GÉNESIS 8:21 - Dios Rimashcata Quillcashcami

²¹ Shina rupachicpi, Mandac Diosman mishquilla ashnashpa chayacpimi paica: «Runapac juchamantaca cai pachataca jaicapi mana llaquichishachu. Runaca huambramanta pacha millaita yuyacunllami. Shinallatac mana cunan tucuchishca shina, tucui causaita charic animalcunataca tucuchishachu.

GÉNESIS 8:21 Iomraidhean Croise

GÉNESIS 3:17

Cutin Adantaca: —Ñuca: “Cai yuramanta ama micunguichu” nishca jahua, cambac huarmi nishcata uyashpa, micushcamantami cai allpaca mana alli nishca canga. Tucui causaipimi llaquita trabajashpa, granota pucuchishpa causangui.

GÉNESIS 4:12

Can allpapi granota tarpucpipish, cutinca mana pucungachu. Cai allpapica maimanta shamushca shinami, maipi mana causai pudishpa puricunguilla— nirca.

GÉNESIS 5:29

Chai huahuataca: «Dios allpata mana alli nishcamanta allpapi yalli ñucanchic rigracunahuan sinchita trabajacucpimi, samachinga» nishpami Noeta shutichirca.

GÉNESIS 6:13

Chaita ricushpami, Diosca Noetaca: «Paicunamantami cai pachapica millaica yallita jundarishca. Chaimantami tucui cai pachapi causaita chariccunata tucuchinata yuyarircani.

GÉNESIS 6:17

Riqui, tucui cai pachapi causaita chariccunata tucuchingapacmi cai pachamanca yacu juizhuta cachagrini. Chaipica tucui cai pachapi causaccunami huañunga.

GÉNESIS 6:5

Cai pacha gentecuna yalli millaillata ruhuashpa causacucta Mandac Diosca ricurcami. Paicunapac shungupica punzhanta millaita ruhuanallatami yuyacurca.

GÉNESIS 6:7

Chaimanmi Mandac Diosca: «Cai pachapi causac ñuca ruhuashcacunataca runamanta callarishpa, sacha animalcunacaman, pambata aisarishpa puric animalcunacaman, jahuata volac animalcunacamanmi tucuchigrini. Paicunataca pandachari ruhuarcani» nirca.

JOB 14:4

¿Pitac mana allita ruhuashcataca pichai pudingayari? Chaitaca pi mana ruhuai pudinchu.

SALMOS 51:5

Ñuca mamapac huicsamanta pachami juchayuc cashcani. Ñuca mamaca juchayuctami huicsayuc tucushca.

SALMOS 58:3

Diosta mana manchac millai runacunaca mamapac huicsapi tiyarishcamanta pachami Diosmanta anchurircacuna. Sajuarishcamanta pachami llullashpa chingarircacuna.

SALMOS 58:4

Culebra shina venenoyucmi cancuna. Mana uyac culebra shinami mana uyancuna.

ÉXODO 29:18

Chai oveja aichataca Altar jahuapi churashpa, ñucaman cushpa, rupachingui. Chashna rupachishcami ñucamanca mishquilla ashnanga.

ÉXODO 29:25

Quipataca paicunapac maquimanta japishpa, ñucaman cushca tucui rupacuc jahuapi churashpa rupachingui. Chashna rupachishcami Mandac Dios ñucamanca mishquilla ashnanga. Chaica ñucaman cushpa rupachishcami canga.

PROVERBIOS 20:9

¿Pitac: «Ñuca shungupica chuyami cani. Jucha illacmi cani» ni pudingayari?

ECLESIASTÉS 7:20

Cai pachapica cashcata ruhuac, allita ruhuac, jucha illac runaca shucllapish mana tiyanchu.

ISAÍAS 47:12

Huahuamanta pachami Brujeriata ruhuarcangui. Chai shinallatac catilla. Chashna catishpaca alli tucushpa, sinchi tucunguipishchari.

ISAÍAS 47:15

Can huambramanta pachami yachaccunahuan apanacushpa, randishpa, catushpami causarcangui. Tucui paicunami quiquin ñanta japishpa ringa. Cantaca pipish mana quishpichi pudingachu» ninmi.

ISAÍAS 48:8

Caicunata manarac uyashpa, manarac ricsishpami causarcanguichic. Cancunapac ringrica mana alli uyacchu carca. Ñucaca cancuna mana cazugricushcataca yacharcanimi. Chaimantami mamapac huicsapi cacpirac “mana cazuccunami canguichic” nircani.

ISAÍAS 53:6

Tucui ñucanchicmi chingarishca ovejacuna shina, quiquin ñanta japishpa, caita chaita rishpa, chingarishca carcanchic. Shina cacpipish, Mandac Diosca paimanmi tucui ñucanchic juchacunata apachirca.

ISAÍAS 65:6

Paicuna ruhuashcaca ñuca ñaupapimi quillcashca tiyacun. Mana upalla saquishachu. Ashtahuanpish paicuna imata ruhuashca shinami,

JEREMÍAS 17:9

Runapac shunguca tucuita atishpa llullashpa umacmi. ¿Chaitaca pitac entendinga?

JEREMÍAS 18:12

Ashtahuanpish paicunaca: “Ñucanchic dioscunatami catishun. Quiquin munashcatami ruhuashun. Ñucanchic shungu yuyashcatami ruhuashun. Ñucanchictaca mana jarcai pudinguichu, yangallami rimacungui” ningami» nirca.

JEREMÍAS 8:6

Ñucaca tucuitami alli uyarcani. Allita rimacca mana tiyanchu. Pipish llaquirishpa: “¿Imamantatac ruhuarcaniyari?” nicca mana tiyanchu. Tucui paicunami macanacuiman caballocuna callpac ric shina cada quiquin rincuna.

EZEQUIEL 20:41

Caita chaita rishpa, shuctac llactapi causacucpimi, chaimanta llucchishpa, mishquilla ashnacuc inciensota shina chasquisha. Chashna allita ruhuashcamantami shuctac llactapi causaccunaman ñucaca jucha illac cashcata ricurisha.

LEVÍTICO 1:13

Curallatacmi chunzhullitapish, changa aichatapish yacuhuan jahuanga. Chashnami tucuita tandachishpa, altar jahuapi churashpa rupachinga. Chashna tucui rupachicpimi, Mandac Diosmanca mishquilla ashnanga.

LEVÍTICO 1:17

Curami alascunata ishcaipi pitinga. Shina pitishpapish mana tucui pitishpami altar jahuapi churashpa rupachinga. Chaimi Mandac Diosmanca mishquilla ashnanga.

LEVÍTICO 1:9

Chai chunzhullitapish, changa aichatapish yacuhuan jahuashpami, Diosman cushpa tucui rupachina can. Chashna rupachicpimi, Mandac Diosmanca mishquilla ashnanga.

LEVÍTICO 26:31

Cancuna causana llactacunataca shitashcatami saquisha. Cancunapac altarcunatapish chingachishami. Cancunapac mishquilla ashnacuc inciensotapish mana chasquishachu.

LEVÍTICO 4:31

Dios-huan alli tucungapac cushca animalmanta llucchic shinallatacmi tucui chai animalpac huirata llucchinga. Chai huirataca curami Mandac Diosman mishquilla ashnachun, altar jahuapi rupachinga. Chashna rupachicpimi, Diosca juchacunata perdonanga.

LEVÍTICO 8:28

Quipaca paicunapac maquimanta japishpami, Moisesca Diosman cushpa, tucuita rupachina altarpi rupachirca. Chaicunami Aarontapish, paipac churicunatapish Diospaclla cachun chicanyachingapac rupachinaca carca. Chashna rupachicpimi, Diosmanca mishquillata ashnacuc chayarca.

NÚMEROS 15:3

ñucaman mishquilla ashnachun vacatapish, ovejatapish cushpa, tucuita rupachishpa, mana cashpaca cushami nishcamanta cushpa, mana cashpaca quiquin munaimanta cushpa, mana cashpaca fiesta punzhapi cushpaca,

SAN MATEO 15:19

Shungumantami millai yuyaicuna llucshin. Chaimantami huañuchincuna, huainayancuna, ima millaita ruhuancuna, shuhuancuna, llullancuna, millaita rimancuna.

SAN JUAN 3:6

Aichamanta huacharicca, aichami can. Ashtahuanpish Espiritumanta huacharicca, Espiritumi can.

ROMANOS 1:21

Diosta ricsishpapish, mana Diosta shinachu alli nircacuna, mana pagui nircacunachu. Ashtahuanpish yangallata yuyashpami, paicunapac shunguca imata mana entendic tucurca.

ROMANOS 3:23

Tucui mashna juchayuc cashcamantami Diospac sumaimana achicmanta carupi cancuna.

2 CORINTIOS 2:15

Diosmanca ñucanchicca Cristomantami mishquilla ashnacuc incienso shina canchic. Chai mishquilla ashnacucmi quishpirinaman riccunapurapipish, chingarinaman riccunapurapipish ashnacun.

EFESIOS 5:2

Jesucristo ñucanchicta cuyac shinallatac, cancunapish cuyanacushpa causaichic. Paica Diosman cushpa rupachishca mishquiman ashnacuc shina cangapacmi pai quiquinllatac japi tucushpa, ñucanchicmanta huañurca.

FILIPENSES 4:18

Cancuna Epafroditoman mingashpa ñucaman cachashcataca, tucuita chasquishpami cunancarin, yalli yallita charini. Cancuna ñucaman cushcacunaca Dios cushilla chasquina mishquilla ashnacuc shinami ricurin.

1 JUAN 5:19

Ñucanchicca Diospac huahuacuna cashcatami yachanchic, shinallatac cai pachapaclla causaccunataca diablo mandacushcatami yachanchic.

1 SAMUEL 26:19

Jatun mandac ñuca amolla, canta servic ñuca rimashcata uyai. Mandac Diosllatac ñucata llaquichichun canta yuyachicushpaca, ofrendata chasquichun. Ashtahuanpish runacunalla yuyaita cucucpica, Mandac Diosllatac yallita llaquichichun. Paicunami Mandac Dios cushca llactata ama ñuca japichun: “¡Shuc dioscunata servingapac ri!” nirca.