NÚMEROS 23:14 - Dios Rimashcata Quillcashcami

¹⁴ Shina nishpami Balaamtaca Zofim pambapi tiyac Pisga urcuman pusharca. Chaipimi canchis altarta ruhuashpa, cada altarpi shuc huagrata, shuc cari ovejata tucui rupachirca.

NÚMEROS 23:14 Iomraidhean Croise

ISAÍAS 46:6

Curita mochilamanta llucchishpami cullquita balanzapi pezan. Chai quipaca cullquimanta imata ruhuac runaman cushpami, shuc diosta ruhuachin. ¡Chai diospac ñaupapi cumurishpami adoran!

OSEAS 12:11

Galaad llactapi causaccunaca ruhuashcalla dioscunata alli nishpami causan. Gilgal llactapica huagracunata chai dioscunaman cushpami huañuchirca. Paicunapac altarcunaca yapushca pambapi rumita montón shinami canga» ninmi.

NÚMEROS 21:20

Bamotmantaca Moab llacta pambaman chayashpami, Pisga urcu jahuaman chayarca. Chai urcumantaca shitashca pambata ricunallami carca.

NÚMEROS 23:13

Shina nicpimi Balacca: —Cunanca, maimantami israelcunata ricunallaman jacu. Chaimantaca mana tucui israelcunata ricunguichu. Ashallatami ricungui. Chaicunata maldiciangui— nirca.

NÚMEROS 23:15

Chaipimi Balaamca Balactaca: —Caipi tucui rupachicuc ladopi shuyai. Ñucaca chaipi Mandac Dios-huan tupangapacmi rini— nirca.

NÚMEROS 23:29

Chaipimi Balaamca Balactaca: —Caipi canchis altarcunata ruhuashpa, canchis huagrata, canchis cari ovejatapish allichi— nirca.

DEUTERONOMIO 3:27

Pisga urcuman llucshishpa uratapish, jahuatapish, inti tigrana ladotapish, inti llucshina ladotapish ricui. Canca Jordán yacutaca mana pasanguichu.

DEUTERONOMIO 34:1

Moisesca shitashca pamba Moabmanta rishpaca, Jericomanta chimbapurapi cac Nebo urcuman rishpami, Pisga urcu jahuaman chayarca. Mandac Diosca Galaad llactamantaca Danpac llactacamanmi tucui llactata ricuchirca.

DEUTERONOMIO 4:49

Jordán yacumanta inti llucshina ladoman tiyac Arabá shuti tucui llactatapish Pisga urcu chaquiman cac Arabá yacu patacamanmi japirca.