SAN JUAN 1:14 - Dios Rimashcata Quillcashcami

¹⁴ Chai Rimashca Shimillatacmi runa tucushpa, ñucanchic-huan causarca. Paica yallita cuyac, cashcata nicmi. Paica Diospac shuclla Churi cashpami, yalli poderyuc carca. Chashna cactami ricurcanchic.

Nuevo Testamento en Quichua Cañar 1996

¹⁴ Chai Rimashca Shimillatacmi runa tucushpa, yallita c'uyashpapish, Dios ima shina cashcata ricuchishpapish ñucanchichuan causangapac shamurca. Paitaca Taita Diospac shuclla Churi cashcatapish, pai sumac cashcatapish ricurcanchicmi.

SAN JUAN 1:14 Iomraidhean Croise

SALMOS 2:7

Mandac Dios cushca mandashcataca huillashami. Pai ñucata rimashpaca: «Canca ñuca churimi cangui. Cunanmi canmanca causaita cuni.

SALMOS 45:2

Tucui caricunamanta yalli sumacmi cangui. Cambac shimimantaca uyanalla shimicunami llucshin. Diosmi huiñaita chashna cachun bendiciarca.

SALMOS 85:9

Ñallami paita manchaccunata quishpichinga. Chashna ruhuacpica, ñucanchic llactapimi sumaimana Diosca ñucanchic-huan causanga.

ISAÍAS 40:5

Chaipimi Mandac Diosca paipac poderta ricuchinga. Chaitaca tucui gentecunami ricunga. Chaitaca Mandac Dios ñucami nini» nirca.

ISAÍAS 53:2

Diosta servicca chaquishca allpapi shuc sapi retoñac shinami, paipac ñaupapi llucshinga. Paipac ñahuitaca ricurcanchicmi, shinapish mana cuyaipacchu carca. Mana sumac ñahuichu carca.

ISAÍAS 7:14

Cunanca, Mandac Diosllatacmi shuc señalta ricuchigrin. Carihuan manarac chayarishca solterami huicsayuc tucushpa shuc cari huahuata charinga. Chai huahuataca Emanueltami shutichinga.

EZEQUIEL 37:27

Ñucapaclla carpa huasipish paicunapac chaupipimi canga. Ñucaca paicunapac Diosmi casha. Paicunaca ñuca acllashcacunami canga.

SAN MATEO 1:16

Jacoboca José churitami charirca. Joseca Mariapac cusami carca. Mariaca Jesuspac mamami carca. Jesusca Cristomi can.

SAN LUCAS 2:11

Cunanmi David huacharishca Belén pueblopi Quishpichic huacharishca. Paica tucuita Mandac, Quishpichic Cristomi.

SAN LUCAS 2:7

Pozana huasi mana pactashcamantami, paipac punta cari huahuataca huagracuna shayana ucupi sajuarirca. Chai huahuataca maitushpami, ucsha jahuallapi sirichirca.

SAN LUCAS 9:32

Pedropish, paihuan caccunapish yalli sueñunayaihuanmi carca. Shina cashpapish, Jesús chashna sumaimana achiclla tucuctapish, paihuan parlanacucuc ishcai runacunatapish ricucurcami.

SAN JUAN 1:1

Callarillapitacmi, Rimashca Shimica ña tiyarca. Rimashca Shimica Dios-huanmi carca. Shinallatac Rimashca Shimica Diosllatacmi carca.

SAN JUAN 11:40

Shina nicpimi Jesusca: —¿Manachu ñucaca: “Crishpaca, Dios imatapish ruhuaclla cashcata ricunguimi” nircani?— nirca.

SAN JUAN 14:6

Shina nicpimi Jesusca: —Ñucami cashcata nicpish, ñanpish, causaita cucpish cani. Maijanpish ñucallamantami Diospacman chayanga.

