JEREMÍAS 4:16 - Dios Rimashcata Quillcashcami

¹⁶ Shuctac llactacunatapish, Jerusalentapish: “Caru llactamantami soldadocunaca muyunacushpa, Judá llactacunapi causaccunata llaquichingapac caparishpa shamucun” nichicyari.

JEREMÍAS 4:16 Iomraidhean Croise

ISAÍAS 34:1

¡Tucui llactacunapi causaccuna ñucata uyangapac tandanacuichicyari! ¡Tucui gentecuna alli uyaichicyari! Cai allpapish, chaipi ima tiyaccunapish, cai pachapish, chaipi ima tiyaccunapish uyaichicyari.

ISAÍAS 39:3

Chai quipami Dios ima nishcata huillac Isaías jatun mandac Ezequiasta ricungapac rishpaca: —Chai runacunaca, ¿maimantatac shamurca? ¿imatatac nirca?— nirca. Shina nicpimi Ezequiasca: —Paicunaca caru llacta Babiloniamantami shamushca— nirca.

JEREMÍAS 1:15

Ñucami jahua ladopi causac familiacunata, jatun mandaccunata tandanacushpa shamuchun cayagrini. Paicuna shamushpami, Jerusalenman yaicuna ñaupapi tiyac tucui pirca muyundipipish, Judá llactapi tiyac pueblo muyundipipish carpacunata shayachinga.

JEREMÍAS 16:6

Cai llactapica uchillacunapish, jatuncunapish huañungami. Paicunamantaca pipish mana huacangachu, mana enterrangachu. Shinallatac pipish churanata lliquirishpa, acchata pitirishpa mana llaquiringachu.

JEREMÍAS 2:15

Paicunata llaquichingapacca leoncunami huacashpa shamurca. Llactataca chushac pambatami saquirca. Llactacunata rupachishpami shuc runallatapish mana saquirca.

JEREMÍAS 31:10

¡Llactapi causaccunalla, Mandac Dios ñuca rimashcata uyashpa, mama cucha patapi tiyac caru llactacunapi huillaichic! Chashna huillashpaca: “Israelcunata llucchishpa, caita chaita cachac Diosca cutinmi tandachishpa, ovejacunata michic shina cuidanga” nichicyari.

JEREMÍAS 39:1

Judá llactata jatun mandac Sedequías iscun huata, chunga quillata mandacucpimi, Babilonia llactata jatun mandac Nabucodonosorca paipac soldadocunahuan Jerusalenta muyunacurca.

JEREMÍAS 4:17

Cancunallatac mana cazushcamantami chai soldadocunaca chagrata cuidac runacuna shina, muyundipi chapacun. Chaitaca Mandac Dios ñucami nini.

JEREMÍAS 5:15

Israelcunalla, cancunata llaquichichunca caru llactamantami ñaupa pachamanta causac, sinchi runacunata apamugrini. Paicunaca mana ricsishca rimaitami rimancuna. Paicuna rimashcataca mana entendinguichicchu.

JEREMÍAS 5:6

Chaimantami paicunataca sachapi causac leoncuna huañuchinga. Shitashca pambapi causac atuc shamushpami tucuchinga. Leopardomi paicunapac llacta muyundipi shayacunga. Maijanpish chaimanta llucshictaca japishpami micunga. Paicunaca yallitami Diosta mana cazushpa, juchata ruhuashca» nircani.

JEREMÍAS 50:2

«Llactacunapi caparishpa huillaichicyari. Banderacunata shayachichicyari. Mana pacashpa huillashpa: “Babilonia llactaca shuccunapac maquipimi. Bel diosca yallita pingaimi tucushca. Merodac diospish polvoshcami. Paicunapac ruhuashcalla dioscunapish ñutuchishcami siricun” nishpa caparichicyari.

JEREMÍAS 6:18

Chaimantami Mandac Diosca: «Cai llactapi causaccuna uyaichic. Tandanacushca gentecunapish ima tucuna cashcata alli yuyarichic.

JEREMÍAS 6:19

Cai pachapi causaccuna uyaichic. Cai pachapi causaccuna millaita ruhuashcamanta, ñuca rimashcata mana uyashpa, ñuca mandashcacunata mana cazushcamantami chashna llaquichigrini.

JEREMÍAS 6:22

Mandac Diosca: «Jahua lado llactamantami achca gentecuna shamun. Cai pacha tucurimantami sinchi gentecuna shamun.

JEREMÍAS 6:23

Paicunaca flechacunahuan, lanzacunahuanmi shayaringa. Paicunaca mana llaquic, yalli millai gentecunami. Mama cucha manchanayaita jataric shinami, tulun nishpa shamun. Sión llactapi causaccunalla, cancunahuan macanacungapacca caballocunapimi shamun» ninmi.

JEREMÍAS 8:19

¡Ñuca llactapi causaccuna caparishcaca caru llactacamanmi uyarin! Mandac Diosca: «¿Manachu Sionpi? Sionta jatun mandacca, ¿manachu chaipi?» nirca. Chaimantami Mandac Diosca: «¿Ima nishpatac imamanpish riccha dioscunata, shuctac llacta yanga dioscunata adorashpa, ñucata piñachircanguichic?» nirca

EZEQUIEL 21:22

Chashna tapucpica, jatun mandacca paipac alli lado maquihuanmi Jerusalén ladota ricuchirca. Chaica macanacuchun, huañui tiyachun, caparinacuchun, pungu ladocunapi ariete nishcata shayachichun, macanacuna pushtucunata ruhuachun, muyundi torrecunata shayachichunmi ricuchirca.