ESDRAS 4:15 - Dios Rimashcata Quillcashcami

¹⁵ Shinallatac ñaupa taitacuna ima ruhuashcata quillcashcapi mashcachunpish huillanchic. Chai quillcashcapi mashcashpami, chai pueblopi causaccuna mana cazushcatapish, jatun mandaccunamantapish yachangui. Shinallatac llactacunatapish llaquichishpa causashcatapish, chai pueblopi causaccuna ñaupa huatacunamanta pacha mana cazuccuna cashcatapish, chaimanta chai pueblo tucurishcatapish yachangui.

ESDRAS 4:15 Iomraidhean Croise

2 REYES 24:20

Chaimantami Mandac Diosca Jerusalenpi causaccunahuanpish, Judá llactapi causaccunahuanpish yallita piñarishpa, paipac ñaupamanta llucchishpa cacharca. Sedequiasca Babilonia llactata jatun mandacta mana cazushpami cariyarca.

2 REYES 25:4

Chaimantami jatun mandac Sedequiasca jatun pircata jutcushpa caldeocuna muyundipi chapacucpipish, tucui paipac soldadocunahuan llucshirca. Paipac huertata rishpa, ishcai pirca chaupipi tiyac punguta chai tutallatac llucshishpami, Arabá pambaman rina ñanta rirca.

ESDRAS 4:12

can jatun mandac yachachun caita huillanchic: Judá llactapi causaccuna cambac llactamanta huichai shamushpa, Jerusalenman chayashpami mana cazuc, mana alli gentecuna causashca pueblocunata cutin allichicun. Cai pueblo muyundi pircacunatapish, allichishpami callari rumicunatapish churacuncuna.

ESDRAS 4:14

Ñucanchicca jatun mandacpac huasimantami micushpa causacunchic. Chaimantami can jatun mandacta yangapi churachunca mana munanchic. Chashna cashcamantami can jatun mandac yachachun caita cachanchic.

ESDRAS 4:16

Jatun mandaclla, cai pueblota cutin allichicpi, muyundi pircata cutin shayachicpica, jatun yacu lado llactacunaca mana ashtahuan cambacchu canga» nishpami quillcashca carca.

NEHEMÍAS 2:19

Ashtahuanpish Horón pueblomanta Sanbalatpish, jatun mandacta servic amonitapuramanta Tobiaspish, arabepuramanta Gesempish chaita uyashpami ñucanchicta asishpa burlashpaca: —¿Cancunaca imatatac ruhuacunguichic? ¿Jatun mandacpac contrachu tucugringuichic?— nircacuna.

NEHEMÍAS 6:6

Chai quillcapica: «Gentecunapurapica, canpish, Judá llactapi causaccunapish jatun mandacta mana cazushpami chai jatun pircata allichicun, nictami uyanchic. Gesempish chashnallatacmi nicun. Chaicunata uyashpaca can jatun mandac tucusha nicushcatami yachanchic.

ESTER 2:23

Chaita huillacpimi, jatun mandacca paita ciertotac huañuchisha nicushcata alli tapurca. Chai quipaca huañuchisha nicushca chashnatac cacpimi, chai ishcai eunuco runacunataca sipishpa huañuchirca. Chashna tucushcataca jatun mandac imata ruhuashcata quillcashca libropimi quillcashca saquirirca.