JOSUÉ 23:9 - Dios Rimashcata Quillcashcami

⁹ Mandac Diosmi mai jatun sinchi llactacunatapish cancunapac ñaupamanta llucchishpa cacharca. Cunan punzhacamanca cancunahuanca maijan llactapish mana macanacui pudishcachu.

JOSUÉ 23:9 Iomraidhean Croise

1 REYES 21:26

Paica amorreocuna shinami ruhuashcalla dioscunata catishpa, millanayaita ruhuashpa causarca. Amorreocunataca chashna millaita ruhuaccuna cacpimi, Mandac Diosca israelcunapac chaupimanta llucchishpa cacharca.

2 CRÓNICAS 20:7

Ñucanchic Mandac Dioslla, cai llactapi causaccunataca canmi, can acllashca israelcunapac ñaupamanta llucchishpa cacharcangui. Shina llucchishpaca, canhuan alli apanacuc Abrahampac huahua huahuacuna huiñaita causachunmi curcangui.

ÉXODO 23:23

Ñuca angelmi ñaupata rishpa amorreocunapac, heteocunapac, ferezeocunapac, cananeocunapac, heveocunapac shinallatac jebuseocunapac llactaman apanga. Paicunataca ñucami tucuchisha.

ÉXODO 23:30

Ashtahuanpish cancuna mirarishpa, tucui allpata japingacamanmi paicunataca ashacaman llucchishpa cachasha.

HECHOS 7:45

Ñaupa taitacunami chai huasitaca paicunapac ñaupa taitacunamanta japishca carca. Tauca huata quipami, Josué paicunata pushamucpi, chai shitashca pambamantaca cai cunan ñucanchic causacuc llactaman apamurca. Ñucanchic taitacuna cusha nishca llactapi causachunmi, Diosca chai mana israelcunataca llucchishpa cacharca. Chai huasitaca David mandac tucungacamanmi charircacuna.

DEUTERONOMIO 11:23

Chashna pactachicpica, Mandac Diosca chai llactapi causaccunata cancunapac ñaupamanta catishpa cachangami. Cancunata yalli achca, shinallatac sinchi gentecunatami llucchishpa cachashpa, chaipi causai callaringuichic.

DEUTERONOMIO 7:24

Jatun mandaccunatapish cancunapac maquipimi churanga. Cancuna paicunata tucuchicpimi, cai pachapica paicunapac shuticunatapish mana pi tapunga. Tucuita tucuchingacaman pi mana atingachu.

JOSUÉ 1:5

Cambac tucui causaipimi canhuanca pipish mana macanacui pudinga. Ima shinami Moises-huan carcani, shinallatacmi canhuanpish casha. Cantaca mana saquishachu.

JOSUÉ 15:14

Calebmi Anacpac churi Sesai, Ahimán, Talmai quimsa churicunata chai llactamanta llucchishpa cacharca.

JOSUÉ 23:5

Cancunata Mandac Diosmi chai llactapi causaccunataca cancunapac ñaupamanta cancuna ricucucpi, llucchishpa shitanga. Chai allpataca cancunata Mandac Dios huillashca shinallatacmi cancunaman cunga.

JOSUÉ 23:8

Cunancaman caticushca shinallatac cancunata Mandac Diosllatac catinguichic.

JOSUÉ 24:18

Mandac Diosmi ñucanchic ñaupamanta mai llactapi causaccunatapish, chai llactapi causac amorreocunatapish llucchishpa cacharca. Chaimanta ñucanchicpish, Mandac Diostami servishun, paica ñucanchic Diosmi— nircacuna.