JOSUÉ 17:11 - Dios Rimashcata Quillcashcami

¹¹ Manasespac ailluca Isacarpac, Aserpac aillucunapac llactapipish cai pueblocunata charircami. Chai pueblocunaca Bet-seán pueblo, Ibleam pueblo uchilla llactacunandimi carca. Dor pueblopi causaccunapish uchilla llactacunandi, Endor pueblopish uchilla llactacunandi, Taanac pueblopi causaccunapish uchilla llactacunandi, Meguido pueblopi causaccunapish uchilla llactacunandimi paipac carca. Quimsaniqui llactaca Nafotmi carca.

JOSUÉ 17:11 Iomraidhean Croise

2 SAMUEL 21:12

Chaimantami Davidca Saulpac, paipac churi Jonatanpac tullucunata apangapac Galaad llacta Jabes puebloman rirca. Chai pueblopi causaccunami filisteocuna Saulta Gilboa urcupi atishpa huañuchishpa, Bet-seán pueblo plazapi huarcushcata shuhuashca carca.

1 REYES 9:15

Jatun mandac Salomonca Mandac Diospac huasitapish, paipac huasitapish, Milo nishcatapish, Jerusalén muyundi jatun pircatapish, Hazor, Meguido, Gezer pueblocunatapish ruhuangapacmi gentecunata tandachirca.

2 REYES 9:27

Chaita ricushpami, Judá llactata jatun mandac Ocoziasca huerta chaupipi tiyac huasiman rina ñanta miticushpa callparca. Chashna callpacpimi Jehuca: «¡Paitapish huañuchi!» nishpa catirca. Chaimantami Ibleam pueblo ladollapi tiyac Gur huichaita carretapi callpacucpi chugrichirca. Ocoziasca Miguido pueblomanmi miticushpa callparca. Ashtahuanpish chaipimi huañurca.

1 CRÓNICAS 6:70

Cohatpac saquirishca huahua huahuacunamanca Manasespac chaupi aillupac llactapimi Aner, Bilam pueblocunata muyundi pambacunandi curca.

1 CRÓNICAS 7:29

Manasés aillupac llacta ladopi tiyac Bet-seán, Taanac, Mequido, Dor pueblocunapish, muyundi uchilla llactacunandimi paicunapac carca. Chai llactacunapimi, Israelpac churi Josepac huahua huahuacunaca causarca.

2 CRÓNICAS 35:22

Necaoca Mandac Dios nishcatami huillarca. Ashtahuanpish Josiasca chai nishcata mana cazushpami shuc churanata churarishpa, paihuan macanacungapac rirca. Josiasca Meguido pambapimi macanacungapac rirca.

SALMOS 83:10

Paicunaca Endor pueblopi huañushpami, allpapi shitana huanu shina tucurcacuna.

JEREMÍAS 49:2

Chaimantami amonitacunapac Rabá llactapica jatun macanacuipi caparinacuita uyana punzhacuna chayamun. Chai puebloca tucui urmachishpa, rumi montonllami saquiringa. Chaipi tiyac caishuc llactacunapish rupachishcami canga. Chai punzhacunami israelcunaca paicunamanta quichushca pueblocunata cutin japinga. Chaitaca Mandac Dios ñucami nini.

ZACARÍAS 12:11

Chai punzhapica Jerusalenpi causaccunaca Meguido pambapi Hadad-rimón diosmanta huacashca shinami, yallita huacanga.

JOSUÉ 11:2

Shinallatac jahua lado urcupi tiyac pueblocunata mandaccunamanpish, Cineret mama cucha ura ladopi tiyac pueblocunata mandaccunamanpish, Sefela llacta mandaccunamanpish, inti llucshina ladopi tiyac Nafot-dor pueblota mandaccunamanpish huillachun cacharca.

JOSUÉ 12:21

Taanac pueblota jatun mandacta, Meguido pueblota jatun mandacta,

JOSUÉ 12:23

Dor llacta Dor pueblota jatun mandacta, Gilgal llactapi tiyac Goim pueblota jatun mandacta,

JOSUÉ 16:9

Shinallatac Manasespac ailluman cushca llacta chaupipipish, Efrainpac ailluman chicanyachishca maijan pueblocunapish, muyundi uchilla llactacunandimi carca.

JOSUÉ 17:10

Efraín aillupac llactaca Caná yacumanta ura ladomanmi carca. Manasés aillupac llactaca chai yacumanta jahua ladomanmi carca. Chai llactacunaca mama cuchacamanmi carca. Jahuamanca Manasés aillupac llactahuan, cutin uramanca Aser aillupac llactahuanmi tupanacurca. Shinallatac inti llucshina ladomanca Isacar aillupac llactahuanmi tupanacurca.

JOSUÉ 17:16

Shina nicpimi, Josepac churicunaca: —Chai urcu allpaca ñucanchicmanca mana pactangachu. Chaipac jahuapica, chai pambapi causac cananeocunapish, Bet-seán pueblopi causaccunapish, chai muyundi uchilla llactacunapi causaccunapish, Jezreel pambapi causaccunapish fierromanta ruhuashca carretacunatami charincuna— nirca.

JUECES 1:27

Manasés ailluca Bet-seán, Taanac, Dor, Ibleam, Meguido pueblopi causaccunatapish, chai ladopi tiyac uchilla llactacunapi causaccunatapish mana llucchishpa cachai pudircachu. Chaimantami cananeocunaca chai llactallapitac causashpa catirca.

JUECES 5:19

Canaán llactata jatun mandaccunaca Miguido yacu ladopi tiyac Taanac pueblopimi macanacungapac shamurca. Shina macanacushpa atishpapish ima cullquita mana aparcachu.

1 SAMUEL 28:7

Chaimantami Saulca paita serviccunataca: —Ñuca tapungapac ringapac huañushcata mañac huarmita mashcagrichic— nirca. Shina nicpimi, paita serviccunaca: —Riqui, Endor pueblopimi huañushcata mañac shuc huarmi causan— nirca.

1 SAMUEL 31:10

Shinallatac Saulpac macanacunataca Astarot huarmi diospac huasipi churashpa, paipac cuerpotaca Bet-sán pueblo pirca cuchupimi huarcurcacuna.

1 SAMUEL 31:12

alli sinchi runacuna tandanacushpa shamurca. Chashna tucui tuta purishpa, shamushpami Bet-sán pueblo pircapi huarcushca Saulpac cuerpotapish, paipac quimsa churicunapac cuerpotapish, uricuchishpa Jabes puebloman apashpa rupachirca.