SAN JUAN 14:9

Shina nicpimi Jesusca: —Ña unaitami cancunahuan cani. Felipe, ¿chashna cashca jahuachu ñucata mana ricsingui? Maijanpish ñucata ricucca ñuca Taitatapish ricunmi. ¿Ima nishpatac canca: “Taitata ricuchi” ningui?

SAN JUAN 17:22

Canca ñucata jatunyachishcanguimi. Ñucanchic ima shinami shuc shinalla canchic, chai shinallatac paicunapish shuc shinalla cachunmi paicunatapish jatunyachini.

SAN JUAN 17:24

Taitalla, cai pacha manarac tiyacpimi, ñucataca cuyashcangui. Chaimantami can cushcacunaca ñuca maipimi cani, paicunapish chaipi cachun munani. Chaipi cashpami ñuca jatunyachishca cashcata ricunga.

SAN JUAN 18:37

Chaimantami Pilatoca: —Shinashpaca, ¿canca jatun mandacchu cangui?— nirca. Shina nicpimi Jesusca: —Ari, can nishca shinallatacmi cani. Ñucaca cashcata huillangapacmi cai pachapi huacharingapac shamurcani. Cashcata rimashcata cazuccunallami, ñuca rimashcata uyancuna— nirca.

SAN JUAN 2:11

Galilea llacta Caná pueblopimi Jesusca milagrota ruhuai callarirca. Chaipimi paica poderyuc cashcata ricuchirca. Chashna ruhuacpimi, paipac yachacuccunaca Diosmanta shamushca cashcata crircacuna.

SAN JUAN 3:16

Diosca cai pachapi causaccunata yallita cuyashpami, paipac shuclla Churita cai pachaman cacharca. Pipish paita cricca ama chingarichun, ashtahuanpish huiñai causaita charichunmi, chashnaca cacharca.

SAN JUAN 3:18

Maijanpish Diospac Churita cricca mana llaqui pachaman ringachu, ashtahuanpish paipac shuclla Churita mana cricmi, pai mana crishcamanta llaqui pachaman ringa.

SAN JUAN 6:51

Ñucami jahua pachamanta shamushca, causaita cuc tandaca cani. Maijanpish cai tandata micucca, huiñaita causangami. Cai tandaca ñuca quiquin aichami. Chaitaca cai pachapi causaccuna huiñai causaita charichunmi cusha— nirca.

SAN JUAN 8:32

Chashnami cashcata nic cashcata ricsinguichic. Chai cashcata nic rimashcami cacharichinga— nirca.

HECHOS 13:33

Diosca Jesusta causachishpa, ñucanchicman cushpami, pai cusha nishcataca pactachishca. Chaimantami quipa Salmopica: “Canca ñuca Churimi cangui. Cunanca ñuca Huahuami cangui” nin.

ROMANOS 8:3

Runaca aichayuc cashcamantami Moisés mandashcacunataca maita mana pactachi pudirca. Chaimantami Diosca paipac shuclla Churita, runa shina aichayuc tucushpa, runacunapac juchacunamanta llaquita huañuchun cacharca. Chai shina ruhuashpami, gentecunapi tiyac juchataca tucui chingachirca.

ROMANOS 9:5

Paicunaca ñucanchic ñaupa taitacunapac huahua huahuacunami. Paicunapuramantami Cristoca runa tucurca. Paitaca tucuita Mandac Dios cashcamantami huiñai huiñaita alli nina canchic.

1 CORINTIOS 15:47

Punta ruhuashca Adanca allpamantami carca. Quipa Adanmi, jahua pachamanta shamushca carca.

2 CORINTIOS 12:9

Shina mañacpipish Apunchic Jesusca: «Chashna llaquicunata apacushpapish, ñuca cuyashcamantaca cushicuilla. Ñuca imatapish ruhuaclla cashcaca, can imatapish mana ruhuaipac cacpimi alli ricurin» nircami. Chaimanta Cristo imatapish ruhuaclla cashca ñucapi ricurichunmi, ñucaca imatapish mana ruhuaipaclaya canata munani.

GÁLATAS 4:4

Shina cacpipish cachana punzha pactacpimi, Diosca shuc huarmimanta huacharichun paipac Churitaca cacharca. Paica Moisés mandashcacunataca tucuitami cazushpa causarca.

EFESIOS 3:8

Ñucami tucui Diospaclla caccunamantaca ashtahuan yangalla cani. Shina cacpipish Dios cuyashpami, cai alli huillaita mana israelcunaman huillashpa sumac ruhuanata ñucamanca mingarca. Cai huillanaca Cristo tucuimanta yalli allicunata cuc cashcata huillanami.

COLOSENSES 1:19

Diosca paipac Churipi tucui pactachina poder tiyachunmi munarca.

COLOSENSES 2:3

Diosmanta sumac yachaicunatapish, alli yuyaicunatapish paillatacmi charicun.

COLOSENSES 2:9

Dios imalaya cashcaca, Cristopimi tucui ricurin.

1 TIMOTEO 3:16

Ñucanchic crishcaca, tucuimanta yalli jatunmi can: Diosca aichayuc tucushpami ricurirca. Paipac Espiritupica tucuitami misharca. Paitaca angelcunami ricurca. Mana israelcunamanpish huillashcami carca. Cai pachapipish crircacunami. Jahua pachapipish alli nishpami chasquishca carca.

HEBREOS 1:3

Diospac Churimi pai jatun cashcata ricuchicun. Paica Dios shinallatacmi can. Diospac Churica tucui ima tiyashcataca, paipac poderhuanmi mandacun. Paica ñucanchic juchacunata pichashpami, jahua pacha Dios mandacuc alli maquiman tiyarigrirca.

HEBREOS 1:5

¿Diosca maijan angelcunatatac: “Canca ñuca Churimi cangui, cunanca ñuca Huahuami cangui” nishca? ¿Shinallatac pi angelcunatatac: “Ñucaca paipac Taitami cani, paica ñuca Churimi” nishca?

HEBREOS 10:5

Chaimantami Apunchic Jesús cai pachaman shamushpaca, Diostaca: «Animalta cushpa huañuchishcatapish, ofrendatapish mana munarcanguichu. Ashtahuanpish ñucataca shuc cuerpotami ruhuarcangui.

HEBREOS 2:11

Jucha illacta ruhuacpish, jucha illaccunapish shuc Taitapac huahuacuna shinami canchic. Chaimantami Jesusca mana pingashpa: “Ñuca huauquicunami canguichic” nin.

HEBREOS 5:5

Chai shinallatacmi Jesucristoca mana pai quiquinllatac jatun mandac cura tucurca. Ashtahuanpish Diosmi paitaca: «Canca ñuca Churimi cangui, cunanca ñuca Huahuami cangui» nirca.

1 JUAN 4:14

Ñucanchicllatacmi Dios cachashca paipac Churi cai pachapi causaccunata quishpichingapac shamushcataca ricurcanchic. Chaimantami huillanchic.

1 JUAN 4:9

Ñucanchic paimanta huiñai causaita charichunmi, Diosca paipac shuclla Churita cai pachaman cachashpa, pai cuyac cashcataca ricuchirca.

2 JUAN 1:7

Cai pachapica llullashpalla huillaccunaca achcacunami puricuncuna. Paicunaca: “Apunchic Jesucristoca mana runa tucushpachu shamurca” nishpami, llullashpa huillancuna. Chaicunaca Apunchic Jesucristota piñaccunami.

APOCALIPSIS 19:13

Paica yahuarpi tiñishca churana churashcami carca. Shinallatac paipac shutica Dios Rimashca Shimimi carca.

APOCALIPSIS 21:3

Mandashpa tiyarinamanta sinchita shuc rimashca uyarishpaca: «Cunanca Diospac carpa huasica gentecunapac chaupipimi causacun. Paicunahuanmi tucui causaipi causanga. Paicunaca Diospac huahuami canga. Diosllatacmi paicunahuanca causanga.