EFESIOS 2:3 - Dios Rimashcata Quillcashcami

³ Shinallatacmi tucui ñucanchicpish ñaupaca quiquin munaita, cai pacha jucha munashcallata, ñucanchic yuyarishcallata ruhuashpa causarcanchic. Chashna juchata ruhuashcamantami, caishuc mana allita ruhuaccuna shinallatac ñucanchicpish Dios llaquichishca cana carcanchic.

Nuevo Testamento en Quichua Cañar 1996

³ Shinallatacmi tucui ñucanchicpish ñaupaca quiquin munaita ruhuashpa, cai pacha jucha munashcallata, ñucanchic yuyashcallata c'atishpa causarcanchic. Chashna quiquin munashcata c'atishpa juchata ruhuashcamantami, caishuc mana allita ruhuaccuna shinallatac ñucanchicpish Dios llaquichishca cana carcanchic.

EFESIOS 2:3 Iomraidhean Croise

GÉNESIS 5:3

Adanca patsac quimsa chunga huatayuc cashpami, pai shinatac shuc churita charirca. Paitaca Settami shutichirca.

GÉNESIS 6:5

Cai pacha gentecuna yalli millaillata ruhuashpa causacucta Mandac Diosca ricurcami. Paicunapac shungupica punzhanta millaita ruhuanallatami yuyacurca.

GÉNESIS 8:21

Shina rupachicpi, Mandac Diosman mishquilla ashnashpa chayacpimi paica: «Runapac juchamantaca cai pachataca jaicapi mana llaquichishachu. Runaca huambramanta pacha millaita yuyacunllami. Shinallatac mana cunan tucuchishca shina, tucui causaita charic animalcunataca tucuchishachu.

JOB 14:4

¿Pitac mana allita ruhuashcataca pichai pudingayari? Chaitaca pi mana ruhuai pudinchu.

JOB 25:4

¿Ima shinatac runaca Diospac ñaupapica, cashcata ruhuac tucunga? ¿Ima shinatac huarmimanta huacharishca runaca mapa illac tucunga?

SALMOS 51:5

Ñuca mamapac huicsamanta pachami juchayuc cashcani. Ñuca mamaca juchayuctami huicsayuc tucushca.

ISAÍAS 53:6

Tucui ñucanchicmi chingarishca ovejacuna shina, quiquin ñanta japishpa, caita chaita rishpa, chingarishca carcanchic. Shina cacpipish, Mandac Diosca paimanmi tucui ñucanchic juchacunata apachirca.

MARCOS 4:19

Chashna uyashpapish, cai causaipaclla munaihuan, charicyana munaihuan, charishpapish ashtahuan charina munaihuanmi pandarincuna. Chai munaicunami alli huillaita uyashcataca aguachic shina cungachin. Chaimantami grano mana pucuc shina ricurincuna.

SAN JUAN 1:13

Mana runacunapac munaimanta, mana cai pachapi huacharishcamantachu Diospac huahuacuna tucun, ashtahuanpish Diospac munaimantami paipac huahuacuna tucun.

SAN JUAN 8:44

Cancunaca diablopac huahuacunami canguichic. Chaimantami pai munashcata ruhuanguichic. Diabloca callarimanta pachami huañuchic, llullac cashca. Paica jaicapi mana cashcata ninchu. Paica llullapac taitami. Pai llullashpaca, pai ima shina cashca shinallatacmi ricuchin.

HECHOS 14:16

Paica ñaupaca tucui gentecuna quiquin munashca shina causachunmi saquirca.

ROMANOS 1:24

Chaimantami paicunapac shungu munashcata ruhuachun Diosca saquishca. Chashna saquicpimi, caishuc chaishuc-huan pingaipac, millana juchacunata ruhuarca.

ROMANOS 11:30

Cancunapish ñaupaca Diosta mana cazuccunami carcanguichic. Shina cacpipish, cunanca israelcuna mana cazushcamantami Diosca cancunatapish llaquicun.

ROMANOS 13:14

Chaipac randica, Apunchic Jesusta churanata churaric shina, paihuan millaita mishaichic. Ashtahuanpish ama cai pacha jucha munashcata ruhuaichicchu.

ROMANOS 2:14

Mana israelcunaca Moisés mandashcacunata mana yachashpapish, paicunapac yuyaipi imami, alli, imami mana alli cashcata yachashcamantami mandashcacunata pactachincuna.

ROMANOS 5:10

Dios ñucanchic-huan piñashca cashpapish, paipac Churi huañushcamantami ñucanchicta chasquirca. Ña chashquishca cashpacarin Cristo causacushcamantami quishpichishca cashun.

ROMANOS 5:9

Apunchic Jesucristo huañushcamanta, Dios chashquishca cashpaca, Dios piñarishpa, llaquichicui punzhapica quishpirishcami cashun.

ROMANOS 6:12

Chaimanta cancunapac huañunalla cuerpopi juchata ruhuana munai tiyachunpish, jucha mandashpa millaita ruhuachichunpish ama saquinguichicchu.

ROMANOS 7:18

Ñucaca juchayuc runa cashcamantaca, ñucapi ima alli ruhuana yuyai mana tiyashcatami yachani. Ima allita ruhuasha nishpapish, mana ruhuai pudinichu.

ROMANOS 9:22

Chai shinallatacmi Diosca piñashpa tucuchina cacpipish, mana llaquichishpa, pai llaquichic cashcatapish, poderyuc cashcatapish ricuchin.

1 CORINTIOS 4:7

¿Pitac cantaca shuccunamanta yallita ruhuarca? ¿Imatatac Diosmantaca mana chasquircangui? Chashna tucuita chasquishpaca, ¿ima nishpatac Diosmanta mana chasquishca shina jatun tucungui?

2 CORINTIOS 7:1

Cuyashca criccuna, Dios ñucanchicman allicunata cushami nishcamantaca, Diosta manchashpa cuerpotapish, almatapish tucui imapish mapayachinamanta huacaichirishpa, chuyanlla causashunchic.

GÁLATAS 3:22

Ashtahuanpish Dios quillcachishcapi nishca shinaca, maijanpish Jesucristota crishcallamanta Dios cusha nishcata japichunmi, juchaca tucui gentecunata huatashca shina charicun.

EFESIOS 2:2

Cai pacha mana alli causaita catishpami, huairapi puric mandac millai espíritu munashcata ruhuashpa causacurcanguichic. Chai espiritumi Diosta mana cazuccunataca mana allita ruhuachishpa mandacun.

EFESIOS 4:22

Chaimantami cancunaca ñaupa ima shina causacushcataca saquina canguichic. Chai yuyaicunaca cancunata pandachishpa, mana allillata ruhuachishpami, ismuchic shina tucuchicurca.

COLOSENSES 1:21

Cancunaca ñaupaca mana allita ruhuashcamantami, Diosmanta caruyashpa, cancunapac shungupica Diosta piñaccuna carcanguichic.

1 TESALONICENSES 4:13

Cuyashca criccuna, huañushcacuna causarinata mana criccuna shina ama llaquilla cachunmi, huañushcacuna ima tucuna cashcata yachachun munanchic.

1 TESALONICENSES 5:6

Chaimanta mana caishuccuna shina sueñunachu canchic. Ashtahuanpish riccharishca shina chaparanami canchic.

1 TIMOTEO 6:9

Ashtahuanpish charina yuyaihuan cacpimi, millai munaicunaca muspachishpa, tucllapi urmachic shina gentecunataca llaquiman apashpa chingachin.

TITO 3:3

Ñaupaca ñucanchicpish Diosta mana cazuc, yuyai illac, juchapi chingarishca, ñucanchic munaillata ruhuashpa cushicuna yuyaillapi huatashca shinami causacurcanchic. Chashna cashpami shuccuna ama charichun munashpa, caishuc chaishuc-huan piñanacushpa causacurcanchic.

1 PEDRO 1:14

Alli cazuc huahuacuna shina, Diosta manarac ricsic cashpa, jucha munashca shina causanataca ama munaichicchu.

2 PEDRO 2:14

Maijan huarmita ricushpaca, huainayana yuyaillami cancuna. Juchallinataca manatac shaicuncunachu. Manarac sinchi criccunataca pandachincunami. Paicunaca tucuita atishpa imatapish charinallata munaccuna, shinallatac Dios mana ricunayachishca gentecunami can.

2 PEDRO 2:18

Paicunaca yanga mapa rimaicunallatac caparishpa rimashpami, quiquin munashca mapacunata ruhuashpa, mana alli causaccunapuramanta cunanlla anchurishcacunataca cutin pandachincuna.

1 JUAN 2:16

Tucui cai pachapi tiyac millai munaicunapish, tucui ricushcata charina munaicunapish, charishcacunahuan jatun tucuna munaicunapish mana Diosmantachu shamun, ashtahuanpish cai pachallami chai munaicunataca cun.

1 JUAN 2:8

Shina cacpipish mushuc mandashcata quillcac shinallatacmi quillcani. Cai mandashca mana llulla cashcataca Jesucristomi ricuchirca, shinallatac cancunapish ricuchicunguichicmi. Imatapish cashcata ruhuac luz achicyachicucpimi, amsaca chingarishpa caticun.