JEREMÍAS 44:5 - Dios Rimashcata Quillcashcami

⁵ Ashtahuanpish paicunaca mana uyarcachu. Shuctac dioscunaman inciensota rupachishpa, mana allita ruhuashpa causanata saquishpa, mana ñucapacman cutirircacunachu.

JEREMÍAS 44:5 Iomraidhean Croise

2 CRÓNICAS 36:16

Ashtahuanpish paicunaca Mandac Dios cachashca huillaccuna huillashcata mana cazushpami asircacuna. Dios huillachishca shimita yangapi churashpami, Dios ima nishcata huillaccunata burlarcacuna. Pai acllashcacuna chashna yallita llaquichicpimi, Mandac Diosca yallita piñarishpa, ima shina mana jarcari pudishpa llaquichirca.

NEHEMÍAS 9:30

Tauca huatatami paicunataca, mana llaquichircangui. Cambac Espirituhuanmi, can ima nishcata huillaccunata huillachishpa yuyaita curcangui. Chashna huillacpipish mana uyacpimi, shuc llacta gentecunapac maquipi churarcangui.

ISAÍAS 48:18

¡Ñuca mandashcacunata cancuna uyashpa cazucpica, jatun yacu shinami cushi causaica mana tucurinman carca! Cashcata ruhuanaca mama cucha caiman chaiman cuyuric shinami, canman carca.

ISAÍAS 48:4

Cancunapac shungu, barra fierro shina cashcatapish, frenteca bronce shina cashcata yachanimi.

JEREMÍAS 11:10

Paicunapac ñaupa taitacuna shinallatacmi mana allita ruhuashpa, ñuca rimashcata mana cazushpa, shuctac dioscunata servirca. Israelcunapish, Judá llactapi causaccunapish paicunapac ñaupa taitacunahuan ari nishcatami yangapi churarca.

JEREMÍAS 11:13

Judá llactapi causaccunalla, cancunapac llactapi mashna llactacuna tiyashca shinallatacmi dioscunata charinguichic. Jerusalenpi causaccunalla, chaipi mashna callecuna tiyashca shinallatacmi Baal diosman inciensota cushnichina altarcunata shayachircanguichic.

JEREMÍAS 11:17

Canta tarpuc tucuita Mandac Dios ñucami canta llaquichinata huillani. Israelcunapish, Judá llactapi causaccunapish Baal diosman inciensota cushnichishpa, mana allita ruhuashpa, ñucata piñachishcamantami chashna ruhuagrini» ninmi.

JEREMÍAS 11:8

Shina mandacucpipish, mana cazurcacunachu, mana uyasha nircacunachu. Ashtahuanpish paicunapac shungupi mana allita yuyaricushcatami ruhuashpa catirca. Chaimantami ñuca ari ninacushpa rimashcapi nishca shina, paicunata llaquichigrini. Chai rimashcata pactachichun mandacpipish, mana pactachircacunachu” ninmi ningui» nirca.

JEREMÍAS 13:10

Cai millai gentecunaca ñuca yachachishcata mana uyasha nincunachu. Paicunapac shungu munashcata ruhuashpami, shuctac dioscunata servishpa, paicunapac ñaupapi cungurishpa catin. Chaimantami chai ismushca chumbi shina, imapacpish mana vali tucunga.

JEREMÍAS 19:13

Jerusalenpi tiyac huasi jahuacunapipish, Judá llactata jatun mandaccunapac huasi jahuacunapipish jahua pachapi tiyac lucerocunamanmi inciensota cushnichirca. Shinallatac shuctac dioscunamanpish vinota cushpami tallirca. Chaimantami chai huasicunaca Tofet pamba shinallatac mapayashca” ninmi ningui» nirca.

JEREMÍAS 43:4

Shina nishpami, Careapac churi Johananpish, soldadocunata mandaccunapish, gentecunapish Mandac Dios rimashcata mana cazushpa, Judá llactapi mana saquirirca.

JEREMÍAS 7:24

Shina mandacpipish, mana uyarcacunachu, mana cazurcacunachu. Ashtahuanpish sinchi shungu tucushpami, mana allita yuyarishpa, paicuna munashcata ruhuashpa, ñaupaman rinapac randica, huashaiman cutirirca.

DANIEL 9:6

Canta servic, can ima nishcata huillaccuna cambac shutipi ñucanchic jatun mandaccunata, caishuc mandaccunata, ñaupa taitacunata, tucui israelcunata rimashcata mana cazushcanchicchu.

OSEAS 11:2

Shina llaquishpa cayacucpipish, ñucamantaca ashtahuanmi caruyarca. Baal dioscunamanmi animalta cushpa huañuchirca. Yanga dioscunamanmi inciensota rupachirca.