ÉXODO 30:8 - Dios Rimashcata Quillcashcami

⁸ Chashnallatac tutayacucta lamparacunata japichicushpapish inciensota rupachichun. Caitaca huiñaitami cancunapac huahua huahuacunaca Mandac Dios ñucapac ñaupapi rupachinga.

ÉXODO 30:8 Iomraidhean Croise

2 CRÓNICAS 26:18

Paicunami jatun mandac Uziasta piñarishpaca: «¡Uzías, Mandac Diosman inciensota rupachinaca mana cambac ruhuanachu! Ashtahuanpish Aaronpac huahua huahua curacunallami chaita rupachingapac chicanyachishca cashcamanta chaita ruhuai pudincuna. Diospaclla ucumanta llucshi. ¿Ima nishpatac chashna mana allita ruhuashpa, Mandac Diosta llaquichingapac shamurcanguiyari? Chashna ruhuashcamantaca Mandac Diospacca mana allichu cangui» nircacuna.

SALMOS 141:2

Ñuca mañashcaca incienso cushni shina mishquilla cambac ñaupaman chayashca cachun. Cambac ladoman ñuca maquicunata chutashcaca chishi lado ofrendata cushca shina cachun.

ÉXODO 12:6

Chai animaltaca quilla chunga chuscu punzhacamanmi charicuna canguichic. Chai punzha chishipimi, tandanacushca israelcunaca chai animalta huañuchinga.

ÉXODO 25:37

Shinallatac canchis lamparacunata ruhuashpa, ñaupaman achicyachichun japichishpa churangui.

ÉXODO 27:21

Chai lamparacunataca Aaronmi paipac churicunandi Mandac Dios ñucapac ñaupapi, ñucahuan tupana ucupi mandashcacunata huacaichishca paño canzhapi, chishimanta tutamantacaman japichishpa charinga. Caicunataca tucui israelcunapish, paicunapac huahua huahuacunapish huiñaita pactachichunmi, mandashpa quillcashca.

ÉXODO 30:7

Aarón lamparacunata allichicushpaca, cada tutamantami mishquilla ashnacuc inciensota altarpi rupachinga.

ÉXODO 30:9

Cai altarpica shuctac inciensotapish, tucuita rupachinatapish, grano ofrendatapish, vinotapish ama rupachinguichu.

ROMANOS 8:34

¿Pitac paicunataca juchanchinga? Jesucristomi ña huañurca. Paimi huañushcacunapuramanta causarishpa, Diospac alli maquiman rishpa ñucanchicmanta mañacun.

1 TESALONICENSES 5:17

Punzhanta Diosta mañaichic.

HEBREOS 7:25

Paimanta Diospacman cuchuyaccunataca, huiñai huiñaipacmi quishpichin. Paica huiñaitami causacun, chashnami huiñaita mañacun.

HEBREOS 9:24

Chaica Apunchic Jesusca mana gentecunalla ruhuashca carpa huasimanchu yaicurca. Ashtahuanpish jahua pacha Diospac ñaupamanmi yaicurca.

1 SAMUEL 2:28

Ñuca altarman rishpa, ñucapac ñaupapi efodta churarishpa, inciensota rupachichunmi tucui Israel aillucunamanta ñucapacllata ruhuac cura cachun acllarcani. Shinallatac israelcuna ofrendata ñucaman cushcatapish, cambac taitacunapac huasi ucupuramanmi curcani.