2 SAMUEL 22:9 - Dios Rimashca Shimicunami

⁹ Paipaj singamantaca cushnimi llujshirca, paipaj shimimantaca tucuchij nina t'itacujmi llujshirca. Carboncunapish pai japichishcami lunyacurca.

2 SAMUEL 22:9 Iomraidhean Croise

2 SAMUEL 22:13

Paipaj ñaupajmantaca achijnicujmi llujshirca. Chai achijnicujca carboncunata japichishpami nina lunyacujta rurarca.

2 SAMUEL 22:16

Mandaj Dios p'iñarishpa rimajpi pai singahuan p'ucujpica, mama cucha yacu asientopish, ricurircami. Cai pacha allpapaj shungupish ricunallami tucurca.

JOB 4:9

Diospaj samaillahuanmi huañuncuna, pai p'iñarishpa p'ucujllapimi chingarincuna.

SALMOS 18:15

Mandaj Dios, can yallitaj p'iñarishpa p'ucujpica, mama cucha yacu ucujpish ricunallami saquirirca. Cai pacha allpapaj shungupish ricunallami tucurca.

SALMOS 18:8

Paipaj singamantaca cushnimi llujshirca. Paipaj shimimantaca tucuchij ninami llujshirca. Paica lunyacuj nina brazustami shitarca.

ÉXODO 19:18

Mandaj Dios chai urcu jahuaman nina chaupipi uriyamujpimi tucui chai Sinaí urcu cushnirca. Hornomanta cushni llujshicuj shinami cushni llujshirca. Tucui chai urcuca yallitajmi chujchurca.

ÉXODO 24:17

Mandaj Dios sumaj jatun cashcaca israelcunapaj ñahuipica imatapish rupachishpa tucuchij jatun nina shinami urcu puntapi ricurirca.

ISAÍAS 30:27

Riquichij, Mandaj Diospaj shutica carumantami shamucun. Paipaj ñahuica nina lunyacuj shinami shamucun. Tucuchij nina lunyacuj shinami shamucun. Paipaj shimipica p'iñarishcahuan jundami. C'alluca tucuchij nina lunyacuj shinami.

ISAÍAS 30:33

Asiria llajtata jatun mandajta llaquichingapajca, Tofet nishca hornoca sarunmantamari allichishca tiyacun. Chai hornoca yallitaj ucujta, anchomanpish anchomi, achca yantata churashcami yallitaj lunyacun. Mandaj Dios p'ucushpami yacuyashca yallitaj achca azufrehuan chai hornotaca japichinga.

JEREMÍAS 15:14

Cancunatapish mana rijsishca llajtapimi p'iñajcunata servishpa causachun cachagrini. Cancunahuanca nina lunyacuj shina p'iñarishcami cani. Nina japirishpami cancunataca tucuchinga ninmi.

JEREMÍAS 5:14

Chaimantami tucuita Mandaj Diosca cashna nin: “Paicuna chashna nishcamantaca, cunanca ñuca nishcata can huillashca shimicunataca ninatami rurani. Paicunataca yantatami rurani. Cai shimicunaca paicunataca, yantata shinatajmi tucuchinga” ninmi.

HABACUC 3:5

Paipaj ñaupajmantaca, huañuicunami rirca. Paipaj chaquicunamantaca, nina rupacuj brazusmi llujshirca.

DEUTERONOMIO 32:22

Nina sindirij shina ñuca p'iñarishcami seolcama rupachinga. Paicunapaj allpatapish granocunandijmi millpunga. Urcucunapaj callari rumicunatapish rupachingami.

Hebreos 12:29

Ñucanchij Diosca rupachishpa tucuchij nina shinamari.