JEREMÍAS 42:18 - Dios Rimashcata Quillcashcami

¹⁸ Israelcunapac tucuita Mandac Diosca: Ima shinami ñuca nina japiric shina piñarishpa Jerusalenpi causaccunata yallita llaquichircani, chashnallatacmi Egipto llactaman riccunatapish llaquichisha. Chaipimi cancunaca mana alli nishcapish, pingaichishcapish, tucuipac mancharinapish causanguichic. Cai llactataca mana cutin ricunguichicchu ninmi.

JEREMÍAS 42:18 Iomraidhean Croise

2 CRÓNICAS 34:25

Paicunaca ñucata cungarishpa, shuctac dioscunaman inciensota rupachishcami. Paicunapac maquihuan mana allita ruhuashpami ñucataca yallita piñachishca. Chaimantami cai llactapi causaccunataca nina japiric shina piñarishpa llaquichigrini. Chai llaquichinataca mana jarcarishachu” ninmi.

ISAÍAS 30:3

Ashtahuanpish Faraón ayudacpi, sinchiyanapac randica, pingaichishcami canga. Chaipi causaccunapi llanduric shina, miticunapac randica, yalli llaquimi tucunga.

ISAÍAS 65:15

Ñucata serviccunataca mushuc shutipimi cayasha. Ashtahuanpish cancunapac shutitaca shuctac runacunata maldiciangapacmi cayangacuna. Mandac Dios ñucami cancunataca huañuchisha.

JEREMÍAS 18:16

Chashnami paicunapac llactaca llaquinayaita tucuchicun. Tucui causaipi yallita burlashpa asina llactami tucunga. Maijanpish chai llactata pasacushpaca mancharishpa, umata cuyuchishpami pasanga.

JEREMÍAS 22:27

Quiquin llactaman cutinata tucui shunguhuan munashpapish manatac cutimui pudinguichicchu.

JEREMÍAS 23:40

Shina ruhuashpami, cancunataca punzhanta pingaipi causachun saquisha. Chashnami jaicapi mana cungarishpa yalli pingaichishca huiñaita causanguichic” ninmi» ningui.

JEREMÍAS 24:9

Paicunataca tucui llactacunapi causaccuna asichun, mancharishpa parlanacuchun, yuyarina parlocunata paicunamanta llucchishpa, burlachunmi saquisha. Chashnami mai llactaman ñuca cachacpipish, llaqui tucunga.

JEREMÍAS 25:9

cai llactatapish, caipi tucui causaccunatapish, cai muyundi llactacunatapish llaquichichunmi jahua llactapi causaccunata, Babilonia llactata jatun mandac ñucata servic Nabucodonosorta cachasha. Chashna cachashpami tucuita tucuchisha. Paicunataca huiñaita tucuipac mancharina, burlanatami ruhuasha.

JEREMÍAS 26:6

ima shinami Silo llactata tucuchircani, chashnallatacmi ruhuasha. Shinallatac tucui cai pachapi causaccuna, mana alli nishpa rimachunmi churasha” ninmi ningui» nirca.

JEREMÍAS 29:18

Jatun macanacuipi yarcaihuan, jatun ungüihuanmi catipi llaquichisha. Tucui cai pachapi tiyac llactacunapi causaccunami paicunata burlashpa, ima llaqui tucushpachari alli canman ningacuna. Shinallatac paicunata shuctac llactaman ñuca llucchishpa cachacpica, paicunata ricushpaca mancharishpa pingaichingacunami.

JEREMÍAS 29:22

Shina ruhuacpi, Judá llactamanta Babilonia llactaman prezu apashcacuna maldiciashpaca: “¡Mandac Diosca cantapish Sedequiasta shina, Acabta shina ruhuashpami alli canman! ¡Babilonia llactata jatun mandacca chai ishcai runacunatami ninapi cusarca!” ningacuna.

JEREMÍAS 33:5

“Caldeocunami cai llactapi causaccunata tucui huañuchishpa tucuchingapac shamurca. Paicunallatac mana alli ruhuashpa causacushcamantami yallita piñarishpa, cai llactapi causaccunataca ñuca ñahuita pacashpa mana ricurcani.

JEREMÍAS 44:12

Egipto llactaman rishpa, chaipi causac puchushca Judá gentecunaca tucuimi tucuchishca canga. Tucui paicunami jatun macanacuipi yarcaihuan huañushpa tucuringa. Cashnami uchillamanta callarishpa yuyaccunacaman tucuringa. Tucuipac mana alli nishca, tucuipac mancharina, burlanami tucunga.

JEREMÍAS 44:22

Mandac Diosca cancuna yalli mana allicunata, millana mapacunata ruhuashpa causacucpimi, ña mana ashtahuan ricusha nirca. Chaimantami cancunapac llactaca tucuipac mancharina, mana alli nishca, shuc runallapish mana tiyac saquirishca. Cunan punzhacamanmi chashna shitashca saquirishca.

JEREMÍAS 44:6

Chaimantami nina japiric shina piñarishpa, Judá llactacunapipish, Jerusalén callecunapipish rupachic shina llaquichircani. Chai llactacunaca cunan punzhacamanmi tucuchishca, shitashca pamba siricun» ninmi.

JEREMÍAS 44:8

Cancunaca Egipto llactapi causangapac yaicumushpaca cancuna ruhuashca shuctac dioscunaman inciensota rupachishpa, ñucata piñachishcamantami cancunallatac tucuringuichic. Shinami shuctac llacta gentecunapac mana alli nishca, burlashca causanguichic.

JEREMÍAS 6:11

Chaimantami can Mandac Dios piñarishca shinallatac ñucapish yallita piñarishpa, mana ricunayachini» nircani. Shina nicpimi, Mandac Diosca: «Ñanpi puricuc huahuacunatapish, tandanacushca mosocunatapish llaquichi. Cusapish, huarmipish, tauca huatayuc yuyacpish, prezu apashcami canga.

JEREMÍAS 7:20

Ñucaca yallita piñarishpami, cai llactata llaquichigrini. Runacunatapish, animalcunatapish, pambapi shayacuc yuracunatapish, allpapi pucushca granocunatapish mana huañuc ninahuami llaquichigrini» ninmi.

LAMENTACIONES 2:4

Piñac runa shinami, paipac arcocunata cacharirca. Sumac tiyashcacunataca paipac alli maquihuanmi mana ricunayachic runa shina tucuchirca. Nina japiric shina piñarishpami, Sionpi tiyac carpa huasicunataca llaquichirca.

LAMENTACIONES 2:6

Paipaclla carpa huasitapish huerta chaupipi cac chucllata shinami tucuchishpami, tandanacuna huasitapish tucuchirca. Mandac Diosllatacmi Sionpac jatun fiestacunatapish, samana punzhacunatapish cungachirca. Nina japiric shina piñarishpami jatun mandactapish, curatapish llucchishpa cacharca.

LAMENTACIONES 4:11

Mandac Diosca nina japiric shina yallita piñarishpami yallita llaquichishpa pai munashcata ruhuarca. Sionpi ninata japichishpami, callari rumicunacaman tucuchirca.

EZEQUIEL 20:34

Ñuca yallita piñarishpami, ñuca poderhuan caimanta, chaimanta llucchimusha. Mai llacta chaupimanta, shuctac gentecunapac chaupimantami llucchimusha.

EZEQUIEL 22:22

Cullquita hornopi yacuyachic shinami cancunataca ninapi yacuyachisha. Shina ruhuacpimi, Mandac Dios ñuca piñarishpa, cancunata llaquichishcata yachanguichic nini” ninmi ningui» nirca.

DANIEL 9:11

Tucui israelcunami can mandashcata mana cazushcanchicchu, cambac rimashcata mana uyashcanchicchu, juchallishcanchicmi. Chaimantami cai llaquicunapish, canta servic Moisés mandashpa ari nishcapish ñucanchicta llaquichicun.

DANIEL 9:27

Shuc semanapimi achca gentecunahuan ari ninacunga. Cutin chaupi semanapimi Diosman animalta cushpa huañuchinatapish, Diosman ofrendata cunatapish anchuchinga. Chai quipaca yallita millana tucuchicmi tucurina punzhacaman llaquichingapac shamunga. Dios llaquichina nishca punzhacamanmi llaquichishpa tucuchinga” nirca.

OSEAS 7:16

Paicuna cutirishpapish mana jahua pachapi causac Diospacman cutirircachu. Ashtahuanpish espadata mana alli shitac shinami llullarca. Jatun tucushpa, mana allita rimashcamantami mandaccunapish espadapi huañurca. Chashna millai cashcamantami, Egipto llactapi causaccunaca burlashpa asingacuna» ninmi.

NAHÚM 1:6

Pai piñaricpica, ¿pitac paipac ñaupapi shayaringayari? Nina japiric shina pai piñaricpica, ¿pitac paipac ñaupapi cai pudingayari? Nina talliricuc shinami paica yallita piñarin. Jatun rumicunapish chaupirinmi.

ZACARÍAS 8:13

Judá llactapi causaccunalla, israelcunalla, shuctac llactacunapac mana alli nishcami causarcanguichic. Shina cacpipish, chai llaquimanta quishpichishpami bendiciasha. ¡Ama manchaichicchu! ¡Cushicuichic!

NÚMEROS 5:27

Chashna ubiachicpimi, chai huarmi cusapac randi shuctac carihuan chayarishpa mapayashca cacpica, llaquichingapac huicsaman yaicunga. Chashna llaquichicpimi, mana huatata chari pudishpa, huicsapish punguillinga. Chaimantaca paica gentecunapac ñaupapi mana alli nishcami canga.

APOCALIPSIS 14:10

Diosmanta shamuc jatun llaquitami imahuan mana chagrushca vinota vasopi tallishpa ubiac shina Diospac piñaitaca chasquinga. Chaicunaca Pactalla Ovejapac ñaupapi, shinallatac Diospaclla cac angelcunapac ñaupapimi ninahuanpish, azufrehuanpish llaquichishca canga.