1 SAMUEL 26:8 - Dios Rimashca Shimicunami

⁸ Chaipimi Abisaica Davidtaca: –Cunanmari Taita Diosca canta p'iñajtaca cambaj maquipi churashca. Cunanca paipaj lanzallatataj japishpa shuj cutin pambacama pasajta satishpa huañuchisha, ama jarcanguichu– nirca.

1 SAMUEL 26:8 Iomraidhean Croise

2 SAMUEL 16:9

Chaimi Sarviapaj churi Abisaica jatun mandajtaca: –Cai huañushca allcutajlla runaca ¿ima nishpataj jatun mandaj ñuca amotaca cashna llaqui tucushca canman nicunchu imamí? Paipaj umata cunantaj p'itingapaj ñucata cachai– nirca.

SALMOS 31:8

P'iñajpaj maquipica mana churarcanguichu. Ñucataca ancho pambapimi shayachircangui.

JEREMÍAS 40:15

Chaimantami Careapaj churi Johananca Mizpa pueblollapitaj Gedaliasllata cashna nirca: Netaniaspaj churi Ismaeltaca pi mana yachajllapi cunantaj rishpa huañuchimugrisha. ¿Maitataj canta huañuchichunca saquinguiyari? Canhuan tandanacushpa, cai Judá llajtapi causacujcunaca caita, chaitamari ringacuna. Huaquincunallapish saquirishca cai Judá runacunaca chingaringamari– nircami.

NAHUM 1:9

Mandaj Diostaca ¿ima shina c'ariyanatataj yuyanguichigari? Paita p'iñajcunataca, llaquichishpa shuj cutintaj tucui chingachingallami.

Romanos 11:32

Diosca tucuicunallatataj llaquingapajmi, tucuicunallatataj mana cazuj canapi churashca.

DEUTERONOMIO 32:30

Paicunaca shujllamari huarangata manchachishpa catircacuna. Ishquillamari chunga huarangata callpachircacuna. Miticuna jatun Rumi shina ñucanchijta Mandaj Dios, paicunapaj maquipi churajpimari chashna rurarcacuna. Pai Diosllatajmi c'atuj shina paicunaman curca.

JOSUÉ 21:44

Mandaj Diosca paicunapaj ñaupa yayacunaman cushami nishcata pajtachishpami, chai llajtata paicunaman cushpaca pi mana ima nishca alli causaita curca. Mandaj Dios paicunahuan cashcamantami, p'iñajcunaca pi mana ch'imbapurai tucurca. Mandaj Diosmi chai p'iñajcunataca, israelcunapaj maquipi churarca.

JUECES 1:4

Judá aillu macanacunaman chashna huichiyajpica, Mandaj Diosca cananeocunata, ferezeocunataca paicunapaj maquipimi churarca. Chaimi paicunataca Bezec pueblopi, 10.000 runacunata huañuchircacuna.

1 SAMUEL 23:14

Davidca chaimanta rishpaca, Zif shuti shitashcacunapi tiyaj peña jutcucunapimi miticushpa causarca. Saulca tucui punllacunami Davidtaca mashcarca. Taita Diosca Saulpaj maquipica mana churarcachu.

1 SAMUEL 24:4

Chaipimi Davidhuan caj runacunaca: –Riqui, canta p'iñajtaca cambaj maquipimi churashca. Paitaca can munashca shina imatapish ruranguilla nishpa Mandaj Dios nishca punllami pajtashca– nijpimi, Davidca jatarishpa upajlla rishpaca, Saulpaj jahua churana mirgata p'itirca.

1 SAMUEL 24:5

Davidca Saulpaj jahua churana mirgata p'itishcamantaca paipaj shungupica achcatami llaquirirca.

1 SAMUEL 26:23

Mandaj Diosmi canmanpish ñucamanpish cashcata rurashca cajpipish, mana cashcata rurashca cajpipish ima shinalla rurashca shinallataj cunga. Mandaj Diosmi cantaca ñuca maquipi churarca. Shina cajpipish Mandaj Dios churashca jatun mandajtaca ñuca maquihuanca mana llaquichisha nircanichu.

1 SAMUEL 26:7

Chai tutallatajmi Davidhuan, Abisaihuanca Saulpish, paipaj soldadocunapish maipi canman rircacuna. Saulca carpa huasi ucupimi, paipaj sauna pambapi lanzata shayachishpa huañuita dormicurca. Abnerpish soldadocunandijmi Saulpaj muyundijpi huañuita dormicurcacuna.

1 SAMUEL 26:9

Chaimi Davidca Abisaitaca: –Ama huañuchichu. Mandaj Dios churashca mandajta maijanpish paipaj maquihuan huañuchishpaca ¿maitataj juchachina illajca saquiringari?– nirca.