1 SAMUEL 2:30 - Dios Rimashcata Quillcashcami

³⁰ Chaimantami israelcunata Mandac Diosca: “Cambac huasi ucupurapish, cambac taitacunapac huasi ucupurapish huiñaitami ñuca ñaupapi causangacuna” ninmi. Ashtahuanpish Mandac Diosca: “¡Manatac chashna cachun saquishachu! Ñucata alli niccunataca alli nishami, ñucata mana alli niccunataca mana alli nishachu.

1 SAMUEL 2:30 Iomraidhean Croise

1 REYES 11:11

Chaimantami Mandac Dios Salomontaca: «Canca cashna ruhuashpami, ñucahuan ari nishcatapish, pactachichun cushca shimicunatapish mana cazurcangui. Chaimantami can mandacushcata quichushpa, canta servicman cusha.

1 REYES 2:27

Shinami Salomonca Abiatar curataca Mandac Diospac cura cashcamanta llucshishpa cacharca. Elí curapac huahua huahuacuna ima tucunata Silo pueblopi Mandac Dios rimashca pactachunmi chashnaca ruhuarca.

1 CRÓNICAS 17:18

Mandac Dioslla, ¿canta servic ñucaman allicunata ruhuashcamantaca imatatac ashtahuan nishayari? Canllatac ricsinguimi.

2 CRÓNICAS 15:2

Shina shamucpi, Asahuan tupangapac llucshishpaca: «Canpish, Judá llacta, Benjamín llacta tucui soldadocunapish uyaichic. Cancuna Mandac Dios-huan cacpica, paipish cancunahuanmi canga. Cancuna paita mashcashpaca taringuichicmi. Ashtahuanpish cancuna paita saquicpica, paipish cancunata saquingami.

2 CRÓNICAS 26:18

Paicunami jatun mandac Uziasta piñarishpaca: «¡Uzías, Mandac Diosman inciensota rupachinaca mana cambac ruhuanachu! Ashtahuanpish Aaronpac huahua huahua curacunallami chaita rupachingapac chicanyachishca cashcamanta chaita ruhuai pudincuna. Diospaclla ucumanta llucshi. ¿Ima nishpatac chashna mana allita ruhuashpa, Mandac Diosta llaquichingapac shamurcanguiyari? Chashna ruhuashcamantaca Mandac Diospacca mana allichu cangui» nircacuna.

SALMOS 18:20

Mandac Diosca ñuca cashcata ruhuashpa causac cacpimi allicunata curca. Ñuca maquihuan ima millaita mana ruhuashcamantami cuna cashcataca curca.

SALMOS 18:26

Mapa illac runamanca chuya cashcatami ricuchingui. Ashtahuanpish millaita ruhuactaca yallitami llaquichingui.

SALMOS 50:23

Maijanpish animalta ñucaman cushpa alli nicmi, ñucataca jatunyachinga. Paipac causaita allichicmanmi ñuca quishpichic cashcataca huillasha» ninmi.

SALMOS 73:20

Sueñuimanta riccharic shinami Jatun Dios jatarishpa paicuna ima shina cashcata yangapi churanga.

SALMOS 91:14

Sumac Diosca: «Paitaca ñucata cuyashcamantami quishpichisha. Ñuca shutita ricsishcamantami ashtahuan jahuapi churasha.

SALMOS 91:15

Pai ñucata mañacpica, ñucaca uyashami. Pai yallita llaquihuan cacpica, ñucaca paihuanmi casha. Paita quishpichishpami alli nishca cachun ruhuasha.

ÉXODO 28:43

Chai churanahuanmi Aaronpish, paipac churicunapish ñucahuan tupana huasipi tandanacungapac, mana cashpaca altarpi servingapac yaicunga. Mana chashna yaicushpaca, juchallishpa huañungami. Cai mandashcacunami huiñaipac Aaronmanpish, quipa miraicunamanpish can.

ÉXODO 29:9

Aarontapish, paipac churicunatapish chumbihuan huatachishpa, mitrata churachingui. Chashna ruhuacpimi, huiñaita ñucapaclla cura cachun mandashca canga.

PROVERBIOS 12:8

Runaca alli yachac cashcamantami alli nishca canga. Ashtahuanpish millai shungu runataca tucuimi mana ricunayachinga.

PROVERBIOS 4:8

Chai alli yachaita jatunyachicpica, cantapish jatunyachingami. Paita can ucllaricpica, cantapish alli ningami.

PROVERBIOS 8:17

Ñucata cuyaccunataca cuyanimi. Ñucata mashcaccunaca tarinmi.

ISAÍAS 29:13

Chaimantami Mandac Diosca: «Cai gentecunaca shimillahuanmi ñucataca mañan. Jahua shimillahuanmi alli nincuna. Ashtahuanpish paicunapac shunguca ñucamanta carupimi. Shinallatac runacuna yachachishcata catishcallamantami ñucataca manchan.

JEREMÍAS 29:32

Chaimantami Mandac Dios ñucaca: Nehelam llactamanta Semaiastapish, paipac huahua huahuacunatapish llaquichigrinimi. Paicunapuramantaca shucllapish cai gentepurapica mana saquiringachu. Ñuca acllashcacunaman ñuca ima mana allita ruhuactaca pipish mana ricungachu. Chaica, Mandac Dios ñucata mana cazuchun huillashcamantami chashna tucunga” nishpa quillcai. Chaitaca Mandac Dios ñucami nini» nirca.

JEREMÍAS 49:15

Cancunataca tucui llactacunamanta yalli uchillatami ruhuagrini. Tucui gentecunami cancunataca mana valichinga.

EZEQUIEL 34:10

Mandac Dios ñucaca: ¡Riquichic, michiccunahuanca yallitami piñarishca cani! ¡Ñuca ovejacuna ima tucushcataca ñucami tapusha! Ña mana paicunata michichun saquishachu. Shina ruhuacpimi, paicunalla cuidarinataca saquinga. Ashtahuanpish ñuca ovejacunataca paicunapac shimimanta quichushpami, paicuna micuchunca, mana ashtahuan saquisha.

DANIEL 4:34

Chai nishca punzhacuna pactacpimi, Nabucodonosor ñucaca jahua pachata huichailla ricurcani. Chashna ricushpami, cutin yuyaita japircani. Chaimantami jahua pachapi huiñaita causac Diostaca: “Huahua huahuacunata jatun mandac, sumaimanami cangui nishpa alli nircani.

MALAQUÍAS 1:6

Churica taitata cazunmi. Servicpish amota manchanmi. Ñuca cancunapac Taita cacpica, ¿ima nishpatac mana cazunguichic? Ñuca cancunapac amo cacpica, ¿ima nishpatac mana manchanguichic? Ñuca shutita yangapi churac curacunalla, cancunaca: “¿Ima shinatac cambac shutitaca yangapi churanchicyari?” ninguichicmi. Chaitaca Mandac Dios ñucami nini.

MALAQUÍAS 2:3

Ñucami cancunapac huahua huahuacunataca llaquichisha. Ñucaman cushpa huañuchishca animal huanutapish cancunapac ñahuipimi shitasha. Cancuna fiestata ruhuashpa, animalta huañuchishca huanundimi cancunataca shitasha.

NÚMEROS 11:20

Ashtahuanpish quilla jundatami amirishpa millanayachingacaman micugringuichic. Cancunapac chaupipi causac Mandac Diosta mana valichishpami cancunaca: ‘¿Imamantatac Egiptomanta llucshimurcanchic?’ nishpa Mandac Diospac ñaupapi huacarcanguichic. Chaimantami cashna micugringuichic” ningui— nirca.

NÚMEROS 35:34

Cancuna causacushca llactataca ama mapayachinguichicchu. Ñucapish chai llactapimi cancunahuan causacuni. Mandac Dios ñucaca israelcunapac chaupipimi causani” ninmi ningui» nirca.

SAN JUAN 12:26

Maijanpish ñucata servisha nicca ñucata catichun. Ñucata servicca maipimi ñuca cani, chaipimi canga. Maijanpish ñucata servictaca ñuca Taitami alli ninga.

SAN JUAN 5:23

Chaica, maijanpish Taitata alli nic shinallatac Churita alli nichunmi chashnaca churarca. Maijanpish Churita mana alli nicca, ñucata cachac Taitami mana alli nin.

SAN JUAN 5:44

Cancunaca, cancunapura alli ninacunallatami munanguichic, ashtahuanpish shuclla Diospac alli nishca canataca mana munanguichicchu. Shina cashpaca, ¿ima shinatac ñucataca cringuichicyari?

SAN JUAN 8:49

Shina nicpimi Jesusca: —Ñucaca mana supaihuan canichu. Ñucaca Taitatami jatunyachini, ashtahuanpish cancunaca ñucataca mana jatunyachinguichicchu.

1 CORINTIOS 4:5

Shina cacpica manarac juchanchina punzha chayamucpi, ama juchanchichicchu. Apunchic Jesús cutimunata shuyaichic. Paimi amsapi pacashcacunatapish, shungu imata yuyashcatapish achicpi shina ricuchinga. Shina ruhuacpimi, Diosca cada quiquin imata ruhuashcata ricushpa alli ninga.

1 PEDRO 1:7

Curi alli cactaca ninapi rupachishpami ricun. Chai shinallatac cancuna alli crishcata ricungapacca, llaquicunaca japinami can. Shina llaquita apana cacpipish, mana chingaric crishcaca chingariclla curitapish ashtahuan yallimi can. Chai shina llaquichishca cashpapish crinata mana saquishpaca, Jesucristo ricuricpica, sumacyachishca, “allimi cangui” nishcami canguichic.

JUECES 9:10

Shina nicpimi, yuracunaca higo yurataca: “Ñucanchicta jatun mandac tucui” nirca.