JEREMÍAS 15:15 - Dios Rimashcata Quillcashcami

¹⁵ Mandac Dioslla, canca tucuitami yachangui. Ñucata yuyarishpa, ayudangapac shamuiyari. Ñucata piñaccunata ñucata llaquichishca shinallatac llaquichiyari. Ama ashtahuan piñacuillachu. Ñucaca canmantami yalli llaquita apacuni.

JEREMÍAS 15:15 Iomraidhean Croise

NEHEMÍAS 13:22

Chai quipami samana punzhaca Diospaclla chicanyachishca punzha cachun levitacunataca Diospaclla tucushpa, pungucunapi cuidac shamuchun mandarcani. Ñuca: «¡Dioslla, ñuca chashna ruhuashcacunataca yuyaringuiyari! ¡Canca llaquicmi cangui! ¡Chaimanta ñuca mana allita ruhuashcacunataca cungaringuiyari!» nircani.

NEHEMÍAS 13:31

Ima horas Diosman cuna yantata, punta pucushca granota cunatapish allichircanimi. «¡Ñuca Dioslla, ñuca chashna ruhuashcamantaca ñucamanpish allita ruhuanata yuyaringuiyari!»

NEHEMÍAS 5:19

«Ñuca Dioslla, cai llactapi causaccunaman cai tucui allicunata ruhuashcamantaca ñucamanpish allita ruhuangapac yuyaringuiyari» nircani.

NEHEMÍAS 6:14

Chaimantami ñucaca: «¡Ñuca Dioslla, Sanbalatpish, Tobiaspish caicunata ruhuashca shinallatac paicunata yuyari! ¡Noadías huarmipish, caishuc huillaccunapish ñucata manchachishpa pandachisha nishcatapish ama cungaringuichu!» nircani.

JOB 10:7

Canca, ñuca mana juchayuc cashcatapish, cambac maquimanta pi mana quishpichi pudishcatapish canllatacmi yachangui.

SALMOS 102:24

Chashna ruhuacpimi ñucaca: «Ñuca Dioslla, ama ñuca causana chaupi punzhacunata quichuichu. ¡Cambac huatacunaca huiñai huiñaitami can!»

SALMOS 106:4

Mandac Dioslla, can acllashcacunaman allita ruhuashca shinallatac ñucatapish yuyariyari. Ñucata quishpichingapac shamuiyari.

SALMOS 119:84

¿Canta servicca ima horascamantac causagrinyari? ¿Ima horastac ñucata llaquichiccunataca llaquichigringuiyari?

SALMOS 17:3

Canca ñuca shungutaca tucuitami ricushcangui. Tutapish ricungapac shamushcanguimi. Ñuca alli cacta, mana alli cacta taripashpapish, ima mana allitaca mana tarishcanguichu. Ñuca shimihuan cambac contra mana rimangapacmi yuyarircani.

SALMOS 39:13

Ama ashtahuan ñucata piñarishpa chapaichu. Ñucaca cushicuitami japisha. Causaitaca amarac quichuichu» nircani.

SALMOS 44:22

Ashtahuanpish cambac cashcamantami punzhanta huañuchishun nishca causanchic. Huañuchina ovejacunata shinami charincuna.

ISAÍAS 38:3

«Mandac Dioslla, cambac ñaupapi mana llullashpa, tucui shunguhuan canta cazushpa causashcatapish, cambac ñaupapi allita ruhuashpa causashcatapish yuyariyari» nishpami, yallita llaquirishpa huacarca.

JEREMÍAS 12:3

Mandac Dioslla, ashtahuanpish ñucataca ricsinguimi. Cambac ñaupapi ñuca shungu alli cactapish, canllatac yachanguimi. ¡Paicunataca ovejacunata huañuchingapac apac shina, huañuchina punzhapac chicanyachiyari!

JEREMÍAS 15:10

Jeremiasca Ñucaca: «¡Aij, ñuca mamitalla! ¡Tucui llactapi causaccunahuan piñanacushpa, rimanacuchunmi ñucataca sajuarishcangui! Piman cullquita mana mañarcanichu, shinallatac mana mañachircanichu. Shina cacpipish, ñucataca mana alli nishpami rimacun.

JEREMÍAS 15:20

Cantaca gentecunapac ñaupapi jatun bronce pirca shina cachunmi churasha. Canhuan macanacungapac shamushpapish mana mishai pudingachu. Mandac Dios ñucami, canta cuidashpa quishpichingapac canhuan casha.

JEREMÍAS 17:16

Ashtahuanpish ñucaca paicunata can llaquichichunca mana munarcanichu. Paicunaman jatun llaqui punzha chayachunpish mana munarcanichu. Chaitaca canllatac yachanguimi. Ñuca imata rimashpapish, cambac ñaupallapitacmi rimarcani.

JEREMÍAS 18:23

Mandac Dioslla, paicuna ñucata huañuchingapac yuyaricushcataca yachanguimi. Paicunapac juchacunata ama cungaringuichu. Paicuna mana allita ruhuashcataca ama perdonanguichu. ¡Paicuna cambac ñaupapi urmachun, nina japiric shina piñariyari!

JEREMÍAS 20:11

Ashtahuanpish Mandac Diosca sinchi macanacuc soldado shinami ñucataca cuidan. Chaimantami ñucata llaquichiccunaca mitcaric shina pandarishpa mana mishai pudinga. Imapish mana alli llucshicpimi, yallita pingai tucunga. Paicuna pingai tucushcataca jaicapi mana cungaringacunachu.

JEREMÍAS 20:12

Tucuita Mandac Dioslla, cashcata ruhuaccunataca ricuracunguimi. Yuyaitapish, shungutapish tucuitami ricungui. Ñucata llaquichiccunataca cambac maquipimi churani. Ñucata llaquichishcamantaca paicunatapish ñuca ricucucpi llaquichiyari.

JEREMÍAS 20:8

Ñuca caparishpa huacashpaca: «Yalli llaquichinallata, tucurinallatami» huillacuni. Mandac Dioslla, can rimashcata huillacpica, punzhantami rimashpa, pingaichishpa asincuna.

LAMENTACIONES 3:64

Mandac Dioslla, paicuna ima mana allita ruhuashca shinallatac llaquichiyari.

LAMENTACIONES 3:66

Mandac Dioslla, catishpa llaquichiyari. ¡Cai pachamanta chingachiyari!

SAN MATEO 10:22

Ñucamantami tucui gentecunapac piñashca canguichic. Maijanpish tucuringacaman llaquita apacmi quishpiringa.

SAN MATEO 19:29

Maijanpish ñucata catingaraicu huasita, huauquicunata, panicunata, taita mamata, huarmita, huahuacunata, allpata saquicca, chaicunamanta patsac yallihuanmi japinga. Huiñai causaitapish japingami.

SAN LUCAS 21:17

Ñucata caticushcamantami, tucui gentecunapac piñashca canguichic.

ROMANOS 12:19

Cuyashca criccuna, cancunata maijan llaquichicpica, ama cancunallatac llaquichinata yuyaichicchu, ashtahuanpish Dios llaquichichun saquinguichic. Chaica, Dios quillcachishcapica: «Llaquichina cacpica, ñucami llaquichisha. Paicuna japina cashcatami cusha» ninmi.

ROMANOS 8:35

¿Pitac ñucanchictaca Cristopac cuyaimantaca anchuchinga? ¿Llaquicuna? ¿Yarcai? ¿Llaquichishpa caticcuna? ¿Churana illai? ¿Huañui, mana cashpaca espada?

2 CORINTIOS 5:11

Apunchic Jesustaca manchana cashcata yachashpami, gentecuna Dios-huan alli tucuchun nishpa huillacunchic. Ñucanchic ima shina cashcataca Diosca allimi yachan. Chaitaca cancunapish yachachunmi munani.

2 TIMOTEO 4:14

Fierrocunata allichishpa causac Alejandroca ñucata mana allita ruhuashpami llaquichirca. Pai chashna ruhuashcamantaca, Diosmi paitapish llaquichinga.

APOCALIPSIS 18:20

¡Chai pueblota tucuchishcamantaca Diospaclla caccunapish, Jesusmanta huillachun acllashcacunapish, Diosmanta ñaupa huillaccunapish, shinallatac jahua pachapi tucui causaccunapish cushicuichic! Cancunata llaquichic cashcamantami Diosca chai pueblotaca chashna llaquichishca.

APOCALIPSIS 6:10

Chaimanta sinchita caparishpaca: «Tucuita Mandac, jucha illac Dioslla, allpa pachapi causaccunataca, ¿ima punzhacamantac ñucanchicta huañuchishcamantaca taripashpa llaquichigringuiyari?» nircacuna.

JUECES 16:28

Chaipimi Sansonca Mandac Diostaca: —¡Mandac Dioslla, ñucata yuyariyari! Filisteocuna ñuca ñahuicunata llucchishcamanta paicunatapish tucuchingapac cutinllatac ñucaman fuerzata cuiyari— nishpa mañarca.