Apocalipsis 11:18 - Dios Rimashca Shimicunami

¹⁸ Tucui llajtapi causajcunaca p'iñarishcami, can p'iñarishpa llaquichinapish ñamari chayamushca. Huañushcacuna imallata rurashcata ricuchinapish ñamari chayamushca. Chaipimi canca, cambajta ruraj profetacunamanpish, jucha illajcunamanpish, cambaj Shutita manchajcunamanpish, uchillacunamanpish, jatuncunamanpish paicuna japina cashcataca cungui. Cai pachata chingachijcunata chingachinapish ñamari chayamushca” nircacunami.

Mushuj Testamento Diospaj Shimi

¹⁸ Tucui llajtacunapi causajcuna pʼiñarishpa jatarijpimi, Quiquinca pʼiñarishpa llaquichina tucushcangui. Huañushcacunatapish paicuna imalla rurashcata Quiquin ricuchina punllami chayamushca. Shinallataj Quiquinta servij, Quiquin ima nishcata huillajcunamanpish, Quiquinta manchaj, Quiquinpajlla causaj uchillacunaman, jatuncunamanpish, allita cuna punllamari chayamushca. Cai pachata tucuchijcunata chingachinapish, ñamari chayamushca» nircacunami.

Apocalipsis 11:18 Iomraidhean Croise

SALMOS 103:11

Paita manchajcunapajca, cai pachamanta jahua pachacamami, pai llaquij cashcataca jatunyachirca.

SALMOS 110:5

Jatun Diosca quiquinpaj alli ladopimari. Pai p'iñari punllapica jatun mandajcunataca ñutungamari.

SALMOS 147:11

Mandaj Diosca paita manchajcunahuanmi cushicun. Pai llaquij cashcata shuyajcunahuanmi cushicun.

SALMOS 2:5

Chashna rurashpaca jatunta p'iñarishpami rimanga. Pai p'iñarishcahuanca muspachingami.

SALMOS 85:9

Paita manchajcunata quishpichinaca ña c'uchuyamushcatajmi. Ñucanchij llajtapi, pai sumaj cashcahuan causanamari c'uchuyamucun.

ECLESIASTÉS 12:13

Cai tucuita yachachishca q'uipa, ña tucuchingapajca caitami nini: Diostaca manchashpa cazungui, pai mandashcacunatapish pajtachingui. Cai pachapi causajcunapajca, tucuimanta yalli allica chaimi.

ECLESIASTÉS 8:12

Juchata ruraj runaca, mashna cutin millaita rurashpapish, unita causanllami. Shina cashpapish ñucaca Diospaj munaita rurajcuna, paipaj ñaupajpi cazushpa causajcunapish alli llujshina cashcatapish yachanimi.

DANIEL 11:44

Inti llujshin ladomantapish, janaj ladomantapish huillanacuna shamushpami manchachinga. Chaita uyashpaca jatunta p'iñarishpami achcacunata chingachingapaj huañuchingapaj llujshinga.

DANIEL 7:26

Shina cajpipish cashcata ruraj Juez tiyarishpami, pai mandanataca quichunga. Pai mandanataca tucuitami ñutunga. Huiñaipajmi chingachinga.

DANIEL 8:25

Yachaj tucushca cashcamanta, ashtahuan ashtahuanmi umashpa catinga. Paipaj shungupica, yallitaj jatun cashcatami yuyanga. Cungaillapimi achcacunata chingachinga. Tucui mandajcunata Mandajhuanpish macanacungapajmi jataringa. Shina cashpapish gentecuna huañuchishca mana cashca cashpapish, chingachishcami canga.

Mateo 5:12

Chashna rurajpipish jatunta cushicushpa contentarichij. Cancuna jahua pachapi japina cashcaca tucuita yalli jatunmari. Cancunapaj ñaupa shamuj profetacunatapish, chashnallatajmi llaquichircacuna.

Lucas 1:50

¡Paita manchajcunataca huahua huahuacunatami llaquishpa c'uyacungalla!

Hebreos 9:27

Shinallatajmi gentecunatapish shuj cutinlla huañuchun churashca. Chai q'uipaca paicuna imalla rurashcata Dios ricuchina punllami canga.

Apocalipsis 10:7

Sujtapaj q'uipa ángel trompetapi tocana punllacunapi tocai callarijpimi, Diosca pi mana entendi tucuipaj pai rurasha nishcataca pajtachinga. Chaitaca paipajta ruraj profetacunaman pai huillachishca shinallatajmi pajtanga nircami.

Apocalipsis 11:2

Diospaj huasi canllataca saquilla, ama midingui. Chaitaca, mana judiocunaman cushcami. Paicunami jucha illaj pueblotaca, chuscu chunga ishqui quillacunata llaquichishpa sarungacuna.

Apocalipsis 13:10

“Maijanpish prezu apashca cana cajca, prezu apashcami canga. Maijanpish espadahuan huañuna cajca, espadahuan huañuchishcami canga”. Chaimantami jucha illajcunaca, mana p'iñarij alli shungu, crij caticunalla.

Apocalipsis 13:16

Shinallataj uchillacunata, jatuncunata, charijcunata, huajchacunata, amopajta rurajcunata, amopajta mana rurajcunatapish tucuicunata alli lado maquipi cashpa, frentepi cashpapish, ricuna sellota churachunmi mandarca.

Apocalipsis 14:10

Dios p'iñarishpa cachashca jatun llaquitami, machana vinota ubyaj shina paipish apanga. Diosca pai p'iñarishca jatun llaquitaca, imahuan mana chagrushca vinota shinami copapi churarca. Diospajlla angelcunapaj ñaupajpipish, Ovejapaj ñaupajpipishmi azufrehuan rupacuj ninahuan paicunataca jatunta llaquichishca canga.

Apocalipsis 15:1

Cielopica mana ricushca shujtaj jatun mancharinatami ricurcani: Chaipica, tucuri canchis llaquicunatami canchis angelcuna charicurcacuna. Chaicunahuanmi, Dios jatunta p'iñarishpa llaquichinaca tucurirca.

Apocalipsis 15:7

Chai causacuj chuscucunamanta shujmi, canchis angelcunamanca huiñai huiñaita causacuj Dios p'iñarishpa jatunta llaquichinahuan junda canchis curi copacunata curca.

Apocalipsis 18:6

Chai huarmimanca pai cushca shinallataj tigrachichij. Imalla rurashcamantaca chaupihuan yallita paimanca tigrachichij. Chagrushpa calizpi ubyachishcamantaca chaupihuan yallita chagrushpa paimancarin ubyachichij.

Apocalipsis 19:15

Tucui llajtacunapi causajcunata chugrichingapajmi paipaj shimimantaca puntasapa espada llujshirca. Paimi tucuicunata fierro varahuan mandanga. Tucuita Rurai Tucuj Diospaj p'iñarishca vinota capingapajmi uvacunata capinapi chaquihuan sarunga.

Apocalipsis 19:18

Jatun mandajcunapaj, soldadocunata mandajcunapaj, c'ari c'ari cajcunapaj, caballocunapaj, caballopi tiyarijcunapaj, amopajta rurajcunapaj, amopajta mana rurajcunapaj, uchillacunapaj, jatuncunapaj tucuicunapaj aichacunata micuj shamuichij” nircami.

Apocalipsis 19:5

Jatun tiyarina chaimanta shuj rimashca uyarishpaca: “Ñucanchij Diospajta ruraj, paita manchajcunaca, uchilla cashpapish, jatun cashpapish allimari cangui nichij” nircami.

Apocalipsis 20:12

Huañushcacunataca jatuncunatapish uchillacunatapish Diospaj ñaupajpi shayacujtami ricurcani. Librocunapish pascashcami carca. Causanaman rinapaj shujtaj libropish pascashcami carca. Huañushcacunaca paicuna ima shina cashcata librocunapi quillcashca shinallatajmi ricuchishca carca.

Apocalipsis 20:15

Causanaman rinapaj libropi mana quillcashca cajca nina rupacuj cuchapimi shitashca carca.

Apocalipsis 22:12

¡Riqui ñallami shamusha! Tucuicunaman imallata rurashca shinallataj japina cashcata cungapaj apashpami shamusha.