JEREMÍAS 16:11 - Dios Rimashcata Quillcashcami

¹¹ Shina nicpica canca: “Mandac Diosca: Cancunapac taitacunami ñucata saquishpa, shuctac dioscunapac ñaupapi cungurishpa servirca. Chashnami ñucata cungarishpa, ñuca mandashcacunatapish mana pactachirca.

JEREMÍAS 16:11 Iomraidhean Croise

1 REYES 9:9

Shina nicpimi, shuccunaca: “Paicunapac ñaupa taitacunata Egiptomanta llucchimuc, paicunata Mandac Diosta saquishpami, shuctac dioscunata alli nishpa servircacuna. Chaimantami Mandac Diosca cai tucui llaquita paicunapac jahuapi churashpa llaquichirca” ningacuna» nirca.

2 CRÓNICAS 7:22

Shina nicpimi shuccunaca: “Paicunata Egiptomanta llucchimuc Mandac Diosta saquishpami, shuctac dioscunata alli nishpa, servircacuna. Chaimantami Mandac Diosca cai tucui llaquita cachashpa, paicunata llaquichirca” ningacuna» nirca.

JEREMÍAS 13:22

Cambac shungupica: “¿Imamantatac cai llaquicunaca japinyari?” ninguipishchari. Chaica, can yallita juchallishcamantami japirishpa, churanata llatanashpa, lluchu changata saquic shina ruhuarca.

JEREMÍAS 2:8

Curacunaca: “¿Mandac Diosca maipitacyari?” mana nircachu. Ñuca mandashcata ricuccunapish mana ricsircachu. Michiccunapish ñucataca piñarcami. Ñucamanta huillaccunapish Baal diospac shutipimi huillarca. Chashnami imatapish mana ayudac dioscunatarac catirca.

JEREMÍAS 22:9

Shina nicpica: “Caipi causaccuna Mandac Dios-huan ari nishcata saquishpa, shuctac dioscunata servishpa, alli nishcamantami chashna tucushca” ningacuna» nirca.

JEREMÍAS 44:3

Paicunapish, cancunapish, cancunapac taitacunapish mana ricsishca, ruhuashcalla dioscunaman inciensota rupachishpa, ñucata piñachishpa, mana allita ruhuashcamantami yallita llaquichircani.

JEREMÍAS 8:2

Chaicunataca jahua pachapi tiyac inti, quilla, lucerocuna ucupimi tendishpa churanga. Paicuna causacushpaca chaicunatami cuyashpa, alli nishpa causarca. Shinallatac chaicunamanmi tapuc carca. Tullucunataca pi mana tandashpa enterrangachu. Ashtahuanpish allpapimi huanu tucunga.

JEREMÍAS 9:14

Chaipac randica, paicunapac taitacuna yachachishca shinallatacmi Baal dioscunata catishpa, shungu munashcata ruhuashpa causarca.

LAMENTACIONES 5:7

Ñucanchic taitacunaca juchallishpami huañurca. Paicunamantami ñucanchicca llaquita apacunchic.

EZEQUIEL 11:21

Ashtahuanpish ruhuashcalla dioscunata adorana yuyaihuan, millaita ruhuana munaihuan puriccunataca, taripashpami llaquichisha nini” ninmi ningui» nirca.

AMÓS 2:4

Mandac Diosca: «Judá llactapi causaccunataca, paicuna catipi quimsa cutin, chuscu cutin juchallishcamanta llaquichinata manatac saquishachu. Paicunaca Mandac Dios ñuca mandashcata yangami churashpami, pai yachachishcacunatapish mana cazurca. Paicunapac ñaupa taitacunapac dioscunata catishpami pandarirca.

MALAQUÍAS 3:7

Cancunapac ñaupa taitacuna causacui punzhamanta pachami ñuca mandashcacunata saquishpa, mana cazurcanguichic. ¡Ñucapacman cutirichic! Chashna cutiricpica, ñucapish cancunapacman cutirishami nicpipish, cancunaca: “¿Imapactac cambacman cutirishun?” nircanguichic.

1 PEDRO 4:3

Cancunaca tauca huatacunatami Diosta mana ricsiccuna shina, mana allicunallata ruhuashpa, imapish mapa munaicunata ruhuashpa, jatun micuicunata micushpa, machashpa, shinallatac millanayai ruhuashcalla dioscunata adorashpa, mana allita ruhuashpa causarcanguichic.

JUECES 2:11

Chai quipaca Mandac Diospac ñaupapi mana allita ruhuashpami israelcunaca Baal dioscunata servishpa causai callarirca.