1 SAMUEL 6:4 - Dios Rimashcata Quillcashcami

⁴ Shina nicpimi filisteocunaca: —Chai juchata anchuchichunca ¿Imatatac cushunyari?— nirca. Shina tapucpimi curacunaca: —Filisteocunata mandaccuna mashna cashca shinallatac pichca curi chuputapish, pichca curi ucuchatapish saquigringuichic. Chai ungüillatacmi tucui cancunatapish, cancunata mandaccunatapish llaquichicun.

1 SAMUEL 6:4 Iomraidhean Croise

ÉXODO 12:35

Israelcunaca Moisés mandashca shinallatacmi, Egipto runacunaman cullquimanta, curimanta ruhuashca charinacunatapish, churanacunatapish mañarca.

JOSUÉ 13:3

Egiptomanta inti llucshina ladoman cac Sihor yacumanta jahua Ecrón pueblocamanmi tiyanrac. Chai allpaca, cananeocunapacmi nincuna. Gaza, Asdod, Ascalón, Gat, Ecrón pueblocunami tiyanrac. Aveocunapac llactapish tiyanracmi.

JUECES 14:19

Mandac Diospac Espíritu paipacman shamucpimi, Sansonca Ascalón puebloman urai rishpa, quimsa chunga filisteocunata huañuchishpa paicuna charishcata quichushpa, bodapi churanata imashi imashita huillaccunaman curca. Quipaca yallita piñarishpami paipac taitapac huasiman cutirca.

JUECES 3:3

Chai llactacunaca caicunami: Filisteocunamantaca pichca pushaccuna, tucui cananeocuna, Líbano urcu llactapi causac sidoniocunapish, heveocunapish cancuna. Paicunapac llactaca Baal-hermón urcumantaca Hamat pueblocamanmi carca.

1 SAMUEL 5:12

Mana huañuccunaca chupu ungüihuanmi yallita llaquita aparca. Chaimantami pueblopi tucui causaccuna caparishcaca jahua pachacaman uyarirca.

1 SAMUEL 5:6

Mandac Diosca Asdod pueblopi causaccunataca ashtahuanmi llaquichic callarirca. Shinami Asdod pueblopipish, chai muyundi llactacunapipish chupu ungüihuan yallita llaquichishpa tucuchirca.

1 SAMUEL 5:9

Chai puebloman apacpimi, Mandac Diosca chai pueblopi causaccunahuan piñarishpa, yallita llaquichirca. Chai pueblopi causaccunataca uchillacunamanta callarishpaca yuyaccunacamanmi chupu ungüihuan manchanayaita llaquichirca.

1 SAMUEL 6:5

Cancunapac llactata tucuchicuc chupu shinata, ucuchacuna shinata curimanta ruhuashpa israelcunapac Diostaca allimari cangui nichic. Chashna ruhuacpica cancunatapish, cancunapac dioscunatapish, cancunapac allpacunatapish, paipac poderhuan llaquichinataca saquingapishchari.

1 SAMUEL 6:8

Chai quipaca Diospac Arcata carretapi churaichic. Shinallatac cancunapac juchamanta cushca curicunataca shuc uchilla cajonpi churashpa, Diospac Arca ladopi churanguichic. Quipaca chai yugoshca vacacuna maimanpish richun saquinguichic.