APOCALIPSIS 18:5 - Dios Rimashcata Quillcashcami

⁵ Paicunapac juchacunaca ashtahuan ashtahuan mirarishpami, jahua pachacaman chayashca. Shinallatac tucui paicunapac juchata ricushpami, Diosca llaquichinata yuyarishca.

Nuevo Testamento en Quichua Cañar 1996

⁵ Paicunapac juchacunaca ashtahuan ashtahuan mirarishpami, jahua pachacaman chayashca. Shinallatac tucui paicunapac juchata ricushpami, Taita Diosca llaquichinata yuyarishca.

APOCALIPSIS 18:5 Iomraidhean Croise

2 CRÓNICAS 28:9

Mandac Dios ima nishcata huillac Obedmi Samaria pueblopi causacurca. Paimi Samaria puebloman soldadocuna chayacucpi, tupangapac llucshishpaca: —Cancunapac ñaupa taitacunata Mandac Diosca Judá llactapi causaccunahuan piñarishpami, cancunapac maquipi churarca. Cancunaca jahua pachaman chayacta yallita piñachishpami, achcata huañuchircanguichic.

ESDRAS 9:6

mañashpaca: «Ñuca Dioslla, yallita manchaihuan, pingaihuan cashpami, ñuca ñahuihuan canta huichai ricunatapish mana pudini. Ñuca Dioslla, ñucanchic mana allita ruhuashcaca yallita mirashpami, umacaman tapashpa, jahua pachacaman chayashca.

JEREMÍAS 51:9

Babilonia llactata jambisha nircanchicmi. Shina cacpipish, mana alliyarcachu. Paicunapac juchata taripashpa llaquichinaca jahua puyucaman, jahua pachaman jundashcami. Chaimanta paicunata saquishpa, ñucanchic llactacunaman jacuchiclla.

JONÁS 1:2

«Jatari, jatun Nínive llactapi causaccunata llaquichina cashcata huillagri. Paicuna alli mana allita ruhuashcatami yachani» nirca.

APOCALIPSIS 16:19

Chashna tucucpica, jatun Babilonia puebloca quimsapimi chaupirirca. Cai pachapi tiyac tucui pueblocunapish tuñirircami. Chai jatun Babilonia pueblotaca jayac vinota ubiachic shina piñaihuan llaquichingapacmi, Diosca yuyarirca.