JEREMÍAS 4:26 - Dios Rimashcata Quillcashcami

²⁶ Alli pucuc allpacunata ricucpica, shitashcami saquirishca carca. Mandac Diosca yallita piñarishpami, tucui llactacunatapish, paipac ñaupapi tucuchishca carca» nircani.

JEREMÍAS 4:26 Iomraidhean Croise

SALMOS 107:34

Alli grano pucuc allpacunatapish, mana pucuc cachi allpatami ruhuan. Chaipi causaccuna millaita ruhuashcamantami chashnaca ruhuan.

SALMOS 76:7

Canca manchana Diosmi cangui. Can piñaricpica, ¿pitac cambac ñaupapi tiyacui pudingayari?

JEREMÍAS 12:13

Trigota jichashpaca, cashatami cosecharca. Paicuna allpapi shaicushpa trabajashcaca yangami carca. Ñuca nina japiric shina, yallita piñarishcamantami paicuna cosechacushpaca pingai tucunga» nirca.

JEREMÍAS 12:4

¿Ima punzhacamantac ñucanchic allpaca quihuacunapish mana huiñashca shitashca pamba shina canga? Cai llactapi causaccuna mana allita ruhuashcamantami pambata puric animalcunapish, volac animalcunapish huañushpa tucurirca. Paicunaca: «Diosca ñucanchictaca mana tucuchingachu» nishpami, mana allita ruhuarca.

JEREMÍAS 25:11

Tucui cai llactami manchaipac shitashca pamba canga. Cai llactapi causaccunaca canchis chunga huatatami Babilonia llactata jatun mandacta servinga.

JEREMÍAS 7:34

Judá llactapi tiyac llactacunapipish, Jerusalén ñancunapipish cushicushpa yallita asinapish mana tiyangachu. Shinallatac noviocuna, noviacuna cushicushpa asinapish mana tiyangachu. Tucui llactacunami llaquinayaita tucuchishca canga» ninmi.

JEREMÍAS 9:10

Cunanca, chai llactataca pipish mana pasanchu. Huagra huacashcallapish mana uyarinchu. Sacha animalcunapish, volac animalcunapish tucui illanmi. Chaimantami urcucunamantapish, shitashca pambacunapi tiyac michina pambacunamantapish llaquillata huacasha» nircani.

LAMENTACIONES 2:7

Mandac Diosca paipac altarta shitashpami paipaclla huasitapish millanayachirca. Mandashpa tiyana huasitapish, jatun pircacunatapish urmachichunmi piñaccunapac maquipi churarca. Mandac Diospac huasipica fiesta punzhacunapi shinami, caparinacushca uyarirca.

LEVÍTICO 26:31

Cancuna causana llactacunataca shitashcatami saquisha. Cancunapac altarcunatapish chingachishami. Cancunapac mishquilla ashnacuc inciensotapish mana chasquishachu.

MIQUEAS 3:12

Chaimantami Sión llactataca tarpuna allpata shina yapunga. Jerusalenca rumita montón shinami tucunga. Diospac huasi urcupica sachami jundanga.

SOFONÍAS 1:18

Mandac Dios piñarishpa llaquichi punzhapica paicunapac cullquipish, curipish mana quishpichingachu. Tucui cai pachataca nina japiric shinami tucuchinga. Cai pachapi causaccunataca cungaillami tucuchinga.