APOCALIPSIS 4:5 - Dios Rimashcata Quillcashcami

⁵ Chai jatun mandac mandashpa tiyarinamantaca relampacuna, rimashcacuna, shinallatac tulun nishcacunami llucshicurca. Shinallatac chai tiyarinapac ñaupapica canchis mechami japiricurca. Chaicunaca Diospac canchis Espiritumi.

Nuevo Testamento en Quichua Cañar 1996

⁵ Chai jatun mandac mandashpa tiyarinamantaca relampacunapish, rimashcacunapish, tulun nishcacunapish llucshicurcami. Shinallatac chai tiyarinapac ñaupapica canchis michami japiricurca. Chaicunaca Diospac canchis Espiritumi.

APOCALIPSIS 4:5 Iomraidhean Croise

GÉNESIS 15:7

Shina chashquishpaca: —Ñucaca canta Mandac Diosmi cani. Ñucami cai allpata canman cungapac caldeocuna causana Ur llactamanta llucchircani— nirca.

2 CRÓNICAS 4:20

Shinallatac candelerocunatapish, chaipi churana lamparacunatapish alli curimantami ruhuarca. Chaicunataca mandashcapi nishca shinallatac Diospaclla chicanyachishca ucu cuchupi mechata japichingapacmi ruhuarca.

SALMOS 68:35

Diosca paipaclla huasipi tiyashpami, jatun mancharinacunata ruhuacun. Israelcunapac Diosca pai acllashcacunamanca fuerzata cushpami sinchiyachin. ¡Sumac Diosca alli nishca cachun! 4

ÉXODO 19:16

Ña quimsa punzha pacarimucucpica, tulun nishpa, relampa jaguin nishpa, shinallatac amsa puyupish urcuta taparcami. Cutin corneta sinchita tocashcapish uyarircami. Shina uyaricpimi, carpa ucupi tiyac israelcunaca mancharishpa chucchurca.

ÉXODO 20:18

Tucui israelcunamami tulun nishcatapish, corneta tocashcatapish uyarca. Shinallatac relampa jaguin nishcatapish, Sinaí urcu cushni tapashcatapish ricurca. Chaimantami manchaihuan chucchushpa caruyarca.

ÉXODO 25:37

Shinallatac canchis lamparacunata ruhuashpa, ñaupaman achicyachichun japichishpa churangui.

ÉXODO 37:23

Canchis lamparacunatapish, mechata pitinacunatapish, uchupa tandanacunatapish alli curimantami ruhuarca.

EZEQUIEL 1:13

Causaita chariccunaca carboncuna jagan nicuc shinami carca. Paicunapac chaupipica mechacuna rupacuc shinami, caiman chaiman cuyuricurca. Chai ninaca yallitami achicyachicurca, shinallatac relampa jagan nicucmi llucshicurca.

JOEL 3:16

Mandac Diosca Sión urcumantami león huacac shina caparinga. Pai rimashcaca Jerusalenmantami uyaringa. Jahua pachapish, cai pachapish chucchungami. Shina cacpipish, Mandac Diosca pai acllashca israelcunata cuidangami. Paica miticuna sinchi torre shinapishmi canga.

ZACARÍAS 4:2

Chai ángel tapushpaca: —¿Imatatac ricungui?— nirca. Shina tapucpimi ñucaca: —Aceiteta churana curi candelerota, cutin chai jahuapica canchis lamparacunatapish, canchis tubocunatapishmi ricucuni.

SAN MATEO 25:1

Jahua pacha Dios mandacucca, chunga solteracuna lamparata japichishpa, noviohuan tupangapac llucshic shinami.

SAN MATEO 3:11

Ñucaca llaquirishpa, Diosman cutirichunmi, yacuhuan bautizacuni, ashtahuanpish ñucapac quipa shamucmi, Diospac Espirituhuan, ninahuan bautizanga. Paica ñucata atishpa, ashtahuan poderyucmi. Ñucaca paipac ushutallatapish mana apaipacchu cani.

HECHOS 2:3

Chaimantaca nina japirishpa pitiric shinami, tucui criccunapac jahuapi asha asha tiyarirca.

APOCALIPSIS 1:4

Ñucaca Juanmi cani. Ñucami Asia llactapi cac canchis pueblopi tandanacushca criccunaman quillcani. Dios cancunata mai cuyashpa sumac causaita cuchun, Diospac mandashpa tiyarina ñaupapi cac canchis Espiritucunapish allicunata cancunaman cuchunmi munani. Paica sarunpish, cunanpish, shinallatac shamucpish paillatacmi can.

APOCALIPSIS 10:3

Shina shayacushpaca, león shinami sinchita caparirca. Shina caparicpica, canchis tulun nishca caparishcami uyarirca.

APOCALIPSIS 11:19

Shina cacpica, jahua pachapi tiyac Diosta mañana huasimi pascarirca. Chaipica Dios-huan ari nishca Arcami ricurirca. Urcucuna tulun nishcapish, rimashcacunapish uyarircami. Relampa achic nishcapish ricurircami. Allpapish chucchurcami, rundupish yallitami urmarca.

APOCALIPSIS 3:1

Sardis pueblopi cac tandanacushca criccunata ricuc angelman quillcai: “Diospac canchis Espirituta shinallatac canchis lucerota charicucca: Ñucaca can imata ruhuacushcata, shinallatac causacunimi nicushpapish huañushca shina cashcataca yachanimi.

APOCALIPSIS 5:6

Chai ishcai chunga chuscu yuyaccunapac, shinallatac chuscu causaita chariccunapac chaupipi cac mandashpa tiyarina cuchupica, huañuchishca shina shuc Pactalla Oveja shayacuctami ricurcani. Chai Ovejaca canchis gachuyuc, shinallatac canchis ñahui muruyucmi carca. Chai canchis ñahui murucunaca, cai pachaman cachashca Diospac canchis Espiritucunami can.

APOCALIPSIS 8:5

Chai quipa incienso churanata ángel japishpaca, altarpi tiyac nina brazasta jundachishpami cai pachaman shitarca. Chashna shitacpica, urcucuna tulun nishca, rimashcacuna, relampacuna achic nishca, shinallatac allpa chucchuimi tiyarca.