JEREMÍAS 24:10 - Dios Rimashcata Quillcashcami

¹⁰ Paicunataca jatun macanacuipi, yarcaipi, mancharina ungüihuan llaqui tucuchunmi saquisha. Paicunamanpish, paicunapac ñaupa taitacunamanpish cushca llactapi tucuringacamanmi chashna llaquichisha» nirca.

JEREMÍAS 24:10 Iomraidhean Croise

1 REYES 14:15

Mandac Diosca yacu patapi cuyuricuc totorata shina israelcunataca caiman chaiman cuyuchinga. Paimi israelcunataca paicunapac ñaupa taitacunaman cushca sumac llactamanta llucchishpa, Eufrates yacu chimba ladocaman cachanga. Asera huarmi dioslayacunata ruhuashpa, Mandac Diosta piñachishcamantami chashnaca ruhuanga.

ISAÍAS 51:19

Cai ishcai llaquicunami cantaca japirca. Cambac llactaca llaquinayaita tucuchishcami carca. Yarcaipish, jatun macanacuipishmi llaquichirca. ¿Pitac cantaca llaquingayari? ¿Pitac cantaca cushichingayari?

JEREMÍAS 14:12

Ayunashpa caparishpa mañacpipish ñucaca mana uyashachu. Ñucaman animalcunata cushpa tucui rupachicpipish, ofrendata cucpipish mana chasquishachu. Ashtahuanpish jatun macanacuihuan, yalli yarcaihuan, ungüicunahuanmi tucuchisha» nirca.

JEREMÍAS 15:2

Paicuna: “¿Maimantac rishunyari?” nicpica, Mandac Diosca: “Huañungapac caccunaca huañuchun. Jatun macanacuipi huañungapac caccunaca jatun macanacuipi huañuchun. Yarcaihuan huañungapac caccunaca yarcaihuan huañuchun. Prezurina caccunaca prezurichun” ninmi ningui.

JEREMÍAS 16:4

yalli nanai ungüicunahuanmi huañunga. Chai huañushcacunamantaca pi mana huacangachu, shinallatac mana enterrangachu. Allpapimi huanu tucunga. Paicunaca jatun macanacuipi yalli yarcaihuanmi tucuringa. Chai huañushcacunataca volac animalcuna, sacha animalcunami micunga nini» nirca.

JEREMÍAS 19:7

Judá llactapi, Jerusalenpi causaccuna cai pambapi imata yuyaricushcatapish tucuchishami. Paicunata piñashpa huañuchinata munaccunapac maquipi churashpami, paicunapac ñaupallapitac espadahuan huañuchichun saquisha. Chai huañushcacunataca volac animalcuna, sacha animalcunami micunga.

JEREMÍAS 21:9

Cai llactapi saquirishcacunaca jatun macanacuipi yarcaihuan, jatun ungüihuanmi huañunga. Ashtahuanpish caimanta llucshishpa, cancunapac muyundipi chapacuc caldeocunapacman maijanpish rishpaca causangami. Paicunapac maquipi yaicushpaca mana huañungachu.

JEREMÍAS 27:8

Maijan llacta, mana cashpaca maijan jatun mandac Babilonia llactata jatun mandac Nabucodonosorta yugota cungapi churashca shina, mana servisha nictaca jatun macanacuipi yarcaihuan, yalli ungüihuanmi llaquichisha. Chashnami Nabucodonosorpac maquipi yaicungacaman llaquichisha.

JEREMÍAS 29:17

tucuita Mandac Dios ñuca rimashpaca: Paicunata piñashpami jatun macanacuita cachashpa, yarcaihuan, jatun ungüihuan llaquichigrini. Mana micuipac ismushca higocunata shinami ruhuasha.

JEREMÍAS 29:18

Jatun macanacuipi yarcaihuan, jatun ungüihuanmi catipi llaquichisha. Tucui cai pachapi tiyac llactacunapi causaccunami paicunata burlashpa, ima llaqui tucushpachari alli canman ningacuna. Shinallatac paicunata shuctac llactaman ñuca llucchishpa cachacpica, paicunata ricushpaca mancharishpa pingaichingacunami.

JEREMÍAS 32:24

Riquichic, caldeocunaca cai llactata japingapacmi ariete nishcacunahuan shamushca. Cai llactaca yarcaihuan, ungüihuan llaquipi cashcamantami paicunahuan macanacuc shamuc caldeocunapac maquipi yaicugrin. Cai huillashcacunaca ñami pactacun. Chaitaca can Diosllatacmi ricucungui.

JEREMÍAS 32:25

Mandac Dioslla, cai llacta caldeocunapac maquipi urmagricucpipish canca: Allpataca cullquihuan randi, chai randishcata ricuchunca testigocunata tandachi” nircanguimi» nircani.

JEREMÍAS 34:17

Chaimantami Mandac Dios ñucaca: Cancunata servic huauquicunatapish, ayudaccunatapish mana cazurcanguichicchu. Riquichic, jatun macanacuita, jatun ungüita, yarcaitami llaquichichun cacharigrini. Chashna llaquichishpami cancunataca tucui cai pachapi tiyac llactacuna pingaichichun saquigrini.

JEREMÍAS 42:17

Egipto llactaman cutishpa, chaipi causagrinata munaccunaca shucllapish mana saquirishpami, jatun macanacuipi yarcaihuan, jatun ungüihuan huañunguichic. Ñuca chaipi causaccunata llaquichicpica, shucllapish mana quishpiringuichicchu. Chaitaca Mandac Dios ñucami nini.

JEREMÍAS 42:22

Chaimanta cunanca caita alli yachacuichic. Chaica, cancuna causagrinata munashca llactapica, jatun macanacuipi yarcaihuan, jatun ungüihuanmi huañunguichic» nirca.

JEREMÍAS 5:12

Mandac Diosta negashpami: «Diosca mana tiyanchu. Ñucanchictaca ima llaquipish mana japingachu. Jatun macanacuipish, yarcaipish mana tiyangachu» ningacuna.

JEREMÍAS 9:15

Chaimantami israelcunapac tucuita Mandac Dios ñucaca: Cai gentecunamanca ajenjotami caragrini. Shinallatac yacuhuan, venenohuan chapushpami ubiachigrini.

JEREMÍAS 9:16

Paicunatapish, paicunapac taitacunatapish mana ricsishca llactacunatami caita chaita cachasha. Paicunata catishpa, espadahuan huañuchishpa tucuchichunmi saquisha nini» ninmi.

EZEQUIEL 33:27

Shinallatac: “Mandac Diosca: Ñuca shutipimi nini: Llaquinayaita tucuchishca pueblopi causaccunaca jatun macanacuipimi huañunga. Pambapi causaccunataca millai animalcunami micunga. Jatun pircahuan jarcashca llactacunapi, jatun jutcucunapi causaccunaca manchana ungüihuanmi huañunga.

EZEQUIEL 6:11

Mandac Diosca: «Maquicunahuan huactarishpa, chaquihuanca tacarishpa: “Cai tucui millaita ruhuac israelcunaca, ¡Aij, imachari tucunga! ¡Paicunaca jatun macanacuipi yarcaihuan, ungüicunahuanmi huañunga!

EZEQUIEL 7:15

Canzhapica jatun macanacuimi tiyanga. Ucupica ungüipish, yarcaipish tiyangami. Campopi caccunaca jatun macanacuipi, pueblopi caccunaca yarcaihuan, ungüihuanmi huañunga.

DEUTERONOMIO 28:21

Mandac Diosca cancuna causagricuc llactapica, cancuna tucuringacamanmi ungüicunata cachashpa llaquichinga.

APOCALIPSIS 6:8

Chaimantaca shuc quillu caballotami ricurcani. Chai caballo jahuapi tiyacucpac shutica Huañui nishcami carca. Cutin paita catishpa llucshicca Ucu Pacha nishcami carca. Paicunaca cai pachata chuscupi chaupishca shuc parte gentecunata macanacuihuan, ungüicunahuan, yarcaihuan, shinallatac cai pachapi cac animalcuna canishcahuan huañuchic cana podertami chasquirca.