:14

Chaita ricushpaca tucui runacunami: “Imata mana yachaj, upami canchij” nishpa yuyarincuna. Diosta rurajcunapish cullquita yacuyachishpa diosta rurashcamantaca, pingai tucunmi. Pai rurashca diosca yangallamari. Causaillatapish mana charincunachu.

JEREMÍAS 10:5

Maipi churajpipish palmera yura shayacuj shina, upalla shayacunllami. Mana purij cajpimi, maimanpish aparishpa apancuna. Chaicunataca ama manchaichijchu. Chaicunaca ima llaquitapish, ima allitapish mana rurai tucunchu” ninmi.

JEREMÍAS 51:17

Runacunaca tucuicunami upa tucuncuna, ima alli yuyaitaca mana charincunachu. Dioscunata rurajcunapish, paicuna rurashca dioscunaca yanga cashcamanta pingarincunami. Chai dioscunaca mana samaita charincunachu.

DANIEL 7:20

Paipaj umapi tiyaj chunga gachucunapish, gachucunapaj chaupimanta shuj uchilla gachu huiñashcapish, chai gachupaj ñaupajmanta quimsa gachucunata anchuchishcapish imata nisha nishcatapishmi tapurcani. Chai gachuca gentepaj ñahui shinatami charirca. Yallitaj millaita rimaj shimiyujmi carca. Chai gachuca tucui caishuj gachucunata yalli jatunmi ricurirca.

DANIEL 7:25

Jahua pacha Taita Diostapish p'iñashpami millai shimicunata rimanga. Jahua pacha Taita Diospaj jucha illajcunatapish llaquichingami. Huatacunatapish, mandashcacunatapish shujtajyachinatami yuyanga. Diospajlla cajcunaca quimsa huata chaupicamami paipaj maquipi churashca canga.

HABACUC 2:19

Caspi diosta: “Rijchari” nijcunalla, mana rimaj rumi diosta: “Puriyari” nijcunalla, ¡aij imachari tucungacuna! ¿Paicunaca cancunamanca imata yachachi tucungachu? Riquichij, chai dioscunaca curihuan cullquihuan jahuataca sumajta churashcallami. Paicunaca samaitaca mana charincunachu.

Santiago 2:26

Ima shinami alma illajlla cuerpoca huañushca. Chashnallatajmi ima rurashcacuna illajlla crijca huañushcallataj.

Apocalipsis 13:1

Mama cucha c'uchu t'iyu allpapica dragón shayacujtami ricurcani. Chai q'uipaca mama cucha chaupimantaca canchis umacunayuj, chunga gachucunayuj animal llujshicujtami ricurcani: Chai gachucunapica, chunga coronacunatami churashca carca. Chai canchis umacunapica Diosta c'amishpa rimashca shutitami quillcashca carca.

Apocalipsis 13:12

Paica, punta animal shinallataj mandaj cashcataca chai animalpaj ñaupajpimi mandashpa ricuchirca. Chaimi allpa pachatapish, chaipi causajcunatapish huañunalla chugrihuan cashpa alliyaj punta animalta adorachirca.

Apocalipsis 13:14

Punta animal jatun mancharinacunata rurai tucunata q'uipa animalman cujpimi, chaita rurashpa allpa pachapi causajcunataca umarca. Chaimantami q'uipa animalca allpa pachapi causajcunataca, espadahuan huañujta chugrichishca cashpapish causacuj animalman rijchajta ruraichij nirca.

Apocalipsis 14:11

Paicuna llaquita apacunmantaca, huiñai huiñaitami cushnica llujshicungalla. Animalta, paiman rijchajta rurashca animalta adorajcunapish, chai animalpaj shutita ricuchij sellota churachijcunapish tutapish, punllapish mana samashpami llaquitaca apacungalla” nircami.

Apocalipsis 14:9

Shinallataj ishquipaj q'uipa angelpish cashna nishpami sinchita huillarca: “Animaltapish, chai animalman rijchajta rurashcatapish adoraj, sellota maquipi cashpa, frentepi cashpa chasquijca,

Apocalipsis 16:2

Shina nijpi punta ángel rishpaca allpa pachamanmi copapi tiyacuj llaquitaca tallirca. Chashna tallijpica animalpaj sellota charijcunapaj, chai animalman rijchajta rurashca animalta adorajcunapajca jatunta nanachij ashnacuj chupucunami llujshirca.

Apocalipsis 16:5

Chai q'uipaca yacucunata mandaj ángel, cashna nicujtami uyarcani: “Jatun Dios, canca imatapish cashcata ruraj cashpami cashcata rurashpa cashna llaquichishcangui. Canca jucha illaj Diosmi cangui, cunanpish, sarunpish canllatajmi cangui.

Apocalipsis 17:14

Paicunaca Ovejahuanmi macanacunga. Ovejaca Mandajcunapajpish Mandaj, Jatun Mandajcunapajpish Jatun Mandaj cashcamantaca paimi mishanga. Paihuan cajcunapish Dios agllashpa cayashcacunami, paillapi shunguta churajcunami” nircami.

Apocalipsis 17:17

Diosca pai rurasha nicushcata pajtachingapajmi paicunataca: Tucuicuna shuj yuyailla tucushpa, jatun animalman mandanata cuna yuyai tucuchunpish saquirca. Diospaj shimipi huillashca shina pajtangacamallami chai animalca mandanga.

Apocalipsis 17:6

Chai huarmitaca, Diospajlla cajcunata huañuchishca yahuarhuan, Jesusmanta huillacushcamanta huañuchishcacunapaj yahuarhuanpish machashcatami ricurcani. Chaita ricushpaca, ñucaca achcatami mancharircani.

Apocalipsis 18:20

Chai pueblo chashna tucushcamantaca cielopi tucui tiyajcunapish, Diospajlla cajcunapish, apostolcunapish, profetacunapish cushicuichij. Cancunata llaquichishcamantaca Diosca paicuna ima shina rurashca shinallatajmi paicunatapish llaquichishca”.

Apocalipsis 18:24

Shinallataj profetacunata, Diospajlla cajcunata, tucui allpa pachapi causajcunata huañuchishcacunapaj yahuarpish chai pueblopimi carca” nircami.

Apocalipsis 19:20

Jatun animaltapish, llullashpa huillajtapish prezumi japirca. Chai llullashpa huillajca jatun animalpaj ñaupajpi pi mana rurai tucuipaj mancharinacunata rurashpami jatun animalpaj sellota churachijcunatapish, chai animalman rijchajta rurashcata adorajcunatapish umashpa crichirca. Jatun animaltapish llullashpa huillajtapish causajtami ishquindijtataj azufrehuan rupacuj nina cuchapi shitarca.

Apocalipsis 20:4

Chaipica jatun tiyarinacunatami ricurcani. Chaicunapica, imalla rurashcacunata ricuchichun Dios churashcacunami tiyacurcacuna. Shinallataj ima shina cashcatataj Jesusmanta huillashcamanta, Diospaj shimita huillashcamanta, jatun animaltapish, chai animalman rijchajta rurashcatapish mana adorashcamanta, shinallataj jatun animalpaj sellota maquipi cashpa frentepi cashpa, mana churachishcamantapish cungata p'itishpa huañuchishcacunapaj almacunatapishmi ricurcani. Paicunaca causarishpami, huaranga huatacunata Cristohuan mandarcacuna